Read Sukuma Bible 2015 – Bibilia Ilagano Lya Kale 2015 Zakalia 1 Bible Online

Zakalia 1 - Sukuma Bible 2015 – Bibilia Ilagano Lya Kale 2015 bible

Zakalia 1

¹Mu ng'weji gwa kanaane ng'waka gwa kabīlī gwa būsugi bo ng'wa Dalio, mhayo go ng'wa SEEBA gūkiza kūlī ng'hangi Zakalia ng'witūnja o ng'wa Belekia ng'wana Ido; gūhaya gīkī,

²“Ū SEEBA walī wabadakīīla no a bakūlūgenji bing'we.

³Alilūūlū, bawīlage a banhū, Ū SEEBA wa būdūla bose alīhaya gīkī, ‘Nishokelagi nene,’ alīhaya SEEBA wa Būdūla bose, ‘nū nene nakūmushokela a bing'we,’ alīhaya SEEBA wa Būdūla bose.

⁴Yaya ū kūbiza gīt'ūmo baalī a bakūlūgenji bing'we, abo bahangi ba kale bikalaga bakūbawīlaga, Ū SEEBA wa Būdūla bose alīhaya gīkī, ‘Galūkagi mulekane nī nzīla jing'we ī jabūbi, nī shīītīle shing'we ī sha malofu.’ Alīyo batabigwile, nūūlū kūnidīlīla ū nene yaya, alīhaya SEEBA.

⁵Al'ī haha balī halī lūūlū a bakūlūgenji bing'we? Nūūlū a bahangi, balī ba kūshinga ilalī?

⁶Alīyo īyo nīlagīlaga mu mihayo yane na shilagīlo shane, ītabapandīkile a bakūlūgenji bing'we gīt'ūmo nabalagīīlīlaga batūmami bane a bahangi? “A henaho būshosha balīhaya, ‘Ū SEEBA wa Būdūla bose watwītīla īyo ītwigeleelilwe kūlwa nzīla na nhūngwa jise, gīt'ūmo walī ahelelile kwīta we ng'wenekīlī.’”

⁷Lūshikū lwa makūmi abīlī n'inè ng'weji gw'ikūmi na gūmò, ūyo gūkitanagwa ng'weji gwa Shebati; gwalī ng'waka gwa kabīlī gwa būsugi bo ng'wa Dalio, mhayo go ng'wa SEEBA gūkiza kūlī ng'hangi Zakalia ng'witūnja o ng'wa Belekia ng'wana Ido.

⁸Nakabona shakoolechiwa mu makanza ga būjikū; kwimanīla ū kū būtongi bone wīmīīla munhū adamhīlile falasa yaaza! Walī wīmīīla mu mitī ya bonji būsoga, mu ntubīlo gwa longa lo minzī. Ū kū numa yakwe jalīho na falasa jingī, jaza, ja buluge, na jaape.

⁹Nūbūūja, “Baba kī ī jenīji?” Ū malaika ūyo waniyombyaga ūniwīla, “Lembeeshaga nakoolekeje balī ba nani a benaba.”

¹⁰Ū munhū ūyo olī wīmīīla mu mitī ya bonji ūshosha alīhaya, “A benaba balī abo SEEBA walī wabatūma kūja hose hose ū mu sī.”

¹¹Hūna būng'wenhela mhola ū malaika ūyo walī wīmīīla mu mitī ya bonji; būhaya, “Twamala ū kūbīta hose pye ū mu sī, twabona gīkī pyī ī sī īlembeelile, hangī īlī mu mhola na kaholele.”

¹²Hūna ū malaika o ng'wa SEEBA ūhaya, “Ee SEEBA wa Būdūla bose, kūshisha nanalī ūkwikala ūtūgūsaatagwa ū nzengo gwa Yelusalemu nī mizengo ī yīngī ū mu Yuda, īyo washishaga myaka makūmi mpungatī wīpelanīlile?”

¹³Hūna ū SEEBA ūtūmamīla mihayo milyehu na ya kūlūngūja, akūng'wīlaga ū malaika ūyo walūngalūngaga nū nene.

¹⁴Na ng'hwe ū malaika ūyo walūngalūngaga nane; ūniwīla “Gūūyū mhayo gūhayage, Ū SEEBA wa Būdūla bose alīhaya gīkī, ‘Nalī na wilu būtaale no kūlwa nguno ya Yelusalemu na Sayuni,

¹⁵alīyo nagapelanīlile no a mahanga ayo gakwibonaga galī mu mhola. Nguno ū nene naalī naasaaya ī chene, alīyo hado dūhū; lelo a mahanga genayo gūūbongegeja no ū būluhi wabo.’

¹⁶“Alilūūlū ū SEEBA alīhaya gīkī, ‘Ī Yelusalemu yanisaatile no nalīyīshokela, ī numba yane īkūzengwa mo hangī. Ī Yelusalemu īkūzengwa bo kūgoloolwa na lūgoye lo bazengi,’ alīhaya SEEBA wa Būdūla bose.

¹⁷“Ongejaga kūhaya hangī gīkī, Ū SEEBA wa Būdūla bose alīhaya, ‘Ī mizengo yane īkūbeela no, ū SEEBA akwīlūngūja hangī ī Sayuni, akwīsola ī Yelusalemu.’”

¹⁸Kūponya hangī ī liso ī gīkī nūbona ū kū būtongi bone mapembe ane!

¹⁹Ū malaika ūyo waniyombyaga nūmūjū, “Ma kī nago a genaya?” Ūnishokeja alīhaya, “A genaya h'a mapembe ayo gīsambaaja ī Yuda nī Isilaeli, pyī nī Yelusalemu.”

²⁰Hūna ū SEEBA ūnoolekeja basuji bane.

²¹Nūbūūja, “A benaba baliza kwīta kī?” Ūnishokeja alīhaya, “A genaya h'a mapembe ayo gīsambaaja ī Yuda, nose atīho wa kūbūūcha ntwe gwakwe hangī. Alīyo a basuji benaba bizaga kūgapeeja a mapembe, na kūgaponanja a mapembe ga mahanga ayo gigūngūhya kūlwa kwīyūbūkīla ī sī ya Yuda na kūbasambaaja a banhū baamo.”