Read Sukuma Bible 2015 – Bibilia Ilagano Lya Kale 2015 Kūbala 33 Bible Online

Kūbala 33 - Sukuma Bible 2015 – Bibilia Ilagano Lya Kale 2015 bible

Kūbala 33

¹Aka kalī kihelele ka kabūūkīle ka mabità ga Baisilaeli, aho balandya lūgendo lwa kwīnga mu sī ya Misili, balī ha sīlīlī ya būtongeejibo ng'wa Musa na Alooni.

²Ū Musa akayandīka ī mihayo ya kihelele ka lūgendo lwabo gīt'ūmo akalagīīlīlwa na SEEBA. Na lūūlū aka hū kalī kihelele ka kīngīle kabo aho bandya ū lūgendo:

³A Baisilaeli babūūka ū lūgendo lwabo lūshikū lw'ikūmi n'itanò, ng'weji gwa kwandya, lūshikū lwa kūlondeela pasaka. Bakabūūkīla Lamesesi, bandya kūshimīza mu kwiyagaalūla, a Bamisili balolile batī na gwa kwīta.

⁴Ī likanza lyenīlo a boi a Bamisili baalī mu makoye ga kūjīka babyalwa babo ba kwandya, abo SEEBA walī wabatūla; nguno ū SEEBA walī wabagwisīja nsango a bamulungu babo.

⁵A Baisilaeli aho bīnga ī Lamesesi būja kūshiha Sukoti, būtūūla ng'hambī henaho.

⁶Aho bīnga ī Sukoti, būshimīza bajile būūkatūūla ng'hambī hangī Eetamu, hihī n'itogolo.

⁷Aho bīnga ī Eetamu būgalūka bajile Pi-hahiloti, Kīīya ya Baali-zefoni, būūkatūūla ng'hambī hihī na Megido.

⁸Aho bīnga ī Pi-hahiloti būūkabīta mu nyanza, hūna būīlīīla kwitogolo. Būshimīza ikanza lya shikū idatū ng'witogolo lya Eetamu, hūna būūkatūūla ng'hambī yabo ipandī lya Maala.

⁹Bīnga ī Maala būja ipandī litanagwa Elimu; ū kwenūko jalīko nzwinzī ikūmi n'ibīlī, na mitī ikūmi na ībīlī ya nhende, a henaho būtūūla ng'hambī.

¹⁰Baanoga bīnga ho ī Elimu, būja būūkatūūla ng'hambī yabo bbihī na Nyanza Yaza.

¹¹Aho bīnga ū kū Nyanza Yaza, būja būūkatūūla ng'hambī ng'witogolo lya Sini.

¹²Bīnga ko nū kwitogolo lya Sini, būja būūkatūūla ng'hambī ipandī lya Dofuka.

¹³Bīnga ho nī Dofuka būja būūkatūūla ng'hambī Aluushi.

¹⁴Bīnga nī Aluushi būja būūkatūūla ng'hambī Lefidimu, ūko banhū bakagayiwa minzī ga kūng'wa.

¹⁵Bīnga nī Lefidimu būja būūkatūūlū ng'hambī ng'witogolo lya Sinai.

¹⁶Aho bīnga ī Sinai būūkatūūla ng'hambī Kibloti-hatava.

¹⁷Aho bīnga ī Kibloti-hatava, būūkatūūla ng'hambī Hazeloti.

¹⁸Aho bīnga ī Hazeloti, būūkatūūla ng'hambī Litima.

¹⁹Aho bīnga ī Litima būja būūkatūūla ng'hambī Limoni-pelezi.

²⁰Aho bīnga ī Limoni-pelezi būūkatūūla ng'hambī Libna.

²¹Aho bīnga ī Libna būūkatūūla ng'hambī Liisa.

²²Aho bīnga ī Liisa, būūkatūūla ng'hambī Kehelata.

²³Aho bīnga ī Kehelata būūkatūūla ng'hambī ha lūgūlū lwa Shefeeli.

²⁴Bīnga nū kū lūgūlū lwa Shefeeli būūkapanga Halada.

²⁵Bīnga nī Halada būūkapanga Makelo.

²⁶Bīnga nī Makelo būūkapanga Tahati.

²⁷Bīnga nī Tahati būūkapanga Teela.

²⁸Bīnga nī Teela, būūkapanga Mitika.

²⁹Bīnga nī Mitika būūkapanga Hashimona.

³⁰Bīnga nī Hashimona būūkapanga Moseloti.

³¹Aho bīnga ī Moseloti būja Bene-jakaani būūkatūūla ng'hambī henaho.

³²Aho bīnga ī Bene-jakaani būja Hoha-hagigadi būūkatūūla ng'hambī henaho.

³³Aho bīnga ī Hoha-hagigadi būja Yotibatani būūkatūūla ng'hambī henaho.

