Read Sukuma Bible 2015 – Bibilia Ilagano Lya Kale 2015 Kūbala 5 Bible Online

Kūbala 5 - Sukuma Bible 2015 – Bibilia Ilagano Lya Kale 2015 bible

Kūbala 5

¹Hūna ū SEEBA ūng'wīla ū Musa,

²“Bawīlage a Baisilaeli gīkī shiigelile kūyūmfunya hanze ya ng'hambī būlī ng'wene ūyo ikūnza lya mīlī gwakwe līlī na būsaatu ūbo ashikile kūbatūlīla na banhū bangī; nūūlū alī na būsaatu wa kūshiipa būsoso bo mbika yose yose mu mīlī gokwe, nūūlū ose ose ūyo ūsosohala kūlwa kūkuumya mimba.

³Būlī munhū, ngosha nūūlū nkīma, ūyo alī na makoye ga mbika yenīyo shiigelile akomanyiwe, aje hanze ya ng'hambī. Shiigelile batwalwe hanze ya ng'hambī batizīīsosohaja ī ng'hambī yabo, ī lipandī lya wikalo wane hamò ning'we.”

⁴A Baisilaeli bakīīta chene ng'hana, būbakomanya būbatwala hanze ya ng'hambī; gīt'ūmo SEEBA akanagīīlīla ū Musa.

⁵Ū SEEBA ūng'wīla hangī ū Musa,

⁶Bawīlage a Baisilaeli gīkī, “Munhū ose ose, abize ngosha nūūlū nkīma, ūlū ūng'hūba ng'wiye mu mhayo gose gose, ūbiza wipama kūlī SEEBA, ū munhū ng'wenūyo alī mu kwihīga.

⁷Shing'wigelilwe abūtambūūle ū būkenaagūji wakwe ūbo oowītile. Hanuma akūlīpa shikolo kūlwa nguno ya būkenaagūji ūbo oowītile, ongeja na īmò ya ng'witanò ya mpango gwa shikolo īsho alīfunya, hūna ūng'winha ūyo wang'hūbile.

⁸Alīyo ū munhū ng'wenūyo ūlū atī na ndūgū wa bbihī ūyo adūgije kwanukūla ī sabo yenīyo, īkūbiza ya ng'wa SEEBA, yūja kūlī ngabīji, pye nī ng'ondi y'isangī īyo īkūfunyiwa kūlwa nguno ya būkenaagūji wakwe.

⁹Shakwinha sheela shose shose īsho bakwenha a Baisilaeli kūlī ngabīji, ī shenīsho shakwe ū ngabīji.

¹⁰Būlī munhū ūyo alī na shakwinha sheela, ī yenīyo sabo yakwe, alīyo ūlū ūng'winha ngabīji, ī shenīsho shabizaga sha ngabīji.”

¹¹Hanuma hangī ū SEEBA ūng'wīla ū Musa,

¹²Lūngalūngaga nabo a Baisilaeli ūbawīle gīkī, “Ūlū nkīma atoolilwe ūlemva lemva, ūgwa mu būhūbi

¹³wa kūlaala na ngosha ūngī, alīyo ū mhayo gwenūyū gwikala gwibisile ū kūlī ngoshi, ū būsoso wakwe būkūbiza wibisile īkī atīho ūyo wamonile, nguno atadimilwe alīgwīta ū mhayo gwenūyo.

¹⁴Alīyo ū ngoshi ūlū wingīlwa moyo gwa wilu, wandya kūng'wilawa ū nke, hūna ūbiza gashi ng'hana wisosohagije; nūūlū hamo ūng'wilawa alīyo gashi atisosohagije ūmo ngoshi alīng'wiganikīla,

¹⁵ū ngosha ng'wenūyo akūntwala ū nke kūlī ngabīji. Akūtwala na kilo īmò ya būsu wa būsīga akafunye shakwinha kūlwa nguno ya nke wakwe. Kwike ū būsu wenūbo yaya ū kūbūtūūlīla maguta gose gose nūūlū būbbani; nguno ū būsu wenūbo būlī wa kūfunyiwa kūbiza shakwinha kūlwa nguno ya wilu. Ī shoi shakwinha kūlwa kwizūkīja mhayo gwa būkenaagūji.

¹⁶Ū ngabīji akūng'wegeleja, hūna ūng'wīmīlīja kū būtongi bo ng'wa SEEBA.

