Read Sukuma Bible 2015 – Bibilia Ilagano Lya Kale 2015 Kūbala 3 Bible Online

Kūbala 3 - Sukuma Bible 2015 – Bibilia Ilagano Lya Kale 2015 bible

Kūbala 3

¹Īyī īlī mihayo ya shibyalīlwe sha ng'wa Alooni na Musa ūmo shaalī mu shikū ījo SEEBA walūngalūngaga na Musa mu lūgūlū lwa Sinai.

²A mina ga bitūnja ba ng'wa Alooni gaalī aya: Nadabu myalwa wa kwandya, na Abihu, Eliezeli na Itamaali.

³A mina genaya ga bitūnja ba ng'wa Alooni abo baalī bitīīlwa maguta, būtūūlwa ha nīmo gwa būgabīji.

⁴Kwike aho balī ng'witogolo lya Sinai a Baisilaeli, ū Nadabu nū Abihu bakenha shakwinha kū būtongi bo ng'wa SEEBA, būchīla henaho; nguno bakatūmamīla moto ngeni. Baalī batī na bitūnja, na lūūlū abo bakatūmama nīmo gwa būgabīji mu shikū ja būlamu bo ng'wa saabo ū Alooni, baalī ba Eliezeli na Itamaali.

⁵Hūna ū SEEBA ūng'wīla ū Musa gīkī,

⁶“A Balawī benhage kū būtongi bo ng'wa Alooni ū ngabīji ūbatūūle ha nīmo gwa kūyūngunanha.

⁷A benabo bakūbiza na nīmo gwa kūyūngunanha ū Alooni ū ng'wiheema lya kwibilingīla, nū kūbagunanha a banhū a bose ū ng'wiheema.

⁸Hū bene bakūbiza balang'hani ba shiseme shose ī sha ng'wiheema lya kwibilingīla, na batūmami ba milīmo ū ng'wiheema lyenīlo kūlwa kwīshikīlīja pyī īyo Baisilaeli bahelelilwe.

⁹Na lūūlū, a Balawī batūūlage mu nkono go ng'wa Alooni na bitūnja bakwe; a benabo hū bene a Baisilaeli abo shiigelile batūūlwe mu nkono gwakwe mu būshikanu bose.

¹⁰Alīyo a ha nīmo gwa būgabīji, ūkūntūūla Alooni na bitūnja bakwe dūhū, ūlū ūngī ose ose wegeela a h'ipandī lyeela shiigelile abūlagwe.”

¹¹Ū SEEBA ūng'wīla ū Musa hangī gīkī,

¹²“A Balawī naabasolile ū mu Baisilaeli ha ng'wanya gwa babyalwa ba kwandya a bagosha, abo bakūbyalwa na bakīma ba mu Isilaeli. A Balawī balī bane,

¹³nguno pye a babyalwa ba kwandya balī bane. Aho nakababūlaga a babyalwa ba kwandya ba bana Misili, pye a babyalwa ba kwandya nakabīīta kūbiza bane, babize ba banhū, nūūlū mbyalwa ja kwandya ū mu mitugo; a benabo balī bane. Ū nene nalī SEEBA.”

¹⁴Aho balī ū ng'witogolo lya Sinai, ū SEEBA akang'wīla ū Musa gīkī,

¹⁵“Babalage a Balawī kūlenganīla na numba jabo na ng'anda jabo. Pye a bagosha babalage, kwandīja wa ng'weji gūmò kūja kū būtongi.”

¹⁶Na ng'hana ū Musa ūbabala gīt'ūmo akalagīīlīlwa na mhayo go ng'wa SEEBA.

¹⁷A mina ga bitūnja ba ng'wa Lawī gaya, Gelishomu, Kohati, na Melali.

¹⁸Aya gene mina ga bataale mu lūganda lwa ng'wa Gelishomu, Libini na Shimei.

¹⁹A ba numba ya ng'wa Kohati bene ba, Amulamu, Izihaali, Hebuloni na Uzieli.

