Read Sukuma Bible 2015 – Bibilia Ilagano Lya Kale 2015 Kūbala 32 Bible Online

Kūbala 32 - Sukuma Bible 2015 – Bibilia Ilagano Lya Kale 2015 bible

Kūbala 32

¹A banhū ba numba ya ng'wa Lubeni nū lo Gadi baalī na madaale mataale ga mitugo, na lūūlū aho bashika Yazeeli na Gileadi būbona gīkī a mapandī genayo gadūgije kūbeelela kūbiza madīīmīlo ga mitugo.

²Hūna biza ū kūlī Musa nū ngabīji Elieza, hamò na a batongeeji a bangī a ba Baisilaeli; būhaya gīkī,

³“Ī sī ja Atalosi, Diboni, Yazeeli, Nimula, Heshiboni, Eleale, Seba, Nebo na Beoni,

⁴Ījo SEEBA wajitūūlile mu nkono gwa banhū bakwe Baisilaeli, jibeelelile ūlū kūdīīmīla mo madaale ga mitugo; alilūūlū, a bise batūmami bako tūlī na mitugo.

⁵Tūlīīlomba gūūyū mhayo ūlū gūlīībeelela ū mu miso gako; twinhage ī sī jenīji jibize jise, nīyo a bise tūtī nayo nī nguno ya kūgūkīla nū mongo gwa Yolodani!”

⁶Ū Musa ūbawīla a banhū ba ng'anda ja ba Lubeni na Gadi, “A baana ba ng'wing'we baje bakūlwaga būlūgū, a bing'we ng'wigashije kūūnū dūhū?

⁷Mhayo kī nago hangī ū gwenūyū mulīgūhaya? Mutūmanaga gīkī mukūbagwisha ng'holò a Baisilaeli, balemeelwe ū kwīsola ī sī īyo SEEBA wabinha?

⁸H'ūmo bakīītīla na a biching'wi, aho nakabatūma tūlī Kadeshi balinea kūja kwīdata ī sī.

⁹Nguno bakashika ū kū sī ja malago ga Eskooli bīībona ī sī, bahayūshoka būshikīla kūbagwisha ng'holò a Baisilaeli, būlemeelwa ū kūja ū kū sī īyo SEEBA walī wabinha.

¹⁰Hūna ū SEEBA ūpelana no; ūlahīla alīhaya gīkī,

¹¹‘A benaba īkī baalemeelwa ū kūshimīza hamò nane mu būshikanu bose, ū mu bose a ba myaka ya kwandīja ha makūmi abīlī na kūja kwigūlya, abo baafumile Misili, atīho nūūlū ūmò ūyo akwībona ī sī īyo naabisagīja ba Abulahamu na Isaka na Yakobo; nūūlū īkī nabilahīlīla.

¹²Ndūhū gete nūūlū ūmò wabo, ūlū atī Kelebu ng'witūnja o ng'wa Yefune wa mu kaya ya Bakeni, na Yoshwa ng'witūnja o ng'wa Nuni. Nguno a benabo baashimīzaga nū SEEBA mu būshikanu bose.’

¹³Ū būpelanu bo ng'wa SEEBA būkabapembekela a Baisilaeli, ūbinha nsango gwa kūmala myaka makūmi anè bakūyūnga yūngaga ng'witogolo, kūshisha pyī ī shibyalīlwe sha banhū abo baalī bang'wītīla yabūbi shūūshila kūcha.

¹⁴Alīyo gashi na a bing'we, shibyalīlwe shabo a bakenaagūji benabo, mutaalī ng'ūbīta mo dūhū ū mu nzīla ja basīng'we; mutaalī ng'ongeja kūnsoosela dūhū ū SEEBA abapelanīle a Baisilaeli na kūtinda ho!

¹⁵Ūlū mulatagaalīje muneke ū SEEBA, managi gīkī a banhū benaba akūbaleka hangī ng'witogolo; a bing'we hū mukūbenheleja kūkenaagūlwa!”

¹⁶Hūna būng'wegeela ū Musa, biza kūng'wīla, “A bise tūtogilwe kūjigītīla ngutu ī mitugo jise ū kūūnū, na a bana bise tūbabeegeje mizengo.

¹⁷Alīyo a bise benekīlī tūmalīīlile kūsola shilanga tūje hamò na a badūgū bise tūkabagunanhe, kūshisha nabo bapandīke ha kwikala. Kwike a bake bise na a bana bise tūtogilwe kūbaleka mu mizengo īyo īlang'hanilwe chiza; batizūdumīlwa na bikaji ba mu sī jenīji.

¹⁸A bise tūtūshoka kūshisha būlī munhū ū mu Baisilaeli apandīke wingīji wakwe.

¹⁹A bise yaya ū kūsola wingīji hamò nabo ū kū nkīlo gwa mongo gwa Yolodani; nguno ū wingīji wise būlī kū nkīlo gwa Kīīya ya mongo gwa Yolodani.”