³⁴Aho bīnga ī Yotibatani būja Ablona būūkatūūla ng'hambī henaho.

³⁵Aho bīnga ī Abulona būja Ezioni-geba būūkatūūla ng'hambī henaho.

³⁶Aho bīnga ī Ezioni-geba būja Kadeshi būūkatūūla ng'hambī ng'witogolo lya Zini.

³⁷Aho bīnga ī Kadeshi būja kū lūgūlū lwa Hooli, būūkatūūla ng'hambī hihī na lūbīmbī lwa sī ya Edomu.

³⁸Aho balī kwenūko, ū ngabīji Alooni ūlagīlwa na SEEBA kūlinha mu lūgūlū lwa Hooli; h'ūko akajūchīla, mu lūshikū lwa kwandya lwa ng'weji gwa katanò ng'waka gwa makūmi anè kūfuma aho Baisilaeli bakingīla mu sī ya Misili.

³⁹Ī myaka ya būlamu o ng'wa Alooni yalī yashika igana na makūmi abīlī na idatū, hūna ūcha mu lūgūlū lwa Hooli.

⁴⁰Ū ntemi wa bana Kanani ba Aladi, ūyo wikalaga Negevu ya Kanani akigwa ī gīkī a Baisilaeli balī mu nzīla baliza.

⁴¹Na lūūlū a Baisilaeli bīnga ū kū lūgūlū lwa Hooli, būūkatūūla ng'hambī Zalimona.

⁴²Nī Zalimona bīnga būūkatūūla ng'hambī Ponuni.

⁴³Nī Ponuni bīnga būūkatūūla ng'hambī Obooti.

⁴⁴Nī Obooti bīnga būūkatūūla ng'hambī Iye-abalimu, bbihī na lūbīmbī lwa Moabu.

⁴⁵Nī Iye-abalimu bīnga, būūkatūūla ng'hambī Dibon-gadi.

⁴⁶Nī Dibon-gadi bīnga būūkatūūla ng'hambī Alimon-diblataimu.

⁴⁷Nī Alimon-diblataimu bīnga būūkatūūla ng'hambī kū ngūlū ja Abalimu, bbihī na Nebo.

⁴⁸Kwike bakīnga ū kū ngūlū ja Abalimu, būja kū mbūga ya Moabu būūkatūūla ng'hambī kwenūko, bbihī na mongo gwa Yolodani; bilola na nzengo gwa Yeliko gwalī ū kū nkīlo gwa mongo.

⁴⁹Ū mu mbūga ya Moabu ng'wenūmo, bakatūūla ī ng'hamī jabo kwandīja Besi-jeshimoti kūshika Abeli-shitimu; jihela ū kū mbalama ya mongo gwa Yolodani.

⁵⁰Ū mu mbūga ya Moabu ng'wenūmo aho bataalī bapangile ī hihī nū mongo gwa Yolodani, a h'ipandī īlo baalī bilolile nū nzengo gwa Yeliko, ū SEEBA ūlūngalūnga nū Musa alīng'wīla,

⁵¹“Bawīlage a Baisilaeli gīkī, ‘Ūlū mulagūkīle ū mongo gwa Yolodani, mushike ū mu sī ya Kanani,

⁵²shing'wigeleelilwe kūbapeeja pye gete a bikaji ba mu sī yenīyo bang'wīngīle. Balī na mashiikolile ga kūlamiwa, gamò ga kūbūmba gangī ga kūsula; gabelagūlagi na mugakenaagūle pye a gose. Na mapandī ga higūlya balī nago, bakajaga kūlamīja ko, nago gasambaagūlagi.

⁵³Jagi mukīdime ī sī yenīyo ībize ying'we, ng'wigashe mo; nguno nang'winhaga ī sī yenīyo kūbiza ying'we ya wikomangīle.

⁵⁴Mukwīgabanhya bo kweesa mbale, kūlenganīla nī ng'anda jing'we ūmo jilī. Ū lūganda ūlo lūlī lūtaale lūpandīke sī nhaale, nū lūdo nalo lūpandīke sī ndo. Abo balasolelwe bo mbale sī ndebe kūbiza yabo, ī yenīyo hū yabizaga yabo ng'hana; ī sī yenīyo īgabanhyagi kūlondeela numba ja bakūlūgenji bing'we.

⁵⁵Managi gīkī, ūlū ng'ūleka kūbapeeja pye a bikaji ba mu sī yenīyo, abo mulabalekeele mo bakūbiza gītī būpilipili ū mu miso ging'we, na gītī ming'hwa ū mu mbazu jing'we. Bakūmukoya no ū mu kikalīle king'we ū mu sī yenīyo.

⁵⁶Na lūūlū ū nene nakūng'winha ning'we ū nsango ūyo gūbigeleeilwe boi.’”