²⁰A ba numba ya ng'wa Melali bene ba, Mahili na Mushi. Ī jenīji hū jene ī ng'anda ja Balawī kūlenganīla na numba jabo.

²¹Ū mu lūganda lwa ng'wa Gelishomu baalīmo ba mita go ng'wa Libini na go ng'wa Shimei. A benaba hū baalī ba numba ya ng'wa Gelishomu.

²²Ī lisaabu lya bagosha pye abo bakabalwa kwandīja ba ng'weji gūmò kūja kū būtongi, lyalī shihūmbī mpungatī na magana atanò.

²³Ī ng'hambī ya banhū ba numba ya ng'wa Gelishomu, īkahelwa gīkī īkūbiza kū lwande lwa Ng'weli, kū njingo gw'iheema.

²⁴Ū ntongeeji wa banhū ba numba ya ng'wa Gelishomu walī Eliasafu ng'witūnja o ng'wa Laeli.

²⁵A ba numba ya ng'wa Gelishomu, ī milīmo yabo ū ng'wiheema lya kwibilingīla yalī kūlīlang'hana ī lipandī lyenīlo, nī liheema hamò nī likundīkījo lyalyo, nī litundubaalī lya ha nyango gwa h'iheema lya kwibilingīla,

²⁶na a matundubaalī ga kūpīndīlīja gwalugwa, nī litundubaali lya ha nyango gwa ha gwalugwa īyo īlīpīndije ī liheema, nū ng'walīlo, nī ngoye; pyī nī shikolo ī shingī īsho shikatūmamīlagwa kū milīmo ya mbika yenīyo.

²⁷Ū mu lūganda lwa ng'wa Kohati baalīmo ba mita go ng'wa Amulamu na go ng'wa Izihaali na go ng'wa Hebuloni na go ng'wa Uzieli. A benaba hū baalī ba numba ya ng'wa Kohati.

²⁸Ī lisaabu lya bagosha pye abo bakabalwa kwandīja ba ng'weji gūmò kūja kū būtongi, lyalī shihūmbī shinaane na magana atandatū.

²⁹Ī ng'hambī ya banhū ba numba ya ng'wa Kohati, īkahelwa gīkī īkūbiza kū lwande lwa dakama lw'iheema.

³⁰Ū ntongeeji wa banhū ba numba ya ng'wa Kohati walī Elizafati ng'witūnja o ng'wa Ūzieli.

³¹Ū nīmo gwabo gwalī kūlang'hana isandīko, meeza, nī likīndīkīlo lya tala; myalīlo, shiseme sha ng'wipandī lyeela īsho shatūmamīlagwa ū mu milīmo ya būgabīji, nī litundubalī lya hisenge; pye nī shikolo ī shingī īsho shikatūmamīlagwa kū milīmo ya mbika yenīyo.

³²Ū ntongeeji ntaale wa Balawī walī Eliezeli, ng'witūnja wa ngabīji Alooni. Ū ng'wenūyo h'ūyo akasolwa kūbiza ntaale wa balang'hani b'ipandī lyeela.

³³Ū mu lūganda lo Melali baalīmo ba mita go ng'wa Mahili na go ng'wa Mushi. A benaba hū baalī ba numba ya ng'wa Melali.

³⁴Ī lisaabu lya bagosha pye abo bakabalwa kwandīja ba ng'weji gūmò kūja kū būtongi, lyalī shihūmbī shitandatū na magana abīlī.

³⁵Ū ntongeeji wa banhū ba numba ya ng'wa Melali walī Zulieli ng'witūnja o ng'wa Abihaili. Ī ng'hambī yabo īkahelwa gīkī īkūbiza kū lwande lwa Sukuma lwa ipandī lya kwikala.

³⁶Ū nīmo gwabo gwalī kūjilang'hana ī mbawa ja kūlyīmīlīkīja ī lipandī lya kwikala, nī papi jaho, nī ng'hīngī jaho, na a makīndīkīlo ga ng'hīngī; pye nī shikolo ī shingī īsho shikatūmamīlagwa milīmo ya mbika yenīyo.

