Read Sukuma Bible 2015 – Bibilia Ilagano Lya Kale 2015 Kūbala 2 Bible Online

Kūbala 2 - Sukuma Bible 2015 – Bibilia Ilagano Lya Kale 2015 bible

Kūbala 2

¹Ū SEEBA ūbawīla a ba Musa nū Alooni gīkī,

²“A Baisilaeli shibigelile kūtūūla ī ng'hambī jabo kūlīpīndya ī liheema lya kwibilingīla. Kwike babize ka kūle ho nalyo, būlī ng'wene ha sīlīlī ya lūbembeela lwa lūganda lwakwe, na ha lūbembeela lwa bakūlūgenji ba numba ya ng'wawe.

³Ū kwipandī lya Kīīya, ū kū būfuma līīmi, gakūbiza ko mabità ga ng'hambī ya lūganda lo Yuda; bakūtūūla ī ng'hambī jabo ha sīlīlī ya lūbembeela lwabo. Ū ntongeeji wa banhū ba lūganda lwenūlo Nashoni, ng'witūnja o ng'wa Aminadabu.

⁴Ī libità lyakwe līlī na banhū shihūmbī makūmi mpungatī na shinè, na magana atandatū.

⁵Lūganda lo Isakaali lūkūtūūla ng'hambī kwihela nabo; ū ntongeeji wa banhū ba lūganda lwenūlo Netaneli ng'witūnja o ng'wa Zuali.

⁶Ī libità lyakwe līlī na banhū shihūmbī makūmi atanò na shinè, na magana anè.

⁷“Lūganda lo Zabuloni lūkūtūūla ng'hambī kwihela nabo; ū ntongeeji wa banhū ba lūganda lwenūlo Eliabu, ng'witūnja o ng'wa Heloni.

⁸Ī libità lyakwe līlī na banhū shihūmbī makūmi atanò na mpungatī, na magana anè.

⁹A bagosha pye abo bahelilwe kūbiza ha sīlīlī ya ng'hambī ya lūganda lo Yuda, ū kūlondeela mabità gabo baalī banhū shihūmbī igana na makūmi anaane na shitandatū, na magana anè. A benabo hū bakūyūtonga ū kūbūūka ū lūgendo.

¹⁰Ū kwipandī lya Dakama gakūbiza ko mabità ga ng'hambī ya lūganda lo Lubeni, ha sīlīlī ya lūbembeela lwabo. Ū ntongeeji wa banhū ba numba ya ng'wa Lubeni, Elizuli ng'witūnja o ng'wa Shedeuli.

¹¹Ī libità lyakwe līlī na banhū shihūmbī makūmi anè na shitandatū, na magana atanò.

¹²Lūganda lo Simioni lūkūtūūla ng'hambī kwihela nabo; ū ntongeeji wa banhū ba numba ya ng'wa Simioni, Shelumieli ng'witūnja o ng'wa Zulishadai.

¹³Ī libità lyakwe līlī na banhū shihūmbī makūmi atanò na kenda, na magana adatū.

¹⁴“Ū lūganda lo Gadi lūkūtūūla ng'hambī kwihela nabo; ū ntongeeji wa banhū ba lūganda lwenūlo Eliasafu, ng'witūnja o ng'wa Deūli.

¹⁵Ī libità lyakwe līlī na banhū shihūmbī makūmi anè na shitanò, na magana atandatū na makūmi atanò.

¹⁶A bagosha pye abo bahelelilwe kūbiza ha sīlīlī ya ng'hambī ya ng'wa Lubeni, ū kūlondeela mabità gabo baalī banhū shihūmbī igana na makūmi atanò na shimò, na magana anè na makūmi atanò. A benabo hū bakūbiza ba kabīlī ū kūbūūka a h'ikanza lya kwandya lūgendo.

¹⁷Hanuma ya henaho ī liheema lya kwibilingīla nī ng'hambī ya Balawī shikwandya ū lūgendo ha gatī ya ng'hambī jenījo. Bakwandya ū lūgendo mu kaīle gīt'ūmo balaajitūūlīle ī ng'hambī jabo. Būlī ng'wene h'ipandī lyakwe, ha sīlīlī ya lūbembeela lwakwe.

