Read Sukuma Bible 2015 – Bibilia Ilagano Lya Kale 2015 Yona 2 Bible Online

Yona 2 - Sukuma Bible 2015 – Bibilia Ilagano Lya Kale 2015 bible

Yona 2

¹Ū Yona aho alī mu gatī ya ndīlo akanomba ū SEEBA Mulungu wakwe.

²Ūhaya gīkī, “Ū mu būluhi bone nakang'witana ū SEEBA, nag'hwe ūniidīka. Naalī mu shigila shishimu[1] nūhīlīka nalīlomba kūgunwa, nang'ho ūūkwigwa ū kūlīla kwane.

³Ūkaniponya mu būjiba būshimu, ningīla mu ng'holò ya nyanza, minzī mingī gūnipīndya hose hose; a mahuuli gako na būtaale waago gūhuuyemba higūlya yane.

⁴Niwīla, ‘Naapejiagwa ū kū būtongi wako; kwike nakwībona hangī dūhū Ī hekalu yako neela.’

⁵Būjiba būkanilibīja, a minzī ayo gaalī ganipīndije gūyūnikaba, ū ntwe gwane gwilingīīlwa maleewe ga mu minzī.

⁶Nakanwela nwe nūkashika kū miji ya ngūlū, ī sī ya mu gatī yūnilugalīla ilalī. Alīyo Ee SEEBA Mulungu wane, ū bebe ūwenha ū būpanga bone kūfuma ū ng'wichongo.

⁷Ū būpanga wane aho wandya kūshila nakakwizūkwa SEEBA, ū kūlomba kwane kūūlinha kwizile kūlī bebe; kūūshika kū hekalu yako neela.

⁸Abo bakadimanaga na mashiikolile gatī na solobo, bakajimīījaga shigongo Īsho shilīho kūlwa nguno yabo.

⁹Alīyo ū nene nakwīmba lyīmbo lya kūkūlūmba, hangī nakūkūfunīja shitambò. Nakwīshikīlīja īyo nīyilahīla. Ū būpīji būfumile kūlī SEEBA.”

¹⁰Ū SEEBA wīlagīla ī ndīlo yūnūka ū Yona hasī nūūmu.