Read Sukuma Bible 2015 – Bibilia Ilagano Lya Kale 2015 Zefania 3 Bible Online

Zefania 3 - Sukuma Bible 2015 – Bibilia Ilagano Lya Kale 2015 bible

Zefania 3

¹Gūlī mu kwihīga ū nzengo gwa biboneeji, nzengo ngomi na nsoso!

²Gūtang'wigwaga ose ose, gūlemile kwanukūla būhūgūji. Gūtansanije ū SEEBA, hangī gūtang'wegeelaga Mulungu waago.

³A batongeeji baamo babange shimba jikūhīītaga, a basugi baamo batikīlile na mhūūge mu makanza ga būjikū, ījo jitasaajaga na shipolo sha ha ntondo.

⁴A bahangi baamo bikumīlīja; bijomboki ba banhū. A bagabīji baamo bakalīsosohajaga Ī lipandī lyeela, nī shilagīlo bakashikenaagūlaga.

⁵Alīyo ū SEEBA ūyo al'ū mu nzengo gwenūyo ng'wene ntūngīlīja; atītaga mhayo gūhūbīlile. Ntondo na ntondo akalamulaga mu būtūngīlīja, na būlī lūshikū ūlo lūliza atalebaga mu mhayo gose gose, alīyo abo batī batūngīlīja batamanile kūcha soni.

⁶Nayagaja mahanga gūjimīīla, na ng'hambī jabo ja bashilikale jūseesagūlwa. A banhū babo naabamala, nose a mapanda gabo galī dalali, ndūhū wa kūyeela yeela mo. Ī mizengo yabo yakenaagūlwa wagaya wa kūsaaga mo, ndūhū nūūlū wa ngota.

⁷Nakagūwīla ū nzengo gīkī, “Ng'hana ū bebe ūkūbiza na logohano ū kūlī nene, ūkūzunya nū kūganikīlwa.” A henaho ū wikalo bokwe ni būtakenaagūlilwe, nī misango yane ī yose n'ītampandīkile. Alīyo baalī bataalī bayegelile būbi mu yose īyo bīītaga.

⁸Alilūūlū nilindīīlagi, alīhaya SEEBA, lūlindagi ū lūshikū ūlo nakwīmīīla kwīyoolecha ī ng'hana. Naafunije būlamuji bo kūgabilinga a mahanga, nagabilinge a mabūtemi nagītīīle būpelanu bone; pye gete ū būdaki bo būpelanu bone. Ī sī pyī ī yose īkūnogotejiwa moto gwa būdaki kūlwa wilu bone.

⁹Hūna nakwīyeeja ī milomo ya banhū, bose pye badūle kūlitana ī lina lyang'wa SEEBA, bayūntūmamīla mu būsangī būmò.

¹⁰A balamya bane bakwiza kūfuma kū myongo ya Kushi, a banhū bane abo basambaalile bakūnenhela shitambò.

¹¹Ū mu lūshikū lwenūlo ūtūgooka kūlwa būbi pye ūbo wanīītīla, nguno nakūbīnja ū mu nzengo abo bakayegelaga mu wikumīlīja wabo. Ūtūbiza ng'wikumīlīja hangī ū mu lūgūlū lwane lwela.

¹²Alīyo nakūkūlekela a balyehu na a bidoohya, abo balīsanije lina lya ng'wa SEEBA.

¹³A ba būshiigo wa Baisilaeli batīta ī yabūbi; batūyomba ya būlomolomo, nūūlū ū būlemba lembi būtigela hangī ū mu milomo yabo. Bakūyūlya baalaala, na atilonga wa kūbogohya.

¹⁴Bebe Sayuni īmbaga; Ee Isilaeli, tūlaga lūpūndū! Ee Yelusalemu, yegaga ūzalabane na ng'holò yako yose!

¹⁵Ū SEEBA wakwīngīgije ū nsango gwako, wamponije kū numa ū ng'wanishi wako. Ū SEEBA, ū Ntemi wa Isilaeli, alī hamò nang'ho; ūtalogoha mayanga hangī.

¹⁶Ū mu lūshikū lwenūlo bakwīwīla Ī Yelusalemu gīkī, “Bebe Sayni ūtogohage; yaya ū kūgalekanīja a makono gako ganogoleke.

¹⁷Ū Seeba Mulungu wako alī hamò nang'ho, alī nabo ū būdūla wa kūpīja. Akūkūyegela no ū bebe, akūkūkongoola na būtogwa bokwe, akūkūyegela no na kwīmba kūlwa nguno yako.”

¹⁸Nakūwīnja ū būpīna wako ū mu makanza ga shigukulu; nguno ū gwenūyo nigo ndito ū kūlī bebe, hangī gūkakwenhelaga ibengwe.

¹⁹Abo baakūluhyaga nakūbadīlīla ū ng'wikanza lyenīlo; a balemehazu nakūbapīja, abo basambaalile nakūbabilinga. Nakūbinha ikūjo bayūkumīlījiwa ū mu sī jose ījo bibengelejiagwa.

²⁰Ū ng'wikanza lyenīlo nakūmubilinga; ū ng'wikanza lyenīlo nakūmushosha kaya. Mukūbona naamushokeja ī mbango jing'we hangī, nūng'winha n'ikūjo muyūkumīlījiwa mu banhū ba mu sī jose, alīhaya SEEBA.