Read Sukuma Bible 2015 – Bibilia Ilagano Lya Kale 2015 Kūbala 36 Bible Online

Kūbala 36 - Sukuma Bible 2015 – Bibilia Ilagano Lya Kale 2015 bible

Kūbala 36

¹A batongeeji ba kaya ja mu numba ya ng'wa Gileadi, ū ng'witūnja o ng'wa Makili, ng'witūnja o ng'wa Manase, abo shibyalīlwe shabo shalī shifumile mu ng'anda ja ng'wa Yosefu, bakiza kūlūngalūnga nū Musa, hamò na a batongeeji a bangī, a bataale ba ng'anda ja Baisilaeli.

²Būhaya, “Baba nkūjiwa ntaale wise, ū SEEBA aho alīkūlagīla gīkī ūtūmamīle mbale ū mu kūbagabanhya ī sī a Baisilaeli ībize wingīji wabo, akakūlagīla gīkī ū wingīji wa ndūgū wise ū Zelofehadi ūbinhe bashīke bakwe.

³Al'ī gīsī lūūlū, ūlū būtoolwa na bagosha ba kūfuma mu ng'anda jingī najo ū mu Baisilaeli, ū wingīji wabo būtīnjiwa ū kūfuma ū mu wingīji wa bakūlūgenji bise, būsaamījiwe kū ng'anda ūko balatoolwe? Ūlū yūja gīko, angū ū wingīji ūbo tūhelelilwe bise būkūbiza wīnjiwa būtwalwa kūngī!

⁴Ū ng'waka gwa Baisilaeli gwa kūshosha shikolo ūlū gūūshika, ū wingīji wabo angū būkūbiza bosangījiwa kū wingīji bo lūganda ūko balatoolwe! A henaho ī sabo ya wingīji wabo īkūbiza yasaamiwa kwīnga ū kū wingīji ūbo bahelelilwe bakūlūgenji bise!”

⁵Hūna ū Musa ūlagīlwa na SEEBA kūbinha a Baisilaeli shilagīlo shiishi. Ūhaya, “Īyo balīyīhaya a banhū ba shibyalīlwe sha lūganda lwa ng'wa Yosefu ītūngīlīgije.

⁶Na lūūlū ū mu mihayo ya bashīke ba ng'wa Zelofehadi, ū SEEBA walagīlile gīkī, batoolwe na munhū ose ose ūyo balantogwe, kwike abize wa mu numba ya lūganda lwa bakūlūgenji babo.

⁷Ū mu Baisilaeli būtīīho wingīji ūbo būkūsaamiwa kūfuma lūganda ūlū, kūja kū lūganda lūngī; nguno būlī Ng'wisilaeli akwīlang'hana ī sī īyo wanukūla kūbiza wingīji wakwe kūfuma kū bakūlūgenji bakwe.

⁸Na lūūlū būlī ng'wana nkīma ū mu ng'anda ja Baisilaeli ūyo wanukūla sī kūbiza wingīji wakwe, shing'wigeleelilwe atoolwe na munhū wa kūfuma mu numba ya lūganda lo ise; ībize gīkī būlī Ng'wisilaeli abūdimīīle ū wingījibo ng'wa ise.

⁹Ū wingīji būtī wa kūsaamiwa kūfuma lūganda ūlū, kūja kū lūganda lūngī; nguno būlī lūganda lwa Baisilaeli shibigelile kwīlang'hana ī sī īyo īlī ya wingīji wabo.”

¹⁰Na ng'hana a bashīke ba ng'wa Zelofehadi bīīta ūmo SEEBA akanagīīlīla ū Musa.

¹¹A bashīke benabo, a ba Mahala, Tīzīla, Hogla, Milika na Noa, būtoolwa na bagosha ba mu lūganda lwa ng'wa saabo.

¹²Bakatoolwa na bagosha ba kūfuma mu shibyalīlwe sha mu lūganda lo Manase, ū ng'witūnja o ng'wa Yosefu. Na lūūlū ū wingīji wabo wikala ū mu numba ya lūganda lwa ng'wa saabo.

¹³Ī shenīshi h'ī shilagīlo na a kahelele ako SEEBA akabinha a Baisilaeli kūbītīla mulī Musa, aho bataalī mu mbūga ya Moabu, a ha ng'hambī ya hihī na mongo gwa Yolodani, īyo yalī yilolile na nzengo gwa Yeliko ū kū ntambūko gwa mongo.