³⁷Nī ng'hīngī ja kwīpīndīlīja ī gwalugwa, na a makīndīkīlo gaajo, nī mambo jaho, nī ngoye.

³⁸Ū Musa nū Alooni, na a bitūnja bakwe ū Alooni, ī ng'hambī yabo īkahelwa gīkī īkūbiza kū kīya y'iheema, kū būtongi w'ipandī lya kwibilingīla, ū kū būfuma līīmi. A benabo baalī na nīmo gwa kūlīlang'hana ī lipandī lyeela kūlwa Baisilaeli a bose. Ūlū ūngī ose ose wegeela a hipandī lyeela shiigelile abūlagwe.

³⁹Pye a Balawī ū mu ng'anda jabo, a bagosha a bose kwandīja ba ng'weji gūmò na kūja kū būtongi, abo bakabalwa na Musa na Alooni gīt'ūmo SEEBA akabalagīīlīla, baalī shihūmbī makūmi abīlī na shibīlī.

⁴⁰Hūna ū SEEBA ūng'wīla ū Musa, “Babalage pye a babyalwa ba kwandya ba Baisilaeli, kwandīja ba ng'weji gūmò na kūja kū būtongi; ūbandīke a mina gabo.

⁴¹Hanuma ūnikomanīje a Balawī a ha ng'wanya gwa babyalwa ba kwandya ba Baisilaeli; nī mitugo ja Balawī jibize ha ng'wanya gwa mbyalwa ja kwandya ū mu mitugo ja Baisilaeli. Ū nene nalī SEEBA.”

⁴²Na ng'hana ū Musa ūbabala pye a babyalwa ba kwandya ba Baisilaeli gīt'ūmo SEEBA akanagīīlīla.

⁴³Ī lisaabu lya babyalwa ba kwandya a bagosha ū mu Baisilaeli a bose abo bakandīkwa, kwandīja ba ng'weji gūmò na kūja kwigūlya, līkabiza shihūmbī makūmi abīlī na shibīlī, na magana abīlī na makūmi mpungatī na badatū.

⁴⁴Hūna ū SEEBA ūng'wīla ū Musa gīkī,

⁴⁵“Basolage a Balawī a ha ng'wanya gwa babyalwa ba kwandya ba Baisilaeli; nī mitugo ja Balawī ūjisole a ha ng'wanya gwa mitugo ja Baisilaeli. A Balawī bene balī bane.

⁴⁶A babyalwa ba kwandya ba Baisilaeli abo magana abīlī na makūmi mpungatī na badatū, abo bakakīlanīja a h'isaabu lya Balawī aho baabalwa, ūkūbakomoola

⁴⁷mu nzīla ya kūsoleleja shekeeli itanò tanò kūlwa būlī ūmò wabo, gīt'ūmo gūlī mpango gwa shekeeli ya ng'wipandī lyeela, īyo īlī na būdito wa gulamu ikūmi.

⁴⁸Ī hela ja kūkomoolwa kwa Baisilaeli abo baalī baakīlanīja ūkūng'winha Alooni na bitūnja bakwe.”

⁴⁹Ū Musa ūjisoleleja ī hela ja kūkomoolwa kūfuma ū kū banhū abo bakakīlanīja a h'isaabu lya banhū abo baalī bakomoolwa mu nzīla ya Balawī.

⁵⁰Ū kūfuma ū kū babyalwa ba kwandya ba Baisilaeli, akasoleleja feza ja būdito wa shekeeli shihūmbī shimò, na magana adatū na makūmi atandatū n'itanò, kūlenganīla na būdito wa shekeeli ya ng'wipandī lyeela.

⁵¹Ū Musa ūng'winha Alooni na bitūnja bakwe ī hela jenījo, gīt'ūmo walī walagīīlīlwa mu mhayo go ng'wa SEEBA.