Read Sukuma Bible 2015 – Bibilia Ilagano Lya Kale 2015 Hagai 2 Bible Online

Hagai 2 - Sukuma Bible 2015 – Bibilia Ilagano Lya Kale 2015 bible

Hagai 2

¹Mu lūshikū lwa makūmi abīlī n'īmò ng'weji gwa mpungatī, ū mu ng'waka gwa kabīlī gwa Ntemi Dalio, mhayo go ng'wa SEEBA gūkiza mu nzīla ya ng'hangi Hagai;

²gūhaya gīkī, “Lūngalūngaga nū nsugi wa Yuda ū Zelubabeli ng'witūnja o ng'wa Shatieli, nū ngabīji ntaale Yoshwa ng'witūnja o ng'wa Yehozadaki; na a banhū abo basaagīīla. Babūūjage gīkī,

³‘Ū mu bing'we abo ng'wasaagīīla, banani abo baalī bībona ī numba yenīyī ū ng'wikūjo lyayo ī lya kwandya? Al'ī haha mulīyībona kinehe? Ītūbonekanaga gītī dalali dūhū?

⁴Kwike nahene nūūlū ī haha Ee Zelubabeli, idadīlage,’ alīhaya SEEBA. ‘Ee Yoshwa ngabīji ntaale ng'wana Yehozadaki, idadīlage. Bing'we banhū ba mu sī īyī pye a bose idadīlagi mugwīte ū nīmo,’ alīhaya Seeba. ‘Nguno ū nene nalī hamò ning'we,’ alīhaya SEEBA wa Būdūla bose.

⁵‘H'ūmo lyaalī ī lilagane lyane ū kū bing'we aho ng'wīngaga Misili; lekagi ū kogoha, ū Moyo wane ataalī hamò ning'we.’

⁶“Ū SEEBA wa Būdūla bose alīhaya gīkī, ‘Lyasaagaga ikanza ido nalītinginye hangī ī ligūlū nī sī, pyī nī nyanza nī sī nyūmu.

⁷Nakūgatinginya pye a mahanga, shose pyī īsho mahanga gashikalalilwe shikwiza, ī numba yenīyī nakwīyookaja ikūjo,’ alīhaya SEEBA wa Būdūla bose.

⁸‘Ī hela jilī jane, nī zahabu jane,’ alīhaya SEEBA wa Būdūla bose.

⁹‘Ī likūjo lya haha ī lya numba yenīyī līkūbiza itaale no kūtinda ī likūjo lya numba ī ya kale,’ alīhaya SEEBA wa Būdūla bose. ‘Nīyo nakūlītūūlīla mhola ī lipandī lyenīlī,’ alīhaya SEEBA wa Būdūla bose.”

¹⁰Mū lūshikū lwa makūmi abīlī n'inè ng'weji gwa kenda ū mu ng'waka gwa kabīlī go ng'wa Dalio, ū mhayo go ng'wa Seeba gūkang'wizīīla ū ng'hangi Hagai gūhaya:

¹¹“Ū SEEBA wa Būdūla bose alīhaya gīkī, ‘Babūūjagi a bagabīji ūmo shihayīlile ī shilagīlo:

¹²Ūlū munhū ūbunga mu lūpembe lo ng'wenda gwakwe nyama īlombelilwe yūbiza neela, hūna ū lūpembe lwenūlo lwikuumya na būgalī nūūlū ikūbī lya kūlīīla, nūūlū sha kūng'wa, nūūlū maguta, nūūlū shilīwa shingī shose shose, angū ī shenīsho shikūbiza sheela?’” A bagabīji būshosha balīhaya, “Mm, yaya.”

¹³Hūna ū Hagai ūhaya hangī, “Al'ūlū munhū wikuumya na mimba ūsosohala, hūna ūshikuumya shimò sha shikolo shenīshi; kinehe, shikūsosohala?” A bagabīji būzunya balīhaya, “Ee shikūsosohala ng'hana.”

¹⁴Hūna a henaho ū Hagai ūhaya, “H'ūmo īlī nū kū banhū aba nī lihanga lyenīlī ū kū būtongi bone,” alīhaya Seeba. Shose shose īsho bakwīta nūūlū īsho bakūnifunīja shilī na būsoso.

¹⁵“Ī haha gwiganikagi chiza ū gwenūyū kwīngīīla lūshikū lwenūlū na kūja kū būtongi; ng'wīyideedeng'hanyī ī mihayo ūmo yalī, aho iwe lyalī lītaalī kūtūūlwa higūlya y'iwe lyichalyo ū mu hekalu ya ng'wa SEEBA.

¹⁶Munhū wajaga ha shise sha būsīga gīkī apandīke ngele makūmi abīlī, alīyo wagelela ikūmi dūhū. Nūūlū ūngī ūja kwibīkīlo lya divai gīkī akakenene jūbba makūmi atanò wapandīkaga makūmi abīlī dūhū.

¹⁷Ī milīmo ying'we ya makono ū kū migūnda nīkenaagūlaga na lūyaga lūkalamuku, kūsala madūūtū na mbula ya mawe, alīyo nahene mutashokile ū kūlī nene,” alīhaya SEEBA.

¹⁸“Kūfuma lūshikū ūlū, ū lwa makūmi abīlī n'inè ng'weji gwa kenda, lwiganikagi chiza ū lūshikū ūlo nsingi gwa hekalu ya ng'wa SEEBA gūkasīmbīlwa. Iganikagi chiza:

¹⁹Ī gīsī mulī na shilīwa ū mu mafuma ging'we? Nguno kūshisha haha ī mitī gītī, mizabibu mitiini mikomamamnga, nī mizeitunu ītī na matwajo.” Alīyo kūfuma lelo īyī nakūmufuuha.

²⁰Ū mhayo go ng'wa Seeba gūng'wizīīla hangī ū Hagai lūkangala lwa kabīlī ū mu lūshikū lwa makūmi abīlī n'inè lwa ng'weji gwenūyo;

²¹gūūhaya: Ng'wīlage ū Zelubabeli, ū nsugi wa Yuda, gīkī nakūlītinginya ī ligūlū pyī nī sī.

²²Nakūgasalingūla a masumbī ga būtemi, nabīnzagūle na mabūdūla ga būtemi wa mahanga. Nakūgwisha magogoteni ga būlūgū hamò na badamhīji baago; ī falasa jikūgwa na a badamhīji baajo, būlī ng'wene akūbūlagwa na līlūshū lya ndūgūye.

²³Ū SEEBA wa Būdūla bose alīhaya, “Ū mu lūshikū lwenūlo, nakūkūsola ū bebe ntūmami wane Zelubabeli, ng'witūnja o ng'wa Shatieli,” alīhaya SEEBA, “nakūkwīta ūbize gītī pete yane ya būsugi, nguno naakūsolile ū bebe, alīhaya SEEBA wa Būdūla bose.”