²⁰Ū Musa ūbawīla, “Ūlū mulagwīte ū mhayo gwenūyo, ū gwa kūbūūcha shilanga kū būtongi bo ng'wa SEEBA kūja kū būlūgū,

²¹mukīle nabo a biching'wi ū kū nkīlo gwa mongo, muje mudimile shilanga kū būtongi bo ng'wa SEEBA, kūshisha abapeeje a banishi bakwe bīnge ho,

²²kūshisha ī sī īsolwe ībize ha sīlīlī ya būsugi bo ng'wa SEEBA, ning'we hū mukūshoka ng'wize ng'wigashe mu wiyaabī. Ī ligasa lin'gwe ū kūlī SEEBA nū kū Baisilaeli līkūbiza lyashilaga. A henaho ū SEEBA hū akūng'winha ī sī yenīyī ībize ying'we ya nkono na kūgūlū.

²³Alīyo ūlū ng'ūleka kwīta gīko mukūhūba no ū kūlī SEEBA; hama nīyo managi hape gīkī ū būkenaagūji wing'we būkūmupandīka dūhū.

²⁴Na lūūlū ī haha, a bana bing'we bazengelagi ng'hana ī mizengo; nī mitugo jing'we mujibeegeje ī mbīgīlī, kwike shiigelile mushikīlīje ūmo ng'wahayīlaga.”

²⁵A banhū ba ng'anda ja ba Lubeni na Gadi benabo būhaya, “A bise batūmami bako baba tūkwīta ūmo ūlītūwīlīla.

²⁶A bana bise na a bake bise bakūsaaga kūūnū kū mizengo ya Gileadi, hamò na a madaale gise ga ng'holo na ng'ombe.

²⁷Alīyo a bise batūmami bako, būlī ūmò wise akūbūūcha shilanga tūkīle mongo kūjūūlwa būlūgū bo ng'wa SEEBA, gīt'ūmo ūlītūwīlīla dūhū ū bebe nkūjiwa ntaale wise.”

²⁸Hūna ū Musa ūfunya shilagīlo kūlwa nguno yabo; ūbinha ba Elieza na Yoshwa, hamò na a bataale ba numba ja bakūlūgenji ū mu ng'anda ja Baisilaeli.

²⁹Ūbawīla gīlī, “A banhū ba ng'anda ja ba Gadi na Lubeni ūlū balaagūkīle ū mongo gwa Yolodani hamò ning'we, būlī ng'wene abūūkije shilanga shakwe kū būtongi bo ng'wa SEEBA, ūlū ng'ūmala ū kwīdima ī sī yūbiza ha sīlīlī ya būsugi wing'we, a boi mukūbinha ī Gileadi ībize yabo.

³⁰Alīyo ūlū būleka kūbūūcha shilanga shabo gīkī bakīle hamò ning'we ū kū nkīlo, a henaho nabo bakwanukūla ī sī hamò ning'we ī Kanani.”

³¹A banhū ba ng'anda ja ba Gadi na Lubeni būhaya, “A batūmami bako bakwīta gīt'ūmo SEEBA wahayīlile.

³²Tūkūbūūcha ī shilanga kū būtongi bo ng'wa SEEBA, tūgūkīle ū mongo, tūje ī Kanani. Ī sī ya wingīji wise, nī sabo jise tūkūjileka kūūnū kū nkīlo gwa Yolodani.”

³³Hūna a banhū ba ng'wa Gadi na a ba ng'wa Lubeni, hamò nī nusu ya banhū ba numba ya ng'wa Manase ng'witūnja o ng'wa Yosefu, ū Musa ūbinha a banhū benabo ī sī īyo yalī īsugilwe na Sihoni ntemi wa Baamoli, nī yīyo yalī īsugilwe na Ogu, ntemi wa Bashani; ī sī yenīyo ūbinha pye, nī mizengo yamo.

³⁴Na lūūlū a banhū ba ng'wa Gadi būzenga mizengo ya Diboni, Atalosi, Aloeli,

³⁵Atalosi-shofamu, Yazeeli, Yogūbeha,

³⁶Besi-nimula, na Besi-halani; bīpīndīlīja ngītīli kūlwa būlang'hani, na a madaale gabo ga mitugo būgagītīla ngūtū.

³⁷A banhū ba ng'wa Lubeni nabo būzenga mizengo ya Heshiboni, Leale, Kiliasaimu,

³⁸na Nebo, na Baali-meoni (kwike a mina genaya gakagalūchiwa), hamò na Sibuma. Ī mizengo īyo bakīīzenga būpya, būyinha mina mapya.

³⁹Abo bakīdima ī sī ya Gileadi baalī banhū ba shibyalīlwe sha ng'wa Makili, ng'witūnja o ng'wa Manase; būbapeeja a Baamoli abo baalī bazengi baamo na kale.

⁴⁰Na lūūlū ū Musa ūbinha ī sī ya Gileadi a banhū ba numba ya ng'wa Makili, a ba shibyalīlwe sha ng'wa Manase, bigasha mo.

⁴¹Munhū ūngī, nang'hwe wa shibyalīlwe sha ng'wa Manase, lina lyakwe Yaili, wiza ūbasoja ī ng'hambī jabo, ūlitana ī lipandī lyenīlo Havoti-yaili.

⁴²Na ūngī lina lyakwe Noba, nang'hwe ūdima sī ya Kenati, nī ng'hambī ījo jalīho a mapandī genayo; ūyitanīla lina lyakwe lya Noba.