Read Sukuma Bible 2015 – Bibilia Ilagano Lya Kale 2015 Zakalia 14 Bible Online

Zakalia 14 - Sukuma Bible 2015 – Bibilia Ilagano Lya Kale 2015 bible

Zakalia 14

¹Lūkūshika ū lūshikū lwa ng'wa SEEBA, ī sabo ījo ng'walī ng'wataajiwa mugabanhyiwe.

²Pye a mahanga ga mu sī jose nakūgabilingīla Yelusalemu, gize kwilwisha nago ū nzengo gwenūyo; gakūgūdima gajijane nī sabo ja mu kaya jaamo, na a bakīma gayūbiboneela gabasosohaja. Nusu ya bikaji ba mu nzengo gwenūyo bakūsaamījiwa kū sī jingī; alīyo abo balasaagīīle batīnjiwa moi.

³Kwike ū SEEBA akūgaseesela a mahanga genayo alwe nago, gītī akūlwaga mu lūshikū lwa būlūgū.

⁴Ū mu lūshikū lwenūlo akwīmīīla na magūlū gakwe ha Lūgūlū lwa Mizeituni kīya ya Yelusalemu, hūna ū Lūgūlū lwa Mizeituni lūkūtandūka habīlī, kūfuma kīya kūja ng'weli, lilonge ho lyoma ītaale; ī nusu ya lūgūlū īkūsegeja kūja sukuma, ī nusu ī yīngī yūja dakama.

⁵A bing'we mukūpeela bo kūbītīla ū mu lyoma lya lūgūlū lwane, nguno līkūbiza līshikile Azeli. Mukūpeela ūmo mukīpeelela nyahīnga mu shikū ja ntemi Uzia wa Yuda. Hūna ū SEEBA Mulungu wane akwiza hamò nabo a beela pye a bose.

⁶Ū mu lūshikū lwenūlo lītūbiza ho isana, nī mbeho ītūbiza ho nūūlū lūme lūnyilīzu.

⁷Lūkūbiza lūshikū lwa iyene, lūtī na līīmi nūūlū būjikū ndūhū; ū lūshikū lwenūlo lūkūbiza lūmanilwe na SEEBA dūhū. Ūlū lyūbiza lya mhīndī heela pe.

⁸Ū mu lūshikū lwenūlo minzī mapanga gakūhūūma kūfuma Yelusalemu; nusu yaago gakūsela galolile kū nyanza ya kīya, ī nusu ī yīngī kūja kū nyanza ya ng'weli; gakūsela gīko mu chū na shidikū.

⁹Ū SEEBA akūbiza Ntemi wa sī yose; ū mu lūshikū lwenūlo akūbiza ho SEEBA ūmò, nī lina lyakwe līkūbiza līmò kwike.

¹⁰Ī sī pyī ī yose kwandīja Geba kūshisha Limoni, dakama ya Yelusalemu, īkūbiza itogolo lyūmu. Alīyo ū nzengo gwa Yelusalemu gūkūgūngūhiwa gwikale ūmo gūkikalīlaga na kale, gūkwandīja kū Mita gwa Benjamini kūshisha ūko gwalī ū Mita ū gwa Kale, gūūgoloola gūjile kū Mita gwa kū Kuluba; hama kūfuma kū Numba Ndīhu ya Hananeli kūshisha kwikamīlo lya divai ya ng'wikūlū.

¹¹Gūkūbiza na bikaji mo bingī; gūtalakenaagūlwa hangī na hado yaya. Ū nzengo gwa Yelusalemu gūkwikala mu mhola.

¹²Īlī h'ī lihūūya īlo SEEBA akūlītūmamīla kūgatūla pye a mahanga ayo gaalī na wilwisha na Yelusalemu: Ī mibīlī yabo īkūbola kūko bataalī bīmīīlile na magūlū gabo, na a miso gabo gakūbola ū mu mhembo jago, nī ndīmi jabo jikūbola jilī ū mu milomo yabo.

¹³Ū mu lūshikū lwenūlo ū SEEBA akūbatūla a banhū na boobà būtaale; būlī munhū akūng'ūbūkīla ng'wiye kūnū ong'hajaga nkono.

¹⁴Nī Yuda īkwikenya ū mu Yelusalemu; ī sabo ja mahanga pye a gose ayo galī hihī hihī jikūbilingwa, zahabu na feza ningī no, būyaga na shizwalo.

¹⁵Ihūūya lya mbika yenīyo līkūjitūla nī falasa, nī nzobe ī nhaale, kūja kū ngamīla na nzobe nī ndimu ī jose ījo balabize najo ū mu ng'hambī jenījo.

¹⁶Abo balasaagīīle ū kūfuma ū mu mahanga ayo gaalī gīyūbūkīla Yelusalemu bakūyūja būlī ng'waka kūnamya ū ntemi, ū SEEBA wa Būdūla bose, na kūshiyegela ī Shigukulu sha Maduku.

¹⁷Banhū bose bose a ba mu sī ūlū būleka ū kūja ī Yelusalemu ū kūnamya ū ntemi, ū SEEBA wa Būdūla bose, batūpandīka ī mbula.

¹⁸A Bamisili ūlū būleka ū kūja kwisangīja ū mu shigukulu shenīsho, batūpandīka ī mbula. Ū SEEBA akūbenhela a mahūūya ayo akūgatūmamīla kūgatūla a mahanga ayo gatatogilwe kūja kūshiyegela ī Shigukulu sha Maduku.

¹⁹Ū gwenūyū hū nsango gwa Misili, hama hū nsango gwa mahanga gose ayo gakūleka kūja kūshiyegela ī Shigukulu sha Maduku.

²⁰Ū mu lūshikū lwenūlo mhayo NG'WELA KŪLWA NG'WA