Read Sukuma Bible 2015 – Bibilia Ilagano Lya Kale 2015 Kūbala 4 Bible Online

Kūbala 4 - Sukuma Bible 2015 – Bibilia Ilagano Lya Kale 2015 bible

Kūbala 4

¹Hūna hangī ū SEEBA ūbawīla a ba Musa nū Alooni gīkī,

²“Ū mu lūganda lwa Balawī babalagi a Bakohati, būlī ng'wene mu numba ya ng'wawe, gīt'ūmo jilī numba ja bakūlūgenji babo.

³Mubabale pye a bagosha kwandīja ba myaka makūmi adatū, kūshisha ba myaka makūmi atanò abo bakatūmamaga ng'wiheema lya kwibilingīla.

⁴Ū nīmo gwa Bakohati ū ng'wiheema lya kwibilingīla, gūkūbiza kūshilang'hana ī shikolo īsho shilī sheela no no no.

⁵Ī likanza lya kūsaamiwa ī ng'hambī ūlū lyūshika, ū Alooni na a bitūnja bakwe bakwingīla mo kūlyīnja ī litundubaalī lya hisenge, būlīkundīkīja a h'isandīko lya būkaanīji.

⁶Hūna būlīkundīkīja na makūnza ga mbūli, hanuma būlīkundīkīja hangī na ng'wenda gwa langi ya būlulu. Ūlū būmala ī gīko būlītūūlīla ī mitī yalyo ya kūlībūūkīja.

⁷A ha meeza ya migatī ya kwizūkīja bakwamba ng'wenda gwa būlulu, būgatūūla ho a masahani, nī shijiiko na a mabbakuli, nī shikombe īsho shikatūmamīlagwa mu kūfunya shakwinha sha kūng'wiwa. Ū ngatī ūyo gūkikalaga ho būl'ikanza bakūgūleka gwikale ho.

⁸Hūna ī shikolo shenīsho bakūshikumba ng'wenda gwaza; a higūlya ya ng'wenda būkundīkīja makūnza ga mbūli, hūna bīītūūla ho nī mitī ya kwībūūkīja ī meza.

⁹Bakūsola ng'wenda gwa langi ya būlulu būlīkumba ī likīndīkīlo lya tala, hamò nī tala jalyo ījo jikenhaga isana,[1] na a majimījo ga tala, nī sahani jaho na a mabīīkīlo ga maguta ga kūjibakīja ī tala.

¹⁰Hanuma ya henaho ī likīndīkīlo lya tala hamò nī shikolo shalyo bakūlīlingīīla ng'wikundīkījo lya makūnza ga mbūli, hūna būlītūūla hibūkījo.

¹¹A higūlya ya ng'walīlo gwa zahabu bakwamba ho ng'wenda gwa būlulu, hūna būgūkumba na makūnza ga mbūli, hama būgūtūūlīla nī mitī ya kūgūbūkīja.

¹²Ī shiseme īsho shikatūmamīlagwa kū milīmo ya ng'wipandī lyeela bakūshisola ī shose, būshikumba ng'wenda gwa būlulu, hama būshikumba na makūnza ga mbūli, būshitūūla hibūūkījo.

¹³A mabu ga ha ng'walīlo gwa shaba bakūgīnja hūna bamba ho ng'wenda gwa langi ya nzulunge.

¹⁴A higūlya yago būshitūūla pyī ī shikolo īsho shikatūmamīlagwa kū milīmo ya ha ng'walīlo gwenūyo, a maahulīlo ga moto, uuma ja kūzubūlīla nyama, makolelo na a mabbakuli ga kūseeseebela mininga; hūna būtūūla ho n'ikundīkījo lya makūnza ga mbūli; hanuma būgūtūūlīla nī mitī ya kūgūbūkīja.

¹⁵Ū Alooni na a bitūnja bakwe ūlū būmala maja ū kūshikundīkīja ī shiseme sheela, nī shikolo ī shingī pye, ūlū lyūshika ī likanza lya kwīsaamya ī ng'hambī, a Bakohati nabo hū bakwiza bagwīte ū nīmo gwa kūbūūcha. Kwike yaya ū kūgima kūshikuumya ī shikolo ī sheela; nguno ūlū bīīta gīko bakūcha. Na lūūlū a Bakohati bakūshibūūcha ī shikolo sha ng'wiheema lya kwibilingīla.