¹⁷Hama ūdaha minzī meela ūgatūūla mu lūbīga, ūsola na lūbuubu kūfuma hasī, ū ng'wiheema, ūlūtūūla ū mu minzī genayo.

¹⁸Ū ngabīji akūjitaligūla ī nzwīlī ja kū ntwe gwa nkīma ng'wenūyo wang'wīmīlījaga kū būtongi bo ng'wa SEEBA; hanuma akūng'winha shakwinha sha kwizūkīja, ū būsu wa shakwinha sha kūfunyiwa kūlwa wilu; ū kūnū ū wei ū ngabīji agabūkije mu nkono gwakwe a minzī a malūlū, ayo gakenhaga izumo.

¹⁹Hanuma akūng'wilahīja ū nkīma ng'wenūyo alīng'wīla, ‘Ūlū ūtalaalile na ngosha ūngī ose ose, ūbize ūtaalī kūgima kwīta mhayo gwa malofu na ngosha ūngī aho ūlī nke wa munhū ūngī, a minzī genaya ayo gakeenhaga izumo gatizūūkwenhela makoye.’

²⁰Alīyo ūlū gīkī wajile hanze ūneka ngoshi wako, ūūkisosohaja kwenūko mu nzīla ya kūlaala na ngosha ūyo atī ngoshi wako.

²¹A henaha ū ngabīji akūng'wilahīja ū nkīma ng'wenūyo mu kūng'wīla ī mihayo y'izumo īlī gīkī, ‘Ū SEEBA akūzume ū mu banhū ba ng'wing'we; nīyo ū kūgūlū gwako agwīte gūūme būhaama, nī nda yako īdūūmīle bakūleme a banhū ba ng'wing'we.

²²A minzī genaya, ayo gakenhaga izumo, gingīle ū mu mīlī gwako, gīdūūmīje ī nda yako, nī litango lyako lyūūme būhaama!’ Ū nkīma shing'wigelile ashoshe alīhaya gīkī, Alichene, alichene.”

²³Ū ngabīji akūgandīka a mazumo genayo, hūna ū wandīke ūbooja ū mu minzī a malūlū.

²⁴A minzī a malūlū genayo ayo gakenhaga izumo, akūng'winha ū nkīma ng'wenūyo alaagang'we; ūlū gūūshika ū munda, gakūng'wīta kwiyigwa kūsaatwa no no no.

²⁵Hūna ū būsu wa kūfunyiwa shakwinha kūlwa wilu akūbūsola ū ngabīji kūfuma ū mu nkono gwa nkīma ng'wenūyo, ūbūyengeeja kū būtongi bo ng'wa SEEBA, hūna ūsheenha ha ng'walīlo.

²⁶Hūna ū ngabīji akūsola mu nkono būsu būgeehu ū wa shakwinha shenīsho, ūbūpemba mu moto gwa ha ng'walīlo, kūbiza shiizūkījo. Hanuma ya henaho akūng'wīla ū nkīma agang'we a minzī genayo.

²⁷Ūlū ūgang'wa a minzī ga kwenha izumo, alīyo ūsangwa wisosohagije mu kwīta mhayo gwabūbi kūlī ngoshi, ūlū gūūng'wingīla ū mu mīlī gakūng'wenhela būsaatu būtaale no. Akūdūūmīla ī nda, nī litango lyakwe līkūūma būhaama; hama akūbiza n'izumo ū kū banhū ba mu sī ya ng'wawe.

²⁸Alīyo ū nīkma ng'wenūyo ūlū ūbiza wape, atisosohagije; ūbiza atī na būsoso, atūpandīka makoye, nīyo akūbyala dūhū na a baana.

²⁹Na lūūlū ī shenīshi shilī shilagīlo sha kūtūmama ūlū ngosha ūding'wa wilu kūlwa nguno ya nke wakwe, ūlū wisosohaja na ngosha ūngī aho ataalī nke wakwe.

³⁰Ī shilagīlo shenīshi shikūtūmama ūlū ngosha ūbiza na wilu kūlwa kūng'wilawa nke gīkī hamo wītile mhayo gwabūbi. Ū ngabīji akūng'wīmīlīja ū nkīma ng'wenūyo kū būtongi bo ng'wa SEEBA, hūna ūshitūmamīla pyī ī shilagīlo shenīshi.

³¹Ū ngoshi wa nkīma ng'wenūyo, atī na būbi ū mu yose yenīyo, alīyo ū nkīma, akūgabūūcha wei ng'wenekīlī a makoye ga būkenaagūji wakwe.