Read Sukuma Bible 2015 – Bibilia Ilagano Lya Kale 2015 Mika 7 Bible Online

Mika 7 - Sukuma Bible 2015 – Bibilia Ilagano Lya Kale 2015 bible

Mika 7

¹Nagwīlwa mayanga būlī! Ī haha nabange gītī ngoodeleja wa shisuumo mu makanza ga kūpūmbīīla mizabibu mu migūnda; ndūhū ī zabibu ja kūlya, ndūhū ī tiini ī nonu ījo najitogilwe, jitīho nūūlū ja mu lūpī.

²Abo bantogilwe Mulungu batīho, Ī haha atīho ntūngīlīja nūūlū ūmò. Pye a banhū ū gwabo kūkūngīla dūhū, ng'hūmbū jabo kwita mininga; būlī ng'wene na ntego gwakwe akūnkūngīlaga ndūgūye.

³A makono būbīlī wago gamanile kwīta yabūbi; ū nsugi ng'wene nchooji wa manong'ho, ū namuji nang'hwe agongile kūhongwa; a ba būdūla bakalagījaga dūhū Īsho batogilwe shītwe; bose pye balī na long'we īmò.

⁴Ū wa lūkumo lwawiza ū mu bose ng'wayī no gīt'igwata, ū ntūngīlīja kūbaheeba pye wabūbi kūtinda ngītīli ya ming'hwa. Ū lūshikū lwa bahūgūji bako lwashikaga, ū lwa ng'wa Mulungu kūkūgeniha. Ī haha balī mu kūzwangana.

⁵Līt'ikanza lya kūnsanya ng'wiyo, nūūlū kūng'wisagīlwa nwani ng'wiyo. Ikanza lya kwilang'hana mu mihayo ya kūhooya nūūlū na nkīma ūyo ūkalaalaga ha būlīīlī būmò nang'hwe.

⁶Nguno līl'ikanza lya ng'witūnja kūndalaha ise, na nshīke kūng'ūbūkīla nina, nū ng'wīnga kūng'ūbūkīla nina būkwi; nīyo a banishi ba ng'wa munhū balī abo akwikalaga mu kaya īmò nabo.

⁷Alīyo ū nene nalolile mu kūng'wisagīlwa SEEBA, nanindīīlile Mulungu Mpīja wane; ū Mulungu wane akūniigwa.

⁸Bebe ng'wanishi wane, yaya ū kwikumīlīja mu kūnidalaha! Nguno nūūlū īkī nagwile, alīyo nakūbūūka dūhū. Nūūlū īkī nalī mu giiti, alīyo ū SEEBA akūbiza isana lyane.

⁹Īkī nang'hūba ū SEEBA, nakūgūbūūcha ū nsango gwakwe kūshisha anilwīlīīle ū mu kwiyanda kwane, nī ng'hana yane ayīguzuhye. Akūnifunīja ha ng'wape nabize ng'wisana; nakūbūbona ū būtūngīlīja bokwe.

¹⁰Hūna a banishi bane bakūbona bagwīlwe magooke. A miso gane gakūmona wagwa hasī ūyo wikalaga ūniwīla gīkī, “Ū SEEBA Mulungu wako n'alī halī?” Nīyo nī haha akūpandagīlwa hasī gītī būlolo mu mapanda.

¹¹Ū lūshikū lwa kūjizenga ī ndugu jako lūkūshika, lūkūbiza lūshikū lwa kūgalīhya mbīmbī jako.

¹²Ū mu lūshikū lwenūlo banhū bakwiza kūlī bebe, bakūfuma Ashulu na kū mizengo ya Misili; kwandīja Misili kūshisha kū mongo gwa Fulati, na kūfuma nyanza īyī kūshisha kū nyanza yīngī, kūfuma lūgūlū ūlū kūshisha kū lūgūlū lūngī.

¹³Ī sī īkūsaaga buyīkī kūlwa bikaji baamo, kūlwa nguno ya matwajo ga shītīle shabo.

¹⁴Badīīmage na nang'ha gwako a banhū bako, Ī lidaale lya wingīji wako īlo līkwidīīmaga iyene kū matogolo, kū madīīmīlo ga maswa mingī.[7] Ī lidaale lyako kalīdīīmīlage Bashani na Gileadi, ūmo wītīlaga shikū ja kale.

¹⁵“Nakūboolekeja ī mihayo yane ya kūkumya, gīt'ūmo yalī mu shikū ja kwīnga kwako Misili.”

¹⁶A mahanga gakūbona gagooke, ū būdūla waago boshilaga gete. Bakūtūūla makono kū milomo, na a matū gabo gakūchiba.

¹⁷Bakūlamba lūbuubu gītī nzoka, gītī shiseeng'wa sha kwigwesa hasī. Bakūpuluka ū mu mapilinga gabo bakūdetemaga, bangalūkīle SEEBA Mulungu wise mu boobà, nū bebe bakūkogoha no.

¹⁸Alīho Mulungu kī wa kūbiza gītī bebe, ūyo akalekejaga shibi na kūkīlanhya būhūbi wa banhū abo bashiigīīla mu banhū ba wingīji bokwe? Ū bebe ūtasaayaga ilalī, ūyejiwe na būchīīji wa shigongo.

¹⁹Ūkūtūchīla shigongo hangī, Ī shibi shise ūkūshipandagīla hasī, ū būbi wise ūbūponye kūle mu būjiba bo nyanza.

²⁰Ūkūbiza wa ng'hana ū kūlī Yakobo, ū Abulahamu ūkūnchīla shigongo, ūmo walī wabisagīīgīja bakūlūgenji bise shikū ja kale mu kwilahīla.