Read Sukuma Bible 2015 – Bibilia Ilagano Lya Kale 2015 Nahum 3 Bible Online

Nahum 3 - Sukuma Bible 2015 – Bibilia Ilagano Lya Kale 2015 bible

Nahum 3

¹Nzengo gwa babūlagi ba banhū, gūlī mu kwihīga kūtaale; nzengo gūsugilwe būlomolomo, gūtamalaga būsambo, na batashilaga mo biboneelwa!

²Tambū jikūkaanagūkaga moi, yoge ya madandali gakūpilingitaga, mitindo ya falasa jikūgidingaga, miding'himo ya magogoteni ga būlūgū gakūligityaga!

³Bashilikale bakwilibanhyaga, malūshū gakūng'weng'wetaga, na machimu gakūteemagīlaga! Banhū bingī no balīgulaajiwa, matūūgo na matūūgo ga bafu, mibimba ītī na būbalīle, a banhū bakwipamaga mibimba.

⁴Yose yenīyī īlī kūlwa nguno ya wīmīlīzu bo ng'wa malahya ntaale, ū nduti wa balogi na balogi, ūyo walī agahūmbūūlile mahanga mu nguzu ja būmalahya bokwe, na a banhū wabadutaga mu būdūla wa būlogi bokwe.

⁵Ū SEEBA wa Būdūla bose alīhaya, “Nalī na wilwisha nang'ho, nakūkūkunūja ī līlinda lyako līkūkundīkīje ū kū būshū wako. Ī dūūhū yako nakwīyoolecha kū mahanga, mabūtemi gakwīyiloleela Ī minala yako.

⁶Nakūkūmatīīla būsoso, nakūkwisaaba kūbiza wa kūdalahwa nakwīte kūbiza wa kūgekemaja banhū.

⁷Būlī bene bakūyūkūbona bapeela; kūnū bakwiwīlaga, ‘Ī Ninawi ītī na shose shose yabipile no, nani akwīlīla?’ Nakūpandīkīla halī ū wa kūkūlūngūja?”

⁸Ū bebe hū ū kūgūheeba ū nzengo gwa Tebesi, ūyo gwalī kū ng'hilimvwa ya mongo gwa Nile na gūpīndiwe minzī? Ū mongo hū gwalī ngītīli ya nzengo gwenūyo, a minzī ndugu ya kūgūkīngītīīla.

⁹Gwapandīkaga nguzu ningī no kūfuma sī ja Esiopia na Misili; Puti na Libya jal'isangī nago.

¹⁰Alīyo nahene gūkading'wa a banhū baamo būsaamiwa. A beleele batwalagwa kū nhūng'wanhīlo ja mayīla, baakataalīkwa hasī baatandagūka. A batongeeji baamo būyūgabanhwa bo kweselwa mbale, a banhū ba ng'wene a bataale būtungwa nhendele pye a bose.

¹¹Alilūūlū, nū bebe ūkūng'wa shikoji shikūkole; ūkūja hanhū kwibisa, ūkūmpeela ū ng'wanishi ūje ūkūkoobaga ha kūpīlīla.

¹²Ī ng'hambī jako ja kūpīlīla jilī gītī mitiini īyo na matwajo gayo ga kwandya gaapile, ya kūhayūtinginyiwa a matwajo gūyūmodagūka gaashikīla mu milomo ya balyi.

¹³Balolage a bashilikale bako, pye bakīma! Ī mibita ya sī yako īlī ng'waje ū kū banishi; A malugalīlo gayo ganogotejiwe moto.

¹⁴Dahagi minzī ng'wibīkīle kūlwa makanza ga kūgobanīlwa banishi, jiguzuhyagi ī ng'hambī jing'we ja bashilikale! Lubagi būlongo na magūlū ging'we mubeeje madafaali, jichibagi ī ndugu ūmo jitandūkile!

¹⁵Ū ng'wenūmo h'ūmo gūkūmulīīla ū moto; līlūshū līkūmumalīla ng'wenūmo, nīyo līkūmukenaagūla gītī bana ng'hūmbī. Ibyalanagi gītī ng'hūmbī, mukwīle gītī njige!

¹⁶Abo mukisūlūgījaga nabo bingī no, nīyo batī ba kūbala, leba nī sonda. Alīyo bakīlyaga ī sī gītī njige hūna baalala bajile bīleka pe.

¹⁷A batongeeji bing'we babange njige, a basugi bing'we batikīlile na madaale ga njige, ūmo jikalamatīlaga ha ndugu mu lūshikū lwa mbeho; kwike lyakūhayūsasanuka ī līīmi jikalalaga jaaja, alīyo atīho wa kūmana ūko jikajaga.

¹⁸Ee bebe ntemi wa Ashulu, a badīīmi bako balaalile tūlo, a banikūlū bako balambalalile būlembeela. A banhū bako basalang'hanīlile kū ngūlū, na atīho wa kūbakuminga.

¹⁹Atīho wa kūkūpīja a malonda gako; Ī ligulaagīje lyako līkūkūbūlaga. Būlī ng'wene ūyo akwigwaga ī mihayo yako akūtūlaga ng'hūbi kūlwa kūgwishiwa kwako, nguno nani ūyo ataalī kūbūloja ū wiboneeji wako wa shikū jose?