¹⁶“Ū Elieza ū ng'witūnja o ng'wa ngabīji Alooni akūgalang'hana a maguta ga kūbakīja tala nū būbbani wa ng'waso gwawiza, nū būsu ūbo būkafunyiwagwa būlī lūshikū kūbiza shakwinha sha būsu, na a maguta ga kwitīīlwa batūmami ūlū balītūūlwa ha nīmo. Ū ng'wenūyo h'akūbiza nang'hani walyo pyī ī liheema nī shikolo shalyo shose, nī shitūmamīlo shalyo ī sheela, nī shiseme ī shingī.”

¹⁷Ū SEEBA ūbakomeleja a ba Musa nū Alooni alīhaya,

¹⁸“Lang'hanagi gete, ī kaya ja mu numba ya ng'wa Kohati jitizūshila kūjimīīla ū mu lūganda lwa Balawī.

¹⁹Ni bilang'hanage bikale bapanga, batizūūcha kūlwa kūsheegeela ī shikolo ī sheela no no no. Na lūūlū ū Alooni na a bitūnja bakwe bakūyūbagunanha mu gīkī, bakūyingīla ū ng'wipandī lyeela, babahelela būlī ng'wene nīmo gwakwe, nī shikolo īsho shing'wigelilwe kūshibūūcha.

²⁰Alīyo a boi a Bakohati batī ba kūja mo ū mu gatī gīkī bakashilole ī shikolo ī sheela, yaya nūūlū hado dūhū; nguno numho bakūcha.”

²¹Ū SEEBA ūng'wīla hangī ū Musa gīkī,

²²“Babalage na a banhū ba numba ya ng'wa Gelishomu, būlī bene mu kaya jabo, gīt'ūmo jilī kaya ja bakūlūgenja babo.

²³Babalage pye a bagosha kwandīja ba myaka makūmi adatū kūshisha ba myaka makūmi atanò, abo bakatūmamaga ng'wiheema lya kwibilingīla.

²⁴A ba numba ya ng'wa Gelishomu, ū mu katūmamīle kabo ka kūbūūcha miligo, ī milīmo yabo īkūbiza īyī:

²⁵Bakūbiza babūūcha baago a matundubaalī g'iheema, na a g'ipandī lya kwibilingīla, hamò nī likundīkījo lyalyo lya myenda, ī lya kūtonja, nī lya makūnza ga mbūli īlo līkizaga higūlya; na a matundubaalī ga ha nyango gwa ng'wiheema lya kwibilingīla.

²⁶Na a matundubaali ga ha lūūba lwa ha gwalugwa īyo īpīndīlīgije iheema hamò na ng'walīlo. H'a babūūcha baago na a matundubaalī ga ha nyango, nī ngoye; nī shikolo ī shingī pyī īsho shikatūmamīlagwa kūbeeja milīmo yamo. A banhū ba numba ya ng'wa Gelishomu shibigelile kūshitūmamīla ī shikolo shenīshi ū mu kwīyīīta pyī īyo īlagīlilwe kwītwa.

²⁷Pye ū būtūmami wabo bakūwīta gīt'ūmo kalī katongeelele ka ng'wa Alooni na bitūnja bakwe; ni gūbizage nīmo gwa kūbūūcha nūūlū gwa kūbeeja shikolo shose shose. Ūkūbahelela bebe īsho bakūyūshibūūcha.

²⁸Ū wenūbū hū būtūmami wa banhū ba numba ya ng'wa Gelishomu ū ng'wiheema lya kwibilingīla. Ī milīmo yabo īkūbiza ha sīlīlī ya būtongeeji bo ng'wa Itamaali ng'witūnja wa ngabīji Alooni.”

²⁹Babalage na a banhū ba numba ya ng'wa Melaali, būlī beenī mu kaya jabo, gīt'ūmo jilī numba ja bakūlūgenja babo.

³⁰Babalage pye a bagosha kwandīja ba myaka makūmi adatū kūshisha ba myaka makūmi atanò, abo bakatūmamaga ng'wiheema lya kwibilingīla.

