Read Sukuma Bible 2015 – Bibilia Ilagano Lya Kale 2015 Mika 3 Bible Online

Mika 3 - Sukuma Bible 2015 – Bibilia Ilagano Lya Kale 2015 bible

Mika 3

¹Hūna nūhaya, “Degelekagi bing'we batongeejai ba ng'wa Yakobo, bing'we abo mulī basugi ba numba ya Isilaeli. A bing'we ītang'wigeleelilwe mumane kalamulīle kagoloolile?

²Nguno ū wiza mubūkolilwe ng'ūbūtogwa ū būbi, a banhū bane mukabakuubūlaga makūnza ng'wayūjidutūūla ī nofu a ha maguha gabo;

³mukalyaga nofu ja mibīlī ya banhū bane, na kūbasaanula ikūnza lyabo. Na a magūha gabo mukagabīnzagūlaga, ng'wayūbabbutagūla mapingili mapili gītī nyama ja kūzuga mu sabiga!”

⁴A henaho bakūnīlīīla ū SEEBA, alīyo atūbashokeja. Ū ng'wikanza lyenīlo akūbūbisa ū būshū bokwe ū kūbo kūlwa būbi ūbo bawīta.

⁵Ū SEEBA alīhaya gīkī, “Balīho bahangi bakabajimīījaga a banhū bane kūlwa kūhaya ‘mhola’, ūlū būpandīka ilya; alīyo ūyo ūleka kūbinha shose shose bakamūūkījaga wanishi.

⁶A bing'we mukūsangwa būjikū būtī wa kūpandīka shakoolechiwa, mukūgīlwa giiti shitī sha kūbona nūūlū mu nzīla ya būchūja. Ī līīmi līkūbagwīla a bahangi benabo, ū lūshikū lūkūbiza giiti ū kūbo.

⁷A baboni bakūding'wa minala na a bachūja bakūgooka. Pye a bose bakwikundīkīja ū būshū, nguno lītīho ishosho lya kūfuma kūlī Mulungu.”

⁸Alīyo ū nene nookalile būdūla, hangī nalī na Moyo o ng'wa SEEBA, na kalamulīle kagoloolile, hamò na nguzu kūlwa kūnkumūkīja Yakobo būkenaagūji bokwe, kūng'olekeja Isilaeli shibi shakwe.

⁹Igwagi bing'we batongeeji ba numba ya ng'wa Yakobo, bing'we basugi ba numba ya Isilaeli, abo mukagayīlījaga būlamuji būgololoku, na kwīchamya pyī īyo ītūngīlīgije;

¹⁰abo mukīzengaga ī Sayuni mu nzīla ja kūbūlaga banhū, nī Yelusalemu mu nzīla jabūbi.

¹¹A batongeeji baamo bakalamulaga kūlwa kūhongwa, a bagabīji baamo bakalangaga kūlwa kwinhwa mheela, na a bahangi baamo bakahangaga kūlwa kwanukūla hela. Alīyo bakansendamīlaga SEEBA kūnū bakūhayaga, “Ū SEEBA atī hamò nise? Ndūhū gwabūbi gwa kūtūgwīla.”

¹²Alilūūlū, kūlwa nguno ying'we Ī Sayuni īkūlīng'wa gītī ilaale, ī Yelusalemu īkūbiza matūūgo ga makambagūkīle, ū lūgūlū lwa hekalu gītī shigūlū shokalīīlwa masaka.