Read Sukuma Bible 2015 – Bibilia Ilagano Lya Kale 2015 Zakalia 13 Bible Online

Zakalia 13 - Sukuma Bible 2015 – Bibilia Ilagano Lya Kale 2015 bible

Zakalia 13

¹“Ū mu lūshikū lwenūlo lūzwīlo lwa minzī lūkūlugūlwa kū nguno ya numba ya ng'wa Daūdi na a bikaji ba mu Yelusalemu, kūlwa kūbeeja ī shibi shabo na kūbīngīja ū būsoso wabo.

²“Ū mu lūshikū lwenūlo nakūgīnja a mina ga shiikolile sha kūlamiwa ū mu sī, na ng'hana shitizūkīlwa hangī.” Alīhaya SEEBA wa Būdūla bose. “A bahangi nakūbīnja ū mu sī, nū moyo gwa būsoso.

³Nīyo ūlū munhū wikala ataalī akūhangaga, a ba ise na nina abo bamyala, bakūng'wīla gīkī, ‘Ū bebe shiigelile ūche, nguno ūlīhaya būlomolomo mu lina lya ng'wa SEEBA.’ Ūlū ūhanga a babyaji bakwe bakūnchima ache.”

⁴Ū mu lūshikū lwenūlo būlī ng'hangi akūgooka kūlwa mihayo yakwe īyo akwīfunya mu koolekejiwa mu nzīla ya būhangi. Atilonga wa kūzwala shizwalo sha nyahangi sha booya, gīkī alembagūle banhū.

⁵Akūhaya, “Ū nene nalī nīmi natī ng'hangi; kūfuma ha būnīgīnī bone ū nīīlo gwane nakapandīkīlaga mu kūlīma sī gīkī dūhū.”

⁶Ūlū munhū ūmūja gīkī, “Al'a magulaagīje ayo galī a ha mīlī gwako ga mbika kī?” Akūshosha alīhaya, “A magulaagīje nakagapandīkīla ha kaya ya banwani bichane.”

⁷Ū SEEBA wa Būdūla bose alīhaya: “Bebe līlūshū, mishaga wilwishe nū ndīīmi wane, wilwishe nang'hwe ū nwani ng'wichane wa bbihī no no no!” “Ntūlage ū ndīīmi jikūbbalasana Ī ng'holo, hūna ū nang'ha gwane nakūgūgalukīja ū kū ndo do do.”

⁸Ū SEEBA alīhaya gīkī, “Hose pyī ū mu sī selusi ibīlī[16] ja banhū bakūtūlwa bayagaale; alīyo īkūlekeelwa moi selusi īmò.[17]

⁹A banhū ba selusi īmò benaba nakūbabītya mu moto; nakūbeeja gītī feza, nakūbagema gītī zahabu. Bakūniitana mu lina lyane nane nakūbidīka; nakūhaya, ‘A benaba banhū bane,’ nabo bakūhaya, ‘Ū SEEBA alī Mulungu wise.’”