Read Sukuma Bible 2015 – Bibilia Ilagano Lya Kale 2015 Nahum 2 Bible Online

Nahum 2 - Sukuma Bible 2015 – Bibilia Ilagano Lya Kale 2015 bible

Nahum 2

¹Ninawi, aliza ng'ūbūki kūkūkomagūla, jilang'hanage ī ng'hambī jako ja kūpīlīla, kalalīlaga ū kū mapanda, ipandage chanda, ūjitūmamīle pyī ī nguzu jako!

²Ū Seeba akūlīshosha ī likūjo lya ng'wa Yakobo ūmo lyalī ikūjo lya Isilaeli, nūūlū īkī bakenaagūji bīnja pyī ī shikolo, nī mizabibu yamo bīkenaagūla.

³Ī mūda ja bashilikale bakwe jichaagije būūza, nī shizwalo shabo shaza. A magogoteni ga būlūgū galī mu ngīlīlī ja wilondeele londeele, Ī chūma shikūteemagīlaga gītī moto. Machimu ga mitī ya mizule galīhubengwa.

⁴A magogoteni ga būlūgū gakwibisanyaga ū mu mapanda, galībīta būlī kwene ūko bakibilingīlaga banhū, kūnū gūng'weka gītī moto, gakūchwelemukaga kūnū na kūnū gītī lūlabi.

⁵A bashilikale bakwe alībitana baaja bakwipamagūlaga ū mu nzīla. Balihuuta bajile kū ndugu ja nzengo, kūjūtūūla makīgījo ga kūlang'hanīla.

⁶A makīgījo ga mongo gasemagūlwa, likījiwa mongo ī likūlū.

⁷Gwalagīlagwa gwa gīkī ū nzengo gūsaamiwe, pye a bikaji baamo bīnjiwe. A banhya baamo a basese balīhiimīla gītī mhunda, kūnū bakwitimbaga ha shikuba.

⁸Ī haha ī Ninawi īlī gīt'ilambo, minzī gaamo gakūhūūmaga gajile. Balīyoganya būhaya, “Bing'we shokagi, shokagi!” Alīyo atīho wa kūnyamuka nūūlū ūmò.

⁹Jīnjagi ī hela mutwale! Nī zahabu īnjagi mutwale! Ī sabo ningī no jitī ja kūmala, sabo ja būlī mbika jilīmo ū mu mabīkīlo!

¹⁰Ī haha ndūhū mo shikolo, shose pyī shīnjiagwa, heelaga mo pe pe pe! Ī ng'holò ja banhū jaabaga, a mazwi gayogomaga, Ī mibīlī īlīdetema, būlī būshū bohīndīhalaga.

¹¹Līlīhalī lūūlū ī haha ī līpilinga lya shimba, ī lihalo ūmo giikalaga mamunda ga shimba, ūko shimba ng'hīma na ng'hosha jalī jitogilwe kūja na baana baajo, ndūhū na wa kūjogohya?

¹²Ī shimba ng'hosha yabūlagaga ndimu, mamunda gayo gapandīka shakūlya; yabīnzaga nhingo ja shihwīng'wa, Īkūmūlagīlaga ng'wichaayo; yokaja mahalo gayo īsho yabūlagaga, a mapilinga gayo gookala nyama ja kūdima yoi.

¹³Ū SEEBA wa Būdūla bose alīhaya, “Nalī na wilwisha nang'ho, a magogoteni gako ga būlūgū nakūgapemba moto gabize lyochi, ī shimba jako ī songi nakūjimala bo līlūshū. Atūkūlekeelela sha kūhwīng'wa ū mu sī. Na a malaka ga batūmījiwa bako gataligwiwa hangī.”