Read Sukuma Bible 2015 – Bibilia Ilagano Lya Kale 2015 Kūbala 19 Bible Online

Kūbala 19 - Sukuma Bible 2015 – Bibilia Ilagano Lya Kale 2015 bible

Kūbala 19

¹Ū SEEBA ūbawīla a ba Musa nū Alooni,

²“Aya galī malange ayo SEEBA wagatūūlile kūlenganīla na shilagīlo shakwe: Bawīlage a Baisilaeli gīkī, bakūkwenhela ng'ombe yaza, ndogoosa ītī na shilingo nūūlū būka; nīyo ītaalī nūūlū kūtungīlījiwa ijoki lya kūlīmīla.

³Ī ng'ombe yenīyo akwinhwa ngabīji Elieza, īīfunye hanze ya ng'hambī īkasīnzwe nang'hwe alīho hoi.

⁴Hūna ū Elieza akūsola mininga gayo magehu ūbyūdabbya mo lwala lwakwe wagasaamula kū būtongi wiheema lya kwibilingīla, kūshisha ng'hangala mpungatī.

⁵Hanuma ya henaho, ī ndogoosa yenīyo īkūpemva mu moto pyī ī yose nū wei alīho hoi, līkūpemva ī likūnza lyayo nī nyama, na a mininga gayo, pye nū būūshi.

⁶Hūna ū ngabīji akūsola ntī gwa nkoola, na itambī lya hisopo, na būlūba waza; ūshiponeja a ha mimba gwa ng'ombe īyo īlīpemva mu moto.

⁷Hanuma ya henaho ū ngabījai akūfula ī shizwalo shakwe, nū mīlī gwakwe ooga mu minzī. Ī likanza lyenīlo adūgije kūshoka ū kū ng'hambī; alīyo akūbalwa alī na būsoso kūshisha līīmi kūlibīla.

⁸Nū munhū ūyo alīyīpemba ī ndogoosa yenīyo, akūfula ī shizwalo shakwe, ooga nū mīlī mu minzī; nang'hwe akūbalwa kūbiza nsoso kūshisha līīmi kūlibīla.

⁹A mabu ga ndogoosa yenīyo gakūyoolwa na munhū ūyo atī na būsoso, ūūkagaponya hanze ya ng'hambī, ūko mabū gakaponejiagwa. A Baisilaeli bakūgalang'hana chiza a mabu genayo, nguno gakūbiza ga kūyūsanjiwa mu minzī ayo gakatūmamīlagwa mu nīmo gwa kweeja būsoso wa banhū kūfuma mu shibi.

¹⁰“Ū munhū ūyo alagayoole a mabu ga ndogoosa genayo akūfula ī shizwalo shakwe; nang'hwe akūbalwa kūbiza nsoso kūshisha līīmi kūlibīla. Ī shenīshi shilī shilagīlo sha būja na būja kūlwa Baisilaeli bose; a baana byalwa na a bageni abo bakwikalaga hamò nabo.

¹¹Ose ose ūyo ūskuumya mimba gwa munhū, akūbalwa kūbiza nsoso kūshisha ikanza lya shikū mpungatī.

¹²Ū munhū wa gīko akūgatūmamīla a minzī genayo kwiyeeja, ū gwenūyo akūgwīta ha lūshikū lwa kadatū lwaho, nū lwa mpungatī, hūna ūbiza wela. Alīyo ūlū ūleka kwiyeeja ū mu lūshikū ū lwa kadatū nū lwa mpungatī, atīnga ū mu būsoso wakwe.

¹³Ū wa kūkuumya mimba gwa munhū hūna ūleka kwiyeeja, akūbiza alīlīsosohaja ī lipandī lya kwikala lya ng'wa SEEBA. Ū ng'wenūyo akūkomanyiwa wīnjiwe ū mu Baisilaeli. Nguno nsoso, ataseeseebelilwe a minzī ga kūng'weeja; akwikala nabo ū būsoso wakwe.

¹⁴Ūlū munhū ūcha alī ng'wiheema, ī shilagīlo sha kūmutongeela shiishi: Ose ose ūyo wingīla ū ng'wiheema lyenīlo, akūbiza na būsoso kūshisha ikanza lya shikū mpungatī, pye nūūlū ūyo ūsangwa alīmo ū ng'wiheema.

¹⁵Na būlī shiseme īsho shilīmo ū mu kaya ūlū shitī na ikundīkījo shikūbalwa kūbiza shisoso.

¹⁶Nūūlū alī kū malaale ū munhū akūbalwa kūbiza nsoso kūshisha ikanza lya shikū mpungatī, ūlū ūkuumya mimba gwa mhunhū, abize wabūlagagwa bo līlūshū, nūūlū wachaaga dūhū gīt'ūmo banhū bakachīlaga na kale; nūūlū ūkuumya iguha lya munhū achile, nūūlū ūkuumya shigila.

¹⁷Ūlū munhū ūsosohala, solaga mabu mageehu a ga ndogoosa īyo īkapemva mu moto, ūgatūūle mu shiseme; hūna ūgītīīle minzī ga kwīnga mu mongo gwa kūhūūma.

¹⁸“Hama munhū ūyo atī na būsoso akūsola itambī lya hisopo, ūlīdabbya ū mu minzī genayo, hūna ūlīseeseebela ī liheema nī shiseme shaamo, pye na a banhū abo baalīmo ū lūshikū lwenūlo; nūūlū munhū wakuumyaga iguha lya munhū, nūūlū ūyo wakuumyaga shigila, nūūlū wankuumyaga munhū achile, ībize kūlwa kūbūlagwa na munhū ūngī, nūūlū wachaaga lūfu dūhū.

¹⁹A a ha lūshikū lwa kadatū na lwa mpungatī, munhū ūyo atī na būsoso akūnseeseebela ūyo alī na būsoso; hama a ha lūshikū lwa mpungatī ūng'weeja. Ū munhū ūyo aleejiwa akūshifula ī shizwalo shakwe, hūna ooga mu minzī, hanuma ū lūshikū lwenūlo kwandīja ikanza lya mhīndī, ūbalwa kūbiza ng'wela.”

²⁰“Alīyo ū munhū ūyo alī na būsoso ūlū ūleka ū kwiyeeja, akūkomanyiwa wīnjiwe ū mu banhū; nguno walīsosohajaga ī lipandī lyeela lya ng'wa SEEBA. Ataseeseebelilwe a minzī ga kweeja banhū, na lūūlū alī na būsoso.

²¹Ī shenīshi shilī shilagīlo sha būja na būja kūlwa nguno yabo. Ūyo alīnseeseebela minzī ng'wiye nang'hwe akūfula ī shizwalo shakwe; na būlī ng'wene ū wa kūgakuumya a minzī ga kweeja banhū akūbiza na būsoso kūshisha līīmi kūlibīla.

²²Na būlī shikolo īsho ūshikuumya munhū ūyo alī na būsoso, shikūbiza shisoso, na būlī ng'wene ūyo ūshikuumya ī shikolo shenīsho, nang'hwe akūbiza nsoso kūshisha līīmi kūlibīla.”