Read Sukuma Bible 2015 – Bibilia Ilagano Lya Kale 2015 Habakuki 2 Bible Online

Habakuki 2 - Sukuma Bible 2015 – Bibilia Ilagano Lya Kale 2015 bible

Habakuki 2

¹Leka nīmīīle ha būlolelo wane, nizūnzīke ha gūngūhu; Nalole nabone īyo akūniwīla, nī lishosho īlo nakūpandīka kūlwa wiyandi wenūbū.

²Hūna ū Seeba ūshosha: Ū mhayo gwa shakoolechiwa shenīshi gwandīkage, nīyo ūgūtūūle hape ha mbawa; ūyo atūmilwe adūle kūgūsoma wangū na kūpeela nago.

³Nguno ī shakoolechiwa shilindīīlile ikanza īlo līhelilwe; Ī shoi shilīhaya ya kū shikū ja kū mhelo nīyo shitūlomaloma na hado yaya. Nūūlū īkakeeleja, lindanaga dūhū; nguno īkwiza, Ītūdīīla ū kūshikīīla.

⁴Deebaga gīkī akwikumīlījaga, Ī ng'hūmbū jakwe jitagoloolile; alīyo ū ntūngīlīja akūbiza mpanga mu nzīla ya kūzunya kwakwe.

⁵Kwike ū walwa h'ūbo būlīngwisha; ū wei ndooshi hangī alemeelilwe ū kūlembeela. Nose īkī alī na lwahahi gītī shigila,[1] hama atigūtaga gītī lūfu, pye a mahanga akūgabilingaga gabize gakwe; na a banhū akūbadimaga a bose pye baabiza nding'wa jakwe.

⁶Batūng'wisesa pye a bose na kūyūng'wineenelegeja balīhaya, “Wimana we ūyo akilūndīkīīlaga sabo ja kwiba, na kūsabīla mu būnyeecha! Ū wei akwikala akwītaga gīko kūshisha nanalī?”

⁷Abo ūlī na magasa kūbo batūhayimanīla baachagūka būkūūbūkīla? Batūmisha bakūtinginye? Bakūkūlūbya lūbya no.

⁸Ū bebe īkī wasola sabo ja mahanga mingī bo nguzu, a banhū abo basaagīīla bakūkūtaaja nang'ho ī jako. Nguno ū bebe witagūla mininga ga banhū no; wakenaagūla sī na mizengo mingī no, hamò na a bikaji baamo.

⁹Alī mu kwihīga ū wa kūzenga kaya yakwe bo kūtūmamīla sabo ja būnyeecha, gīkī atūūle chanjo shakwe kwigūlya atizūpandīkwa mayanga!

¹⁰Ū mu kahelele kako ka kūmala banhū bingī, wīta mhayo gwabūbi no, gwa kūgoola kaya yako na kūbūponya ū būpanga wako bebe ng'wenekīlī.

¹¹A mawe ayo gazengelilwe mu ndugu gakūlīla, nī migamba īyo īlūmbīlilwe ī numba Īkwishokeja nago īkūdaayaga.

¹²Alī mu kwihīga ū wa kūzenga nzengo mu nzīla ya kūbūlaga banhū, na kwīmīlīka nzengo mu nzīla ja būkenaagūji!

¹³Ū SEEBA wa Būdūla bose atahelile gīkī ī milīmo ya banhū jilī ng'hwi ja kūpemba mu moto dūhū, na gīkī a mahanga ganogele dalali?

¹⁴Nguno ī sī īkookala būmani, kūlīmana ikūjo lya ng'wa SEEBA; gīt'ūmo nyanza yookalīlile minzī.

¹⁵Alī mu kwihīga ūyo akang'wishaga bazenganwa biye shikoji, wayūbasaamīja mabakuli na mabakuli, baang'wa kūshisha baakolwa, hūna wayūbiloleela balī dūūhū.

¹⁶A ha ng'wanya gwa kūpandīka ikūjo ūkūgooka no. Ī haha lwashikaga ū lūdīīma lwako nang'ho lūūlū! Ng'waga ūkazuule na kūzuula. Ī shikombe sha nsango kūfuma mu nkono gwa būlyo go ng'wa SEEBA shilīkwizīīla ūshing'we, ī likūjo lyako līkūkundīkījiwa magooke.

¹⁷Ū wiboneeji ūbo owīta mu Lebanoni būkūkwidīkīla nū bebe, nū būkenaagūji ūbo wajīītīla ndimu[2] būkūkūsanga mu lyogohya itaale no. Nguno wita mininga ga banhū no, wakenaagūla sī ningī na mizengo, na a bikaji baamo.

¹⁸“Ī shiikolile sha kūlamiwa shikabeejiagwa na banhū dūhū, ī gīsī shilī na fiilū kī? Nūūlū ī shigīmbo shilī na malange ga būlomolomo dūhū! Nguno ū meeja washo akasanyaga shikolo sha kūseema na makono gakwe we ng'wenekīlī; akabeejaga shiikolile shitadūgije kūlūngalūnga.

¹⁹Alī mu kwihīga ūyo akūwīlaga līntī gīkī, ‘Mishaga!’ Nūūlū iwe gīkī, ‘Būūkaga!’ Angū līdūgije kūntonga munhū? Na ng'hana ī chene lītūūlīlilwe zahabu na feza; kwike lītī na būpanga ū mulyo!

²⁰Alīyo ū SEEBA alī mu hekalu yakwe neela; ī sī ī yose shiigelile īhuumūle ū kū būtongi bokwe.”