Read Sukuma Bible 2015 – Bibilia Ilagano Lya Kale 2015 Habakuki 3 Bible Online

Habakuki 3 - Sukuma Bible 2015 – Bibilia Ilagano Lya Kale 2015 bible

Habakuki 3

¹Kūlomba kwa ng'hangi Habakuki; mu kīmbīle ka shigionosi.[3]

²SEEBA, naalwigwa ū lūkumo lwako; Ee Seeba, ī milīmo yako yanogohije. Ī hīmbūūchage nū mu shikū jise īji, wīyooleche īmanīke ū mu myaka yise; nūūlū ūpelana izūkagwa kūchīla shigongo.

³Ū Mulungu wizile kūfuma Temani, ū Ng'wela wafumile kū lūgūlū lwa Palani. Ī likūjo lyakwe līlī mu mapandī g'igūlū gose pye, nū kūkumīlījiwa kwakwe kūlī hose pye ū mu sī.

⁴Ū kwaaka kwakwe kūlī gītī kwa līīmi līkūfumaga mu dilū; ndali jikūng'wekaga kūfuma mu nkono gwakwe, ūmo abūbisile ū būdūla bokwe.

⁵Ū kū būtongi bokwe līlīko ihūūya; ū kū numa alīleka ng'henaagūla.

⁶Ūlū wīmīīla yatingina ī sī; ūlū waponya ī liso kūlola gadetema a mahanga. Ī ngūlū ja būja na būja ndo na nhaale jikapaanagūkaga na kwikīla. Ī nzīla jakwe ja welelo na welelo.

⁷Naabonile mayanga ū kū maheema ga Kushani, a bikaji ba Midiani balī mu nduha.

⁸Ee SEEBA, walī wīpelanīla myongo? Nūūlū gaalī gakūdacha mahululu ga minzī? Aho ūlīdamhīlila falasa jako na magogoteni gako ga būpyeni, walī wasaaya kūlwa nyanza?

⁹Ūkabūsola ū būta wako ūbūbanga, hūna ūlagīja masonga mingī. Ī sī ūkīholoola wīyokaja myongo,

¹⁰Ī ngūlū jūkūbona jūyūkema jikūgalagalaga. Mahūūma ga minzī mingī gūtoloma; būjiba bo nyanza būyūpogoma, mahuuli gakwiponya ng'wigūlya.

¹¹Ī līīmi nū ng'weji shīīma zīgī ū kwigūlū, nguno ya kūlabya kwa masonga gako gakūkweenukaga, na kūlwa kūteemagīla kwa būng'weku w'ichimu lyako.

¹²Ūbīta pye a hose ū mu sī mu būpelanu būtaale, ūyūgapandagīla a mahanga kūlwa būdaki wako.

¹³Ūkafuma ūja kūkomoola banhū bako, kūbapīja a babilwa maguta bako. Ūntobagūla ū ntongeeji wa kaya ya malofu. Ūng'wīngīja ī likūjo lyakwe kūfuma kū ntwe kūshisha kū mhambala jakwe.

¹⁴Ūnchima ū ntwe n'ichimu lyakwe, ng'wikanza īlo bashilikale bakwe bakiza kūtwihoolekela batūsambaaje; bakwihahambūlaga gītī gīkī babamile abo baalī bibisa kūlwa boobà.

¹⁵Ūbīta ū mu nyanza ūkwīpandagīlaga na falasa jako, ūyuuga minzī mingī.

¹⁶Nigwile ī ng'holò yane yūtininha, ū nomo gwane gūyūdetema kūlw'ilaka lyenīlo; a maguha gane gūmala ī nguzu, a magūlū gane gūyūzuguma. Ū lūshikū lwa mayanga kūlw'ihanga īlo līlītūdumīla, nakūlūlindīīla mu būlembeezu kūshisha lūshike.

¹⁷Ū ntiini nūūlū gūkaleka kūlaba, nī mizabibu yūleka ū kūtwaja; ī mizeituni nayo yūholoosha, na a malaale gūūkeela ī shilīwa; nūūlū ī ng'holo jishile ū mu numba yajo, nū mu mbīgīlī jūshila ī ng'ombe,

¹⁸alīyo ū nene nakūyegela dūhū ū mulī SEEBA, nakūnyegela ū Mulungu Mpīja wane.

¹⁹Ū Seeba wa Būdūla bose hū nguzuhya wane; hū ng'wene akagītaga a magūlū gane gabize gītī ga saala, hū ng'wene akaninhaga būdūla wa kūshimīza mu mapandī ga higūlya. Kūlwa ntongeeji wa mīmbo; Kwīmba na ndono jikūtūlagwa.