³¹Ū nīmo gwabo ūyo bahelelilwe kūgwīta ū ng'wiheema lya kwibilingīla gūūyū, Bakūyūjibūūcha ī mbawa ja kūlyīmīlīkīja ī lipandī lya kwikala, nī papi jalyo nī ng'hīngī jalyo na a makīndīkīlo ga ng'hīngī.

³²Pye nī ng'hīngī ja kwīpīndīlīja ī gwalugwa, na a makīndīkīlo gaajo, nī mambo ja hiheema, nī ngoye, nī shikolo ī shingī pyī īsho shikatūmamīlagwa kū milīmo yikolile gīko. Būlī munhū ng'helelage nīmo gwakwe ūyo alayūgwīta.

³³Ū gwenūyū hū gwene ū nīmo gwa banhū ba numba ya ng'wa Melaali ū ng'wiheema lya kwibilingīla. Bakūtūmama ha sīlīlī ya būtongeejibo ng'wa Itamaali ū ng'witūnja wa ngabīji Alooni.

³⁴Ū Musa nū Alooni, na a batongeeji ba banhu, būbabala a banhū ba numba ya ng'wa Kohati kūlenganīla na ng'anda jabo na kaya jabo.

³⁵Pye a bagosha, kwandīja ba myaka makūmi adatū kūshisha ba myaka makūmi atanò, abo bingīlaga ng'wiheema lya kwibilingīla kūtūmama milīmo.

³⁶Aho baabalwa būshika shihūmbī shibīlī na magana mpungatī na makūmi atanò.

³⁷Ī lyenīlo hū ī lisaabu lya banhū ba numba ya ng'wa Kohatiī abo bingīlaga ng'wiheema lya kwibilingīla kūbeeja milīmo. Ū Musa nū Alooni bakababala gīt'ūmo SEEBA walī wanagīīlīla Musa.

³⁸A ba numba ya ng'wa Gelishomu nabo bakabalwa kūlenganīla na numba jabo na kaya jabo.

³⁹Pye a bagosha, kwandīja ba myaka makūmi adatū kūshisha ba myaka makūmi atanò, abo bingīlaga ng'wiheema lya kwibilingīla kūtūmama milīmo,

⁴⁰aho baabalwa būshika shihūmbī shibīlī na magana atandatū na makūmi adatū.

⁴¹Ī lyenīlo hū ī lisaabu lya banhū ba numba ya ng'wa Gelishomu abo bingīlaga ng'wiheema lya kwibilingīla kūbeeja milīmo. Ū Musa nū Alooni bakababala gīt'ūmo SEEBA walī wanagīīlīla Musa.

⁴²A ba numba ya ng'wa Melaali nabo bakabalwa kūlenganīla na ng'anda jabo na kaya jabo.

⁴³Pye a bagosha, kwandīja ba myaka makūmi adatū kūshisha ba myaka makūmi atanò, abo bingīlaga ng'wiheema lya kwibilingīla kūtūmama milīmo.

⁴⁴Aho baabalwa būshika shihūmbī shidatū na magana abīlī.

⁴⁵Ī lyenīlo hū ī lisaabu lya banhū ba numba ya ng'wa Melaali abo bingīlaga ng'wiheema lya kwibilingīla kūbeeja milīmo. Ū Musa nū Alooni bakababala gīt'ūmo SEEBA walī wanagīīlīla Musa.

⁴⁶Hūna lūūlū ū Musa nū Alooni na a batongeeji ba Baisilaeli būbabala pye a Balawī kūlenganīla na numba jabo na kaya jabo.

⁴⁷A bagosha pye a ba kwandīja myaka makūmi adatū, abo bingīlaga ng'wiheema lya kwibilingīla kūbeeja milīmo, na kūyūlībūūcha ng'wikanza lya kūsaama,

⁴⁸Ī lisaabu lyabo bakashika shihūmbī shinaane na magana atanò na makūmi anaane.

⁴⁹Pye a bose bakahelelwa ī milīmo ya kwīta, na a babūūcha būlagīlwa ī sha kūbūūcha, gīt'ūmo SEEBA walī wangīīlīla Musa. Nū kūbalwa bakabalwa pye gīt'ūmo SEEBA walī wanagīīlīla Musa.