Read Sukuma Bible 2015 – Bibilia Ilagano Lya Kale 2015 Kūbala 13 Bible Online

Kūbala 13 - Sukuma Bible 2015 – Bibilia Ilagano Lya Kale 2015 bible

Kūbala 13

¹Ū SEEBA ūng'wīla ū Musa gīkī,

²“Tūmaga banhū baje bakīīdate ī sī ya Kanani, īyo nalībinha Baisilaeli; ūtūme ntongeeji ūmò ūmò kūfuma mu būlī lūganda.

³Ī likanza lyenīlo a Baisilaeli baalī ng'witogolo lya Palaani, na lūūlū ū Musa ūbatūma a banhū benabo, gīt'ūmo akalagīīlīlwa na SEEBA. A benabo pye baalī batongeeji ba Baisilaeli.

⁴A mina gabo gaalī aya: ‘Ū mu lūganda lwa ng'wa Lubeni Shamua ng'wana Zakuli;

⁵ū mu lūganda lwa ng'wa Simioni Shafati ng'wana Hooli;

⁶ū mu lūganda lwa ng'wa Yuda Kelebu ng'wana Yafune;

⁷ū mu lūganda lwa ng'wa Isakaali Igalī ng'wana Yosefu;

⁸ū mu lūganda lwa ng'wa Efulaimu Hoshea ng'wana Nuni;

⁹ū mu lūganda lwa ng'wa Benjamini Paliti ng'wana Lafu;

¹⁰Ū mu lūganda lwa ng'wa Zabuloni Gadieli ng'wana Sodi;

¹¹ū mu lūganda lwa ng'wa Manase (lwa ng'wa Yosefu) Gadi; ng'wana Sodi;

¹²ū mu lūganda lwa ng'wa Dani Amieli ng'wana Gemali;

¹³ū mu lūganda lwa ng'wa Asheli Setuuli ng'wana Mikaeli;

¹⁴ū mu lūganda lwa ng'wa Nafutali Nabbī ng'wana Voosi;

¹⁵ū mu lūganda lwa ng'wa Gadi Geūli ng'wana Maaki.’”

¹⁶A genaya hū mina ga bagosha abo Musa akabatūma kūja kwīdata ī sī. (Ū Musa ūng'winha ū Hoshea ū ng'wana Nuni, lina lya Yoshwa.)

¹⁷Ū Musa aho alībatūma ū kūja kwīdata ī sī, akabawīla, “Linhagi ū kū sī ja magūlya, mubītīle ng'witogolo lya Negevu.

¹⁸Muje mukīlole chiza ī sī, ng'wībone ūmo īlī, mubabone na a banhū ba kwene ūmo balī; ūlū balī na nguzu nūūlū bagokolo gokolo; ūlū balī bingī nūūlū bageehu.

¹⁹Ng'wīlole chiza ī sī yabo īyo bakwikalaga ng'wībone ūmo īlī, ūlū yawiza nūūlū yabūbi. Nī mizengo yabo ūmo bakwikalaga ng'wīlole, ūlū īlī hape dūhū, nūūlū īzengeelilwe ndugu.

²⁰Ng'wīlole ī sī yenīyo ūlū ya lūtongo nūūlū ng'halamuku. Mubone ūlū īlī na mitī nūūlū īlī buyīīkī. Ītagi nyagosha ng'wenhanīje na matwajo gayo ī sī yenīyo.” (Ī likanza lyenīlo lyalī matwajo ga mizabibu ga būtongi.)

²¹Na ng'hana būguumha bajile, bandya ū kwīdata ī sī kwandīja ng'witogolo lya Zini, kūshisha Lehobu, kūīlīīla Hamaati.

²²Būūlinha bajile būbīta Negevu, būūkashika Hebuloni, ūko bikalaga ba Ahima, Sheshai na Talimai banhū ba shibyalīlwe sha ng'wa Anaki. (Ī Hebuloni yalī nhongi ū kūzengwa, myaka mpungatī kū būtongi wa nzengo gwa Zoa ya Misili.)

²³A badati benabo aho baashika ng'wilago lya Eshikoli, būbbuta itambī līlī na nkūngo gwa mizabibu. Banhū babīlī būgwipanja kūgūbūūcha ha ngamba; būsola na makomamanga, hamò na matwajo ga tini.

²⁴Ī lilago lyenīlo līkilīkwa lina lya Eshikoli nguno ya nkūngo gwa mizabibu ūyo bakagūbbuta a Baisilaeli kūfuma ko ū kwenūko.

²⁵Būūmala ko shikū makūmi anè bakwīdataga ī sī, hūna būshoka.

²⁶Būūshika ī Kadeeshi ū ng'witogolo lya Palaani, ūko walī ū Musa nū Alooni, būbasomboolela īyo bakībona. H'ūko baalī na a Baisilaeli a bangī pye; nabo būbinha ī mhola jenījo, būboolekeja na a matwajo ga sī yenīyo.

²⁷Būng'wīla ū Musa, “Twashikile ū kū sī īyo ūkatūtūma, na ng'hana ī sī yenīyo ya būhondo![5] Gaya a matwajo ga kwene.

²⁸Kwike a mamunhū ga kū sī yenīyo, galī na nguzu no; nī mizengo īpīndīlījiwe ndugu, hama mitaale no. Na a ming'wana ga lūdūgū lwa ng'wa Anaki galīko twagabonile.

²⁹Ū ng'witogolo lya Negevu gakikalaga mo Maamaleki; ū kū sī ja magūlya ū kwene bakikalaga Bahītī, Bayebusi, na Baamoli. A Bakanani a bene bakikalaga kū ng'hilimva na nyanza, na mu mbalama ya mongo gwa Yolodani.”

³⁰Hūna ū Kelebu ūbahuumūja a banhū ū kū būtongi bo ng'wa Musa ūhaya, “Tūjagi ko tūkīsole ī sī yenīyo, nguno tūdūgije kūgwīta ū mhayo gwenūyo.”

³¹Alīyo a banhū abo baalī baaja nang'hwe būhaya, “Tūtūdūla ū kūlwa nago a ming'wana genayo, nguno galī na nguzu no kūtūheeba a bise.

³²Būūbība mihayo misūūku yabūbi no ū mu Baisilaeli, ī ya kwīnga ū kū sī īyo baalī baaja kwīdata. Būūhaya, ‘Ī sī īyo twalī twajile kwīdata īkabalyaga a banhū bayo! A mamunhū ga kwenūko ayo twagabonile pye madaaji kībi no;

³³na Manefili galīko (a ga kūfuma mu shibyalīlwe sha ng'wa Anaki, ūyo būbyīle wakwe būfumile kū Manefili.) Nīyo a bise twalibonaga gītī tūlī tūkūmbī dūhū; na a gene hū ūmo gaalūtūbonelaga a bise!’”