Read Sukuma Bible 2015 – Bibilia Ilagano Lya Kale 2015 Kūbala 8 Bible Online

Kūbala 8 - Sukuma Bible 2015 – Bibilia Ilagano Lya Kale 2015 bible

Kūbala 8

¹Ū SEEBA ūng'wīla ū Musa,

²Lūngalūngaga nū Alooni ūng'wīle gīkī, “Ūlū ūlījigolanya ī tala ījo mpungatī, jihelage mu mbika ya gīkī ūlū jūbaka, ū būūpe wajo būyūtwima ū kū būtongi w'ikīndīkīlo lya tala.”

³Na ng'hana ū Alooni wīta chene, ūjitūūla ī tala jenījo gīkī jiyūtwima ū kū būtongi walyo ī likīndīkīlo lya tala, gīt'ūmo SEEBA walī wanagīīlīla ū Musa.

⁴Ī likīndīkīlo lya tala lyalī lībeejiwe lya zahabu īsulile, yūbiza shikolo shimò, kwandīja kwitina lyaho kūshisha kū būlabo walyo. Ī likīndīkīlo lya tala lyenīlo līkabeejiwa kūlenganīla nū mumo Musa walī oolekejiwa na SEEBA.

⁵Ū SEEBA ūng'wīla hangī ū Musa gīkī,

⁶“Basolanhyage a Balawī kūfuma ū mu Baisilaeli, ūbeeje beela.

⁷Ī mihayo īyo yigelile kūbīītīla kūlwa nguno ya kwejiwa kwabo yīyī: Ūkūbaseeseebela minzī meela, hūna ūbawīle kūmooga, pye ū booya wa mīlī ū gose; nī shizwalo shabo bafule, babize beela.

⁸Hanuma ya henaho bakūsola nzagamba mūūga, na shakwinha shayo sha būsu būnogu būsangije maguta. Hūna nū bebe ūkūsola nzagamba yīngī mūūga, ya kūfunyiwa kūbiza shitambò sha būkenaagūji.

⁹Hanuma ūkūbeenha a Balawī kū būtongi w'iheema lya kwibilingīla, hūna ūbakuminge pye a Baisilaeli.

¹⁰A Balawī ūbeegeleja kū būtongi bo ng'wa SEEBA, a Baisilaeli babatūūlīle makono gabo.

¹¹Hūna nang'hwe ū Alooni ūbeenha a Balawī benabo kū būtongi bo ng'wa SEEBA, ūbatūūla kūlī SEEBA, būbiza shitambò sha kūyengeejiwa sha kūfuma kū Baisilaeli; ū mu gīko bakūbiza bigeleelwa kūgwīta ū nīmo go ng'wa SEEBA.

¹²Hanuma ya henaho a Balawī bakūtūūla a makono gabo a ha mitwe ya nzagamba ja kūfunyiwa kūlwa shitambò. Ī ya shitambò kūlwa būkenaagūji ūkwīfunya kūlwa ng'wa SEEBA, ī ya shitambò sha kūpemva ūkwīfunya kūlwa nguno ya kūbeeja isangī kūlwa ya Balawī.

¹³Hanuma ūkūbawīla a Balawī kwīmīīla kū būtongi bo ng'wa Alooni na bitūnja bakwe, babatūūle kūlī SEEBA babize shitambò sha kūyengeejiwa.”

¹⁴Ū mu nzīla yenīyo ūkūbiza wabakomanya a Balawī kūfuma ū mu Baisilaeli a bangī; na lūūlū a Balawī bakūbiza bane.

¹⁵Ūlū ūmala ū kūbafunya a Balawī gītī shitambò sha kūyengeejiwa, bakūbiza beela; kwandīja ikanza lyenīlo bakūyingīla ng'wiheema lya kwibilingīla kūbeeja milīmo yabo.

¹⁶Ū mu Baisilaeli pye a bose, a benabo hū bene abo bakūbiza baafunyiagwa mu būshikanu bose babize bane. Nguno naabasolile kūbiza bane a ha ng'wanya gwa babyalwa ba kwandya a bagosha, pye a babyalwa ba kwandya mu nda ja baninaabo ū mu bakīma bose a ba Baisilaeli.

¹⁷Ū mu Baisilaeli, ngosha ose ose ū wa kwandya kūbyalwa alī wane; pye nū ntugo ū gwa kwandya kūbyalwa gūlī gwane. Nakabasola nūbīīta kūbiza bane lūshikū lwene naababūlagaga pye a babyalwa ba kwandya ba bana Misili.

¹⁸Na lūūlū naabasolile a Balawī gīkī babize bane a ha ng'wanya gwa babyalwa ba kwandya ba Baisilaeli.

¹⁹Ū mu Baisilaeli a bose, a Balawī nang'winhaga Alooni na bitūnja bakwe kūlwa būtūmami bo ng'wiheema lya kwibilingīla, a benabo hū bakūbiza batūmami a ha ng'wanya gwa Baisilaeli a bose; hū bakūbiza babeeja ba isangī kūlwa nguno ya Baisilaeli a bose, batizūgwīlwa ikūla kūlwa kwegeela a hipandī lyeela.

²⁰Ū Musa nū Alooni hamò nī libità lya Baisilaeli ī lyose būbīītīla a Balawī gīt'ūmo SEEBA walī wanagīīlīla ū Musa.

²¹A Balawī biyeeja, būfula nī shizwalo shabo. Hūna ū Alooni ūbatūūla ū kūlī SEEBA gītī shitambò sha kūyengeejiwa; ūbeeja na isangī kūlwa nguno yabo, kūbīngīja būsoso.

²²Hanuma ya henaho, a Balawī biza kūbeeja ī milīmo yabo ū ng'wheema lya kwibilingīla; būbiza batūmami ha sīlīlī ya ng'wa Alooni na bitūnja bakwe. A Balawī bakīītīlwa pyī ī yose kūlenganīla nū mumo SEEBA walī wanagīīlīla Musa.

²³Ū SEEBA ūng'wīla ū Musa gīkī,

²⁴“Yīyī mihayo yīngī kūlwa nguno ya Balawī: Abo bakūyiza ū ng'wiheema lya kwibilingīla kūbeeja milīmo, bakūbiza ba myaka ya kwandīja ha makūmi abīlī n'ītanò kūja kū būtongi.

²⁵Kwike ūlū būshisha myaka makūmi atanò, shiigelile bifuule, booyī ī milīmo yabo.

²⁶Badūgije ū kūbagunanha a badūgū babo ū ng'wiheema lya kwibilingīla ūlū balībeeja ī milīmo, alīyo a boi benekīlī yaya ū kwīta ī milīmo. H'ūmo ūkūbahelela a Balawī ī milīmo yabo.”