Read Sukuma Bible 2015 – Bibilia Ilagano Lya Kale 2015 Zakalia 11 Bible Online

Zakalia 11 - Sukuma Bible 2015 – Bibilia Ilagano Lya Kale 2015 bible

Zakalia 11

¹Ee Lebanoni, lugūlaga ī milyango yako moto gwībbebbene ī mikoola yako!

²Bebe nzule, tūlaga ng'hūngū; nguno ū nkoola gwagwishiagwa, ī mitī y'ikūjo yakenaagūkaga! Bing'we mikoma ya Bashani līlagi ng'hūngū; Ī bū na būdiitu wayo yapuugagwa!

³Badegelekagi a badīīmi balīdaaya, a madīīmīlo gabo ayo bagasanije gaakenaagūkaga! Nī shimba jidegelekagi jikūlīlaga; a masaka ga kū mongo gwa Yolodani geelile!

⁴Ū SEEBA Mulungu wane alīhaya gīkī, “Līdīīmage ī lidaale lya ng'holo ījo jimeng'hilwe kūlwa kūsīnzwa.

⁵A bagūji baajo bakajisīnzaga alīyo batinhagwa nūūlū nsango. A bajinja baajo bakahayaga, ‘SEEBA akumīlījiwe, naasaba būlī!’ A badīīmi baajo batajisaatagwa.

⁶Nguno natikala nakūbachīlaga shigongo a banhū ba sī īyī.” Alīhaya SEEBA. “Būlī ūmò wabo nakūnsamīlīja kūlī nzenganwa ng'wiye, nantūūle mu nkono gwa ntemi wakwe. Ī sī īkūkenaagūka no, alīyo ū nene natūbapīja ū mu makono gabo.”

⁷Na ng'hana nūlīdīīma ī lidaale īlo līmeng'hilwe kūlwa kūsīnzwa, ī no no no ījo jileba lebile ū ng'widaale. Nūsola milang'ha ībīlī, gūmò nūgwitana Shigongo, ū gūngī Būmò; hūna nūlīdīīma ī lidaale.

⁸Ng'wikanza lya ng'weji gūmò nūbakenaagūla badīīmi badatū. Nī lidaale lya ng'holo lyūnikolwa, nū nene nūnoga ū kūliyūmīlīgīja;

⁹nūhaya, “Ū nene natūdūla ū kūbiza ndīīmi wing'we. Ū wa kūcha n'achaage, nū wa kūkenaagūka nang'hwe akenaagūke. Abo balasaagīīle ni bidakunage boi kū boi.”

¹⁰Hūna nūgūsola ū nang'ha gwane ūyo gwitanagwa lina lya Shigongo, nūgūbīnza, kūlwa kūlībūlaga ī lilagane īlo naalī naabeeja na mahanga gose.

¹¹Ū mulūshikū lwenūlo lyūcha ī lilagane; ū ng'widaale abo baaniloleelaga, abo baalī baluhiwe būdeeba gīkī ū gwenūyū gwalī mhayo go ng'wa SEEBA.

¹²Nūbawīla, “Ūlū mulībona ībeelelile ninhagi ī mheela yane; alīyo ūlū ītī chene, ndūhū ū mhayo ikalagi nayo.” Hūna būnilīpa shipande makūmi adatū sha feza.

¹³Hūna ū SEEBA ūniwīla, “Jiponejage kūlī mūmbi,” ī yoi ī chene yalī mheela nsoga, īyo baalī baniiganikīla! Na ng'hana ī shipande sha feza shenīsho makūmi adatū nūkashiponeja kūlī mūmbi mu numba ya ng'wa SEEBA.

¹⁴Hūna nūgūbīnza nū nang'ha gwane ūyo gwitanagwa lina lya Būmò, kūlwa kūbūbūlaga ū būdūgū a ha gatī ya Yuda na Isilaeli.

¹⁵Hūna ū SEEBA ūniwīla, “Solaga hangī shitūmamīlo sha ndīīmi mbūūlī.

¹⁶Nguno nalīhaya kūtūūla ndīīmi ūyo atūjidīlīla ījo jijimīīlile, nūūlū kūjikooba ījo jitaalī kūkomeela, nūūlū kūjigunanha ījo jilabūkile, ndūhū nūūlū kūjilang'hana ījo jilī mhola; alīyo ī ng'īnu akūyūjilya, wayūjihopolela nī chūūga shajo.

¹⁷Wimana we ū ndīīmi mbūūlī, ūyo akalekanījaga idaale! Ī līlūshū ni līgūtīnage ū nkono gwakwe ū gwa būlyo, līlībītīle nī liso lyakwe ī lya kū nīīla! Ū nkono gwakwe ni gūūmage gete, nī liso lyakwe ī lya kū būlyo lībbokule jigi!”