¹⁸Ū kwipandī lya Ng'weli gakūbiza ko mabità ga ng'hambī ya ng'wa Efulaimu, ha sīlīlī ya lūbembeela lwabo. Ū ntongeeji wa banhū ba lūganda lwenūlo Elishama, ng'witūnja o ng'wa Amihudi.

¹⁹“Ī libità lyakwe līlī na banhū shihūmbī makūmi anè, na magana atanò.

²⁰Lūganda lo Manase lūkūtūūla ng'hambī kwihela nabo; ū ntongeeji wa banhū ba lūganda lwenūlo Gamalieli, ng'witūnja o ng'wa Pedazuli.

²¹Ī libità lyakwe līlī na banhū shihūmbī makūmi adatū na shibīlī, na magana abīlī.

²²Lūdanga lwa ng'wa Benjamini lūkūtūūla ng'hambī kwihela nabo; ū ntongeeji wa banhū ba lūganda lwenūlo Abidani, ng'witūnja o ng'wa Gidioni.

²³Ī libità lyakwe līlī na banhū shihūmbī makūmi adatū na shitanò, na magana anè.

²⁴A bagosha pye abo bahelelilwe kūbiza ha sīlīlī ya ng'hambī ya ng'wa Efulaimu, ū kūlondeela mabità gabo baalī banhū shihūmbī igana na shinaane, n'igana līmò. A benabo bakūbiza ba kadatū a ha kwandya lūgendo.

²⁵Ū kwipandī lya Sukuma gakūbiza ko mabità ga ng'hambī ya banhū ba numba ya ng'wa ng'wa Dani, ha sīlīlī ya lūbembeela lwabo. Ū ntongeeji wa banhū ba lūganda lwenūlo Ahiezeli, ng'witūnja o ng'wa Amishadai.

²⁶Ī libità lyakwe līlī na banhū shihūmbī makūmi atandatū na shibīlī, na magana mpungatī.

²⁷Lūganda lo Asheli lūkūtūūla ng'hambī kwihela nabo; ū ntongeeji wa banhū ba lūganda lwenūlo Pagieli, ng'witūnja o ng'wa Okilani.

²⁸“Ī libità lyakwe līlī na shihūmbī makūmi anè na shimò, na magana atanò.

²⁹Lūganda lo Nafutali lūkūtūūla ng'hambī kwihela nabo; ū ntongeeji wa banhū ba lūganda lwenūlo Ahila, ng'witūnja o ng'wa Enani.

³⁰Ī libità lyakwe līlī na banhū shihūmbī makūmi atanò na shidatū, na magana anè.

³¹A bagosha pye abo bahelelilwe kūbiza ha sīlīlī ya banhū ba numba ya ng'hambī ya ng'wa Dani, ū kūlondeela mabità gabo, baalī banhū shihūmbī igana na makūmi atanò na mpungatī, na magana atandatū. A benabo bakūbiza baa kūmalīīja a ha kwandya lūgendo; nabo bakūbūūka balī ha sīlīlī ya lūbembeela lwabo.

³²A benaba h'a Baisilaeli abo bakabalwa kūlenganīla na ng'anda jabo. Pye abo baalī mu ng'hambī kūlenganīla na a mabità gabo baalī banhū shihūmbī magana atandatū na shidatū, na magana atandatū.

³³Kwike a Balawī batabalanījiwe ū mu Baisilaeli a bangī, ū SEEBA h'ū mumo walī wanagīīlīla ū Musa.

³⁴Hūna lūūlū a Baisilaeli bīīta pyī īyo SEEBA walī wanagīīla ū Musa; ī ng'hambī jabo būjitūūla gīko, kūloondeela mbembeela jabo. Nūūlū babūūka lūgendo h'ūmo bīītīlaga, būlī bene mu lūganda lwabo na numba ya bakūlūgenji babo.”