Read Sukuma Bible 2015 – Bibilia Ilagano Lya Kale 2015 Habakuki 1 Bible Online

Habakuki 1 - Sukuma Bible 2015 – Bibilia Ilagano Lya Kale 2015 bible

Habakuki 1

¹Mhayo gwa būhangi ūyo ng'hangi Habakuki akanukūla.

²Ee SEEBA, nakwiyanda kūshisha nanalī nang'ho ūtūnidegelekaga? Nibūlī nikale nūlīla nalīhaya, “Wiboneeji!” Alīyo ū bebe yaya ū kūtūguna?

³Nibūlī ūlīnīta nabone mihayo ya malofu gīkī? Nibūlī wīlekile yikale gīko dūhū ī yabūbi? Būkenaagūji na wiboneeji būlī kū būtongi bone gwa; Ī halalī ītī ya kūkalīka, ū wilemeelwa h'ūbo būsugile.

⁴Nose ī shilagīlo shitī na nīmo, ū būlamuji bo ng'hana būtī n'ilaka. A babūbi bakūbakandīkījaga a batūngīlīja; nose ū būlamuji ūbo būkūfunyiagwa būchaama chaamile.

⁵Galolage a mahanga ūbone, nīyo ūkūkumya kīngī nasho. Nguno nalīhaya kwīta mhayo ū mu shikū jako; mhayo ūyo ūtūgūzunya ūlū ūwīlwa.

⁶Nalībasamīla Bakalidayo, banhū bibonya na bangū mu kīītīle, abo bakajaga hose hose ū mu masī bakūdimaga mizengo īyo ītī yabo.

⁷Banhū ba lyogohya na ba makanji; balī na shilagīlo shabo dūhū, būlī kwene bakajaga bakūkumūchaga ikūjo lyabo.

⁸Ī falasa jabo mheeji no leba nī sūbī, hangī ng'halī kūheeba mhūūge jiilīlagwa būjikū. A bashilikale babo bakapeelaga bajile kū būtongi dūhū, a badamhīji ba falasa babo bafuma kūle. Ū kūpeela kūlala dūhū gītī mbeeshi īlikweega kūja ha mimba īkalye.

⁹Bose pye bakizaga bamanile kūkenaagūla dūhū. Ī libità lyabo līkajīlanījaga ī lyose, līkūhūūmaga gītī nyaga gwa kīya; lyaja līkūbilingījaga bading'wa gītī maseni.

¹⁰Babadalahile no a batemi, a basugi bakababbyeedelejaga. Ī mizengo īyo īzengeelilwe ndugu ja kwīlang'hana bakingīlaga mo bakūsekaga dūhū, bakīzengeelaga malinhīlo ga malongo bingīla bīdima.

¹¹Bakahūhūūtījaga gītī nshūūlūlū bang'ula bajile. Kwike balī mu kwihīga a benabo, abo nguzu jabo h'ū mulungu wabo.

¹²Ee SEEBA Mulungu wane na Ng'wela wane, ū bebe ūtī wa kūfuma kale ya welelo bose? Yaya tūtizūshila! Ee SEEBA, bebe wabinhile nīmo gwa kūfunya nsango; wabalagīlile kūhūgūla.

¹³A miso gako meela no gatī ga kwikala gūūlola būbi; ū būhūbi ūtawiyūmīlīgījaga. Hama nibūlī lūūlū wiyūmīlīje na biboneeji gīko? Nibūlī ūhuumūlile dūhū nūūlū a babūbi bakūbamilaga abo balī batūngīlīja kūbaheeba a boi?

¹⁴Ū bebe wabagalūkije a banhū kūbiza gītī shī ja mu nyanza, gītī shiseeng'wa sha mu nyanza, Īsho shitī na nsugi.

¹⁵Ū ng'wanishi wabūbi alīyūbaduta na malobo gakwe, akūbagwashaga mu ntego gwakwe, akūbabilingaga ng'wigokoolo lyakwe, wayega no na kūzalabana.

¹⁶Hūna ū ntego gwakwe wayūgūfunīja shitambò, nī ligokoolo lyakwe wayūlīzuukīja shitambò sha ng'waso gwawiza. Nguno kūfuma ū mu ntego gwakwe akapandīkanga sha kwiyeja mu būpanga bokwe, akalīīlaga mo shizeeze wigūta.

¹⁷Ū wei akwikala ūgwasha na ntego gwakwe dūhū, ikale ūkenaagūla mahanga ndūhū na kūchīla shigongo?