Read Sukuma Bible 2015 – Bibilia Ilagano Lya Kale 2015 Kūbala 17 Bible Online

Kūbala 17 - Sukuma Bible 2015 – Bibilia Ilagano Lya Kale 2015 bible

Kūbala 17

¹Hūna ū SEEBA ūng'wīla ū Musa gīkī,

²“Bawīlage a Baisilaeli bakwinhe milang'ha ikūmi na ībīlī; būlī ntaale wa lūganda nang'ha gūmò. Hama būlī ng'wene ūlyandīke ī lina lyakwe a ha nang'ha gwakwe.

³Ū nang'ha gwa lūganda lo Lawī gwandīkage lina lya ng'wa Alooni; nguno shiigelile gūbize nang'ha gūmò dūhū kūlwa būlī lina lya ntaale wa lūganda.

⁴Hanuma ī milang'ha yenīyo ūkwītūūla ng'wiheema lya kwibilingīla, kū būtongi w'isandīko lya būkaanīji, aho nakamanhījaga nang'ho.

⁵Ū nang'ha gwa munhū ūyo nalansole gūkūfuluma gwīte madūūtū; na lūūlū ū mu nzīla yenīyo nakūwīnja ū būdugumi wa Baisilaeli ūmo bakwikalaga būkūdugumīla gwa gwa gwa.”

⁶Ng'hana ū Musa ūbawīla a Baisilaeli, hūna a batongeeji babo būng'winha milang'ha ikūmi n'ībīlī, būlī ntaale wa lūganda nang'ha gūmò; nū go ng'wa Alooni gūbiza mo ū mu milang'ha yenīyo.

⁷Ī milang'ha yenīyo ū Musa ūkītūūla ng'wiheema lya būkaanīji, kū būtongi bo ng'wa SEEBA.

⁸A ha ntondo yaho wahayingīla ū Musa ū ng'wiheema lya būkaanīji, ūgūbona ū nang'ha go ng'wa Alooni, ūyo gwalī gwa lūganda lo Lawī, gwasongaga madūūtū gūūkīīta na būlabo, gūūtwaja na matwajo ga lozi.[8]

⁹Na lūūlū ū Musa wīsola pyī ī milang'ha yenīyo, ūyīnja ū kū būtongi bo ng'wa SEEBA; wahayūyenha ū kū Baisilaeli a bose, būyīlola lola, hūna būlī munhū ūsola nang'ha gwakwe.

¹⁰A henaho ū SEEBA ūng'wīla ū Musa, “Ū nang'ha go ng'wa Alooni gūshoshage, ūkagūtūūle kū būtongi w'isandīko lya būkaanīji. Gūkūlang'hanwa henaho kūlwa būkaanīji ū kū banhū abo bakwikalaga beenha būgomi. Ū mhayo gwenūyū gūkūbalanga booye ū kwikala būnidugumīla, batizūūshila kūcha.”

¹¹Ū Musa wīta gīt'ūmo SEEBA akanagīīlīla.

¹²Hūna a Baisilaeli būng'wīla ū Musa, “Tūkūcha! Pye tūlīshila, pye tūshilile!

¹³Nguno būlī ng'wene akūchaaga dūhū ūlū walyegeela ī lipandī lya kwikala lya ng'wa SEEBA. Tūtūūshila kūcha pye ahene?”