Read Sukuma Bible 2015 – Bibilia Ilagano Lya Kale 2015 Kūbala 9 Bible Online

Kūbala 9 - Sukuma Bible 2015 – Bibilia Ilagano Lya Kale 2015 bible

Kūbala 9

¹Aho balī ng'witogolo lya Sinai mu ng'waka gwabo gwa kabīlī kūfuma kwīnga Misili, mu ng'weji gwa kwandya, ū SEEBA ūlūngalūnga nū Musa; ūng'wīla gīkī,

²“A Baisilaeli ni bizūkagwe kūshiyegela ī shigukulu sha pasaka ū ng'wikanza īlo līhelilwe.

³Bakwandya ikanza lya mhīndī gīt'ūmo īhelelilwe, lūshikū lwa ikūmi na inè ng'weji gwenūyū. Pyī ī mihayo īshikīlījiwe gīt'ūmo shilagīlo shihayīlile, kūlenganīla na kaīle ka kahelele.”

⁴Hūna ū Musa ūbawīla a Baisilaeli kūshizūkwa ī shigukulu sha pasaka na kūshiyegela.

⁵Na ng'hana aho balī ū ng'witoglo lya Sinai, lwahayūshika ū lūshikū lw'ikūmi n'inè ū mu ng'weji gwa kwandya, a Baisilaeli būgwīta ū mhayo gwenūyo. Bīīta būlī mhayo gīt'ūmo SEEBA walī wanagīīlīla ū Musa.

⁶Kwike ū lūshikū lwenūlo, bamò babo batīliile ī pasaka, baalī baasosohala kūlwa nguno ya mimba gwa munhū nebe. Na lūūlū biza ū kūlī Musa nū Alooni ū mu lūshikū lwenūlo dūhū.

⁷Būshika būng'wīla ū Musa, “A bise tūlī na būsoso kūlwa nguno ya mimba gwa munhū, alīyo nahene nibūlī tūleke ū kūmfunīja ū SEEBA ī shakwinha hamò na a Baisilaeli a bangī ū ng'wikanza īlo līhelilwe?”

⁸Nang'hwe ū Musa ūbawīla, “Lindīīlagi kūshisha napandīke būtongeeji kūfuma kūlī SEEBA ū mu mihayo ying'we.”

⁹Hanuma y'ikanza ū SEEBA ūng'wīla ū Musa,

¹⁰Bawīlage a Baisilaeli gīkī, “Ūlū ūmò wing'we nūūlū ūmò wa mu shibyalīlwe shing'we ūsosohala kūlwa nguno ya mimba, nūūlū ūbiza atīho nguno alī mu lūgendo, ū ng'wenūyo akūbiza ataalī azunīlīgije ū kwīyegela ī pasaka ya ng'wa SEEBA.

¹¹A banhū ba gīko bakwīyegela ī pasaka mhīndī ya lūshikū lwa ikūmi na inè mu ng'weji gwa kabīlī. Hū ī likanza īlo bakwīlya ī ng'holo ya pasaka hamò nū ngatī ūyo gūtī na shibimbya, na makūbī malūlū.

¹²Ī nyama yenīyo yaya ū kwīlekeela kūshisha ntondo yaho; hangī yaya kūbīnza iguha lyayo nūūlū līmò. Nabo shibigelilwe kwīlya ī pasaka kūlenganīla nī shilagīlo īsho shitūūlilwe ho.

¹³Kwike ūlū munhū atī na būsoso bose bose, nūūlū atī mu lūgendo, alīyo ūleka dūhū ū kūsangīla na a banhū a bangī ū kwīlya ī pasaka, ū ng'wenūyo shiigelile akomanyiwe wīnjiwe ū mu banhū bakwe. Nguno atamfunīgije ū SEEBA ī shakwinha shakwe ng'wikanza īlo lehelilwe. Ū munhū wa gīko akūgabūūcha wei ng'wenekīlī a makoye ga būkenaagūji wakwe.

¹⁴Hama ū ngeni ūyo akwikalaga mu bung'we ūlū nang'hwe ūtogwa kwīlya ī pasaka, shing'wigeleelilwe ashilondeele ī shilagīlo īsho shitūūlilwe ho, hamò na a kaīle kaaho. Mukūbiza na shilagīlo sha mbika īmò kū banhū bose, ū kū babisa nū kū baana byalwa.”

¹⁵Kwandīja ū lūshikū lwene līkīmīlījiwa ī lipandī lya kwikala, ī liheema lya būkaanīji, ilunde līkalīfīīkīja ī liheema lyenīlo. Alīyo ū kwandīja mhīndī kūshisha kū ntondo yaho dilū, ī lilunde lyabonagwa gītī moto a h'igūlya y'ipandī lya kwikala.

¹⁶Jikabīta shikū ningī līkūbonagwa gīko; ī dilū lyabiza ilunde līkundīkīgije ho, alīyo ī mhīndī gwabiza gītī moto.

¹⁷Ī lilunde lyabizaga ūlū lyīnga a hiheema, a Baisilaeli baasambūlaga ī ng'hambī bandya lūgendo; hama hose hose aho līlaakalembeele ī lilunde lyenīlo, a Baisilaeli nabo baatūūlaga henaho ī ng'hambī yabo.

¹⁸A Baisilaeli baasambūlaga ī ng'hambī yabo bandya lūgendo kūlwa shilagīlo sha ng'wa SEEBA; na baatūūlaga ī ng'hambī yabo kūlwa shilagīlo shakwe. Pye ū ng'wikanza īlo lyalī līlembeelile ī lilunde a hiheema, nabo bikalaga a ha ng'hambī yenīyo.

¹⁹Ī lilunde nūūlū lyūmala shikū ningī līlembeele a higūlya y'ipandī lya kwikala, a Baisilaeli baalī batīngaga a ha ng'hambī yenīyo, nguno baalī bashiigwile ī shilagīlo sha ng'wa SEEBA.

²⁰Makanza gamò ī lilunde lyalembeelaga a higūlya y'ipandī lya kwikala shikū ngeehu dūhū. Būlī hene ūlū būtūūla ng'hambī bikalaga ho mu kūlondeela shilagīlo sha ng'wa SEEBA, na bīnjaga ho ī ng'hamī yabo kūlwa shilagīlo sha ng'wa SEEBA.

²¹Nīyo makanza gamò ī lilunde lyalembeelaga mapandī gangī kwandīja mhīndī, kūshisha ha ntondo dilū dūhū; ūlū lyūbūūka ī dilū nabo būbūūka. Ikanza lyose lyose aho lyūbūūkīla ī lilunde, ībize līīmi nūūlū būjikū; nabo bakwandya lūgengo.

²²Ī lilunde lyabizaga ūlū lyūlembeela a higūlya y'ipandī lya kwikala ikanza lya shikū ibīlī, nūūlū ng'weji gūmò, nūūlū ng'waka ngima, a Baisilaeli bikalaga ho a ha ng'hambī yenīyo, baalī batasaamaga, alīyo bikalaga nzūgūlūmatū, ūlū lyūbūūka dūhū ī gīkī, nabo haho na haho bandya lūgendo.

²³Ī ng'hambī yabo baatūūlaga kūlwa shilagīlo sha ng'wa SEEBA, hama nū kwīsambūla ī ng'hambī yabo na kwandya lūgendo, bīītaga gīko kūlwa shilagīlo sha ng'wa SEEBA. Baalī bashiigwile ī shilagīlo sha ng'wa SEEBA, īsho walī wabinha mu nzīla ya ng'wa Musa.