Read Sukuma Bible 2015 – Bibilia Ilagano Lya Kale 2015 Kūbala 30 Bible Online

Kūbala 30 - Sukuma Bible 2015 – Bibilia Ilagano Lya Kale 2015 bible

Kūbala 30

¹Hūna ū Musa ūbawīla a batongeeji ba Baisilaeli, Ū SEEBA wafunije shilagīlo alīhaya gīkī,

²“Ūlū munhū ūfunya shilahīlo shose shose kūlī SEEBA, nūūlū witunga wei ng'wenekīlī mu mhayo nebe, atizūgalūcha maganiko, alīyo shing'wigeleelilwe kwīshikīlīja pyī īyo walahīla kwīyīta.

³Ūlū munhya ūfunya shilahīlo kūlī SEEBA, nūūlū witunga wei ng'wenekīlī mu mhayo nebe, alīyo ūbiza ataalī ha ng'wawe,

⁴hūna ū ise ūng'wigwa, kwike ūleka kūng'wīla mhayo gose gose, ū būlahīji wakwe ūbo wabūfunije īkūng'wigeleelwa kūbūshikīlīja; nūūlū ī mihayo īyo witungile wei ng'wenekīlī.

⁵Alīyo ū ise ūlū wīyigwa ī mihayo īyo walahīlaga nūūlū witungaga wei ng'wenekīlī muyo, hūna ūnemeja, ītūbiza na nguzu; ū SEEBA akūntaligūla nguno ū ise wang'hamaga.

⁶Ūlū ūtoolwa alīyo amalile kūfunya shilahīlo, nūūlū amalile kūhaya mhayo gose gose gwa kūntunga aho atamanile,

⁷hūna ū kū shikū ja kū būtongi ū ngoshi ūlū wīyigwa ī yenīyo alīyo ūhuumūla dūhū, ūleka kūhaya nūūlū mhayo gose gose; a henaho akwigeleelwa kūshishikīlīja ī shilahīlo shakwe, nūūlū ī mihayo īyo yītungile.

⁸Alīyo ū ngoshi ūlū wigwa hūna ūnemeja, ī shilahīlo shenīsho nūūlū ū mhayo ūyo witunga gwenūyo gūkūbiza gwamalagwa ī nguzu. Ū SEEBA akūntaligūla ū mu shilahīlo shenīsho.

⁹Ū nkīma ūyo atī na ngoshi kūlwa kūchīlwa, nūūlū kūlwa kūbūlaga numba, ūlū ūfunya shilahīlo shose shose, nūūlū mhayo gwa kūntunga, ī yenīyo īkūntunga wei ng'wenekīlī.

¹⁰Nū nkīma ūyo atoolilwe ūlū ūfunya shilahīlo, nūūlū ūhaya mhayo gose gose gwa kūntunga,

¹¹hūna ū ngoshi wīyigwa īyo walahīlile nūūlū īyo witungile yenīyo, alīyo ūneka gīko dūhū yaya nūūlū kūng'wīla mhayo gwa kūng'hūgūla, nūūlū gwa kūnemeja, a henaho ī shilahīlo nūūlū ī mihayo īyo witungile īkwigeleelwa kūshikīlījiwa.

¹²Alīyo ū ngoshi ūlū wīyigwa ī mihayo yenīyo hūna wīlema nūūlū ūng'hūgūla, a henaho shilahīlo shose shose īsho shafuma ū mu nomo gwakwe shitūbiza na ngunzu, nguno ū ngoshi wang'hūgūlaga, na lūūlū ū SEEBA akūntaligūla.

¹³Ū nkīma ūyo atoolilwe ūlū ūlahīla, nūūlū ūhaya mihayo ya kūntunga, ū ngoshi adūgije kwīyinha nguzu ī mihayo yenīyo nūūlū adūgije kwībūlaga yūgaya ī nguzu.

¹⁴Kwike ū ngoshi ūlū wīyigwa ī mihayo yenīyo alīyo wikala ahuumūlile dūhū shikū jose, a henaho akūbiza aloolecha gīkī ī shilahīlo shakwe nī mihayo īyo yīntungile ni yongejage ū kūntunga. Ūlū wīyigwa ī mihayo yenīyo alīyo ūhuumūla dūhū, akūbiza alizunīlīja nayo.

¹⁵Alīyo ūlū nose ūūkahaya mhayo kū kale, hū kūhaya akūbiza wa kūsayīlwa ūlū ūbiza wingīlile mu būhūbi ū nke wakwe.”

¹⁶Ī shilagīlo shenīshi ū SEEBA akanagīīla ū Musa nguno ya koolecha ī mihayo īyo īng'wigeleelilwe munhū kwīmana kūlwa nke wakwe; nūūlū myaji kūlwa nshīke wakwe ūyo alī ha kaya, atatoolilwe.