Read Sukuma Bible 2015 – Bibilia Ilagano Lya Kale 2015 Mika 1 Bible Online

Mika 1 - Sukuma Bible 2015 – Bibilia Ilagano Lya Kale 2015 bible

Mika 1

¹Ūyū gwene mhayo go ng'wa SEEBA ūyo gūkang'wizīīla Mika muna Moleshesi mu makanza ga būsugi wa batemi ba mu sī ya Yuda; ba Yotamu, Ahazi na Hezekia. Shalī shakoolechiwa īsho akashibona kūlwa mihayo ya Samalia na Yelusalemu.

²Bing'we banhū igwagi, degelekagi bose pye; bebe sī nī shose īsho shilī mulī bebe, lembeelagi ū Seeba MULUNGU amukaanīlīje; ū ū SEEBA kūfuma mu hekalu yakwe neela.

³Ū SEEBA aliza kūfuma kwipande lya wikalo bokwe. Izile, alika akūpandaga ha mapande ga higūlya ga sī.

⁴Ī ngūlū akūjipandaga jaaba gītī būgondo bokuumiwa moto, na njonga jikūdūlīkaga gītī minzī gakūholoolaga galīholongota ha ntulumenho.

⁵Pyī ī yenīyī īlī kūlwa nguno ya būkenaagūji bo ng'wa Yakobo, nguno ya shibi sha numba ya Isilaeli. Ū būkenaagūji bo ng'wa Yakobo ni kī? Būtī Samalia? Al'ī lipande lya higūlya lya Yuda h'ī kī? Ītī Yelusalemu?

⁶“Alilūūlū ī Samalia nakwīgalūcha kūbiza matūūgo ga makambagūkīle, ipande lya migūnda ya mizabibu. A mawe gaamo nakūgasalang'hanīja mu njonga, Ī misingi nakwīsīmbīīla yitende ha ng'wape.

⁷Ī shiikolile sha kūlamiwa shaamo shikūpondagūlwa shibelagūke; pye a manong'ho ga mu hekalu gakūpya moto. Mashigīmbo gaamo nakūgakenaagūla pye a gose. A manong'ho gaamo gakilongaga mu kwanukūla mheela ja būmalahya, gakūtūmama hangī kūlwa nīmo gwa būmalahya.”

⁸Kūlwa yose yenīyī nakūlīla, nakūtūla ng'hūngū; nīyo nakūshimīza nalī dūūhū, ndūhū nūūlū shilatū ū kū mhambala. Nakwimookula gītī nyamhawa, hangī nakūhiimīla gītī ging'hi.

⁹Nguno a magulaagīje ga Samalia gatī na būpīlile, nīyo gaashikile nī Yuda. Gaashikile kū mibita ya banhū bane, galī Yelusalemu henekīlī.

¹⁰Ī yenīyī mutizīkumūcha ū mu Gaasi; yaya gete ū kūlīla. Ū mu Beti-ofula gala galagi mu lūbuubu.

¹¹Bing'we bana Shafili[1] shimīzagi dūūhū, jagi na magooke ging'we, a bana Zaanani batūfuma ī hanze. Ī Beti-Ezeli īlīīlīla ng'hūngū, yataajiwe ū būdūla bo kūkūlang'hana.

¹²A bikaji ba Malosi balīīgalagala kūlwa kūsaatwa kūtaale, balindīīlile būgunanhwa; būkenaagūji wizile kūfuma kūlī SEEBA, booshikile kū mita gwa Yelusalemu.

¹³Bing'we bana Lakishi jitungīlījagi magogoteni ī falasa, nguno a bing'we hū ng'walī bandya ba shibi ū mu Sayuni, ū būkenaagūji bo mu Isilaeli būkandīja mu bing'we.

¹⁴Alilūūlū, ū nzengo gwa Moleshesi-gasi mukūgūlekela shakwinha sha kwilaga nago. Ū nzengo gwa Akizibu gūtūbiza na būgunanhi ū kū batemi ba Isilaeli.

¹⁵Nakūsamīlīja mpyeni amusange a bing'we bikajia ba Molesha. Ūyo al'ikūjo lya Isilaeli akwiza ī Adulamu.

¹⁶Imoogagi mapala kūlwa būpīna nguno ya baana bing'we abo mubatogilwe; ihalūlagi mubize na wanga gītī mbeeshi, nguno bakūng'wīngīla, bakūtwalwa mu būsaamiwa.