Read Sukuma Bible 2015 – Bibilia Ilagano Lya Kale 2015 Yona 4 Bible Online

Yona 4 - Sukuma Bible 2015 – Bibilia Ilagano Lya Kale 2015 bible

Yona 4

¹Alīyo ū Yona atayegile nūūlū hado, hangī ūsaaya no.

²Ūnomba ū SEEBA alīhaya, “Ee SEEBA, ū mhayo gwenūyū natagūhayile aho nataalī kaya? Nguno h'ī chene nakangūha nū kūpeelela ī Talishishi. Naalī namanile gīkī ū bebe ūlī Mulungu wa shigongo na nsaatwa wa banhū, hangī ūlī ndīzu nū kūpelana, hama ookalile būtogwa, ūlī Mulungu nekeja wa būbi ūbo ūbūhelile kūbatūmīla bahūbi.

³Alilūūlū SEEBA, nalīkūlomba ūnīngīje ū būpanga bone, nguno īlī hambū hambū nache dūhū ū nene kūtinda kwikala nalī mpanga.”

⁴Nang'hwe ū SEEBA ūnshokeja, “Ū bebe ūlībona ūlīta chiza ū kūpelana?”

⁵Ū Yona ūfuma ūūkigasha hanze kwipandī ilebe kū kīya ya nzengo; wibeegeja ibebete lya kūnshīkīja līīmi, hūna wigasha ū mu mbeho yalyo ūlindīīla abone īyo īlagūgwīle ū nzengo.

⁶Ū SEEBA Mulungu ūzwisha līkasaala saala lya madūūtū mingī, lyūkūla a higūlya y'ibebete lya ng'wa Yona ūpandīka mheho soga no, yūngeheja a makoye ga kūpya līīmi ū ntwe; ū Yona ūyega no kūlwa līkasaala saala lyenīlo.

⁷Alīyo ū mu dilū a ha ntondo yaho, ū Mulungu ūlagīja igino; lyūlīluma ī līkasaala saala lyenīlo lyūnyaala.

⁸Ī līīmi aho lyafuma, ū Mulungu wenha nyaga gwa kīya nsebu; ī līīmi lyūmbiisha no ū Yona ū ntwe bbihī na kūngumīla. Wilombela kūcha; ūhaya, “Hambū hambū nache dūhū ū nene kūtinda kwikala nalī mpanga.”

⁹Alīyo ū Mulungu ūnshokeja, “Ū bebe ūlībona ūlīta chiza ū kūpelana kūlwa nguno ya līkasaala saala?” Ū Yona ūshosha, “Ka gete; nīyo hangī naapelanaga no, namalīīlile nūūlū kūcha.”

¹⁰Ū SEEBA ūnshokeja alīng'wīla, “Ū bebe ūlīlīsaatwa līkasaala saala alīyo nū kūlīhamba ūtalīhambile, nūūlū kūlyītīla mhayo gose gose gwa kūlyīta līkūle yaya. Lyazwile lyoi dūhū lūshikū lūmò ha ntondo yaho lyūcha.

¹¹Al'ī Ninawi īkī īlī na banhū bakīlile ha shihūmbī igana na makūmi abīlī, abo batī nabūdūla bo kūmana mhayo gwa kū būlyo nūūlū kū lūmoso lwabo; hama jilīmo na ng'ombe ningī dūhū, nibūlī natizūgūsaatwa ū nzengo gwenūyo na būtaale waago gīko?”