Read Sukuma Bible 2015 – Bibilia Ilagano Lya Kale 2015 Yona 1 Bible Online

Yona 1 - Sukuma Bible 2015 – Bibilia Ilagano Lya Kale 2015 bible

Yona 1

¹Mhayao go ng'wa SEEBA gūkang'wizīīla Yona ng'witūnja wa g'wa Amitai, gūlīhaya:

²“Jaga Ninawi, ūyo gūlī nzengo ntaale, ūkagūlomeele; nguno ū būbi waago washikile kū būtongi wane.”

³Alīyo ū Yona ūbona ampeele ū SEEBA aje Talishishi, hūna ūja kū ng'walo gwa Yopa; ūūkabona meeli. Aho wamala ū kūlīpa ī hela ja nauli wingīla moi ūbūūka lūgendo lwa kūja ī Talishishi ampeele ū SEEBA.

⁴Ū SEEBA ūtūma nyaga ntaale ū mu nyanza, yūsala no ī nyanza kūshisha ī meeli yūbiza mu kwihīga kwa kūhaya kūpaanagūka.

⁵Pye a batūmami ba mu meeli bogoha no, būlī ng'wene ūyūnīlīīla mulungu wakwe. Bandya kūyūponanja nī miligo yabo mu nyanza gīkī bīgeheje ī meeli ū būdito. Alīyo ū Yona walī wingīla mu gatī ya meeli kū sīlīlī; ūūkalaala ūbītwa tūlo.

⁶Ū ntaale wa meeli ūnsanga koi ūūkang'wīla, “Bebe walaalaga būlī? Būūkaga ūnīlīīle nang'ho ū mulungu wako! Hamo akūtwiganikīla tūtizūshila.”

⁷Hūna a batūmami ba mu meeli biwīla, “Bing'we tūtūlījagi mbale tūbone ūyo owenhelejaga ū būbi wenūbū.” Būūtūlīja mbale, yūngwīla Yona.

⁸Būmūja, “Bebe alitūwīlage, nani ū wenhelejaga tūgwīlwe mayanga galī gīkī? Ūkīītaga nīmo kī? Ūlīfuma halī? Ī sī ya fumo yako sī kī? Na a banhū bako ni banhū kī?”

⁹Ūbashokeja, “Nalī Ng'hebulania, na nalī namya o ng'wa SEEBA Mulungu wa ng'wigūlū, ū meeja wa nyanza na sī.”

¹⁰Ū mhayo gwenūyo gūkabogohya no, būmūūja; “Wītaga mhayo kī ū gwenūyū?” (Bakadeeba gīkī wampeelaga SEEBA, nguno akasangwa wamala kūbawīla chene.)

¹¹Ī likanza lyenīlo ī nyanza yongeja ū kūsala; hūna būmūūja, “Tūkwītīle mhayo kī ī nyanza ītūlembeelele?”

¹²Ūbashokeja, “Nisolagi muniponeje mu nyanza, īkūlembeela dūhū. Namanile ū nyaga ū ntaale gwenūyū gwang'wikīīlaga kūlwa nguno ya būhūbi bone.”

¹³Alīyo a banhū benabo bakagema no no no kūbuga na ngahi bo nguzu, balīshoka kū sī nūūmu. Kwike būlemeelwa, nguno ī nyanza īkongeja ū kūsala kūtinda ūmo yalī a ha wandījo.

¹⁴Hūna būnīlīīla ū SEEBA balīhaya, “Ee SEEBA, tūlīkwikūmbīlīja tūtizūcha kūlwa kūwīnja ū būpanga bo munhū ng'wenūyū. Ūtizūtūbala gīkī twabūlaga munhū atī na shilingo; nguno bebe ng'wenekīlī Ee SEEBA, wītaga ūmo ūtogelilwe.”

¹⁵Hanuma ya henaho būnsola ū Yona būmponya mu nyanza, ī nyanza īyo yalī yasala yūlembeela sele sele.

¹⁶Ū mu mhayo gwenūyū bakang'ogoha no ū SEEBA, būmfunīja shitambò ū SEEBA, biyilahīja kūlī we.

¹⁷Alīyo ū SEEBA walī wenha ndīlo nhaale yūmila ū Yona. Ū Yona akikala ū mu nda ya ndīlo yenīyo shikū idatū līīmi na būjikū.