Read Sukuma Bible 2015 – Bibilia Ilagano Lya Kale 2015 Zefania 1 Bible Online

Zefania 1 - Sukuma Bible 2015 – Bibilia Ilagano Lya Kale 2015 bible

Zefania 1

¹Ūyū gwene mhayo go ng'wa Seeba ūyo gūkang'wizīīla Zefania ng'witūnja o ng'wa Kushi ng'wana Gedalia, ūyo walī ng'witūnja o ng'wa Amalia, nang'hwe ng'witūnja o ng'wa Hezekia. Jalī shikū ja būsugi bo ng'wa Yosia ng'witūnja o ng'wa Amoni ntemi wa Yuda.

²Nakūshikenaagūla pyī ī shikolo shishile a higūlya ya sī. Alīhaya SEEBA.

³Nakūbakenaagūla a banhū pyī nī ndimu,[1] ī noni ja kūlala nī shī ja mu nyanza nakūjikenaagūla jishile. A ba malofu nakūbahūlūla; nakūbamala a banhū, bakūshila ū mu sī, alīhaya SEEBA.

⁴Nakūgūgoloola ū nkono gwane nītūle ī Yuda hamò na a bikaji ba mu Yelusalemu a bose. Nakūbūkenaagūla pyī ū būshiigo wa shiilamīlīgījo sha ng'wa Baalī, na a mina ga bagabīji ba mahanga a balamya ba shiikolile,

⁵abo bakalinhaga kū numba baatuja mazwi kūlamya ibità lya sonda, na bakinamaga mu kwilahīla kūnū bakūlīhayaga lina lya ng'wa SEEBA, alīyo bakilahīlaga na mu lina lya ng'wa Moleki,[2]

⁶abo baagalūka booya kūnondeela ū SEEBA, hangī batankoobaga ū SEEBA nū kūbūūja kūlī we booya.

⁷Huumūlagi sele kū būtongi bo ng'wa SEEBA wa Būdūla bose, nguno ū lūshikū lwa ng'wa SEEBA lwegeelaga. Ū SEEBA wagolanije shitambò; na a batoneelwa wamalile kūbalaalīka.

⁸Ū mu lūshikū lwa shitambò sha ng'wa SEEBA nakūbinha nsango a basugi, na a bitūnja ba ntemi, na a bose abo bakazwalaga shizwalo ya nyageni.

⁹Ū mu lūshikū lwenūlo nakūbinha nsango pye abo bakakīlanhyaga mbawa ja ha nyango,[3] abo bakookajaga hekalu ja bamulungu babo wiboneeji na būlomolomo.

¹⁰Ū Seeba alīhaya gīkī, “Ū mu lūshikū lwenūlo kūkūbiza ho kūlīla ū kū Mita gwa Shī, na ng'hūngū īkūdulung'hanya ū kū Ng'hambī Mhya, n'ilaka lya kūpaanagūka kūtaale līkūfumīīla kū ngūlū.

¹¹Tūlagi ng'hūngū bing'we bikaji ba kū mhandī j'igūlilū, pye a basūlūjū bako bakūshila. A basūlūja abo bakang'wenhelaga hela bakūkenaagūlwa a bose.

¹²Ū ng'wikanza lyenīlo nakūtiima na talà nalole hose pye ū mu Yelusalemu, abo batakelekaga nakūbinha nsango, abo babange madika[4] ga walwa gikīndaga kū shidako, abo bakiganikaga gīkī, ‘Ū SEEBA atīta mhayo gose gose, gūbize nsoga nūūlū mi.’

¹³Ī sabo jabo bakūtaajiwa jijanwe, Ī numba jabo jikūkambagūlwa. Ī numba bakūzenga alīyo batikala mo; Ī migūnda ya mizabibu bakūlīma alīyo batīīng'wa ī divai.”

¹⁴Ū lūshikū lwa ng'wa SEEBA ū lūtaale lwegeelaga; lūlī hihī nīyo lūliza wangū no. Degelekagi! Ī ng'hūngū ya mu lūshikū lwa ng'wa Seeba īkūbiza nhaale no, ī yogè ya bashilikale ko ū kwenūko.

¹⁵Ū lūshikū lwenūlo lūkūbiza lwa būpelanu, lūshikū lwa kūzwangana na mayanga, lūshikū lwa makoye na būkenaagūji, lūshikū lwa giiti n'ilundu, lūshikū lwa malunde na giiti sha gamha,

¹⁶lūshikū lwa nhaaninga kūng'ang'aajiwa na ng'wano gwa būlūgū kūlījiwa kūlwa mizengo Īyo īpīndīlījiwe ndugu, nī ng'hambī ja bashilikale.

¹⁷Nakūbenhela kūzwanganga a banhū, bakūyūshimīza gītī babboku, kūlwa nguno ya kūng'wītīla shibi ū SEEBA. A mininga gabo gakwitagūlwa gītī lūbuubu, ū būla wabo gītī maashi.

¹⁸Ī hela nī zahabu jabo jitūdūla kūbapīja ū mu lūshikū lwa būpelanu bo ng'wa SEEBA. Ī sī yose īkūkenaagūlwa mu būdaki wa būpelanu bokwe, nguno akūbisanganīja a bikaji ba mu sī abamale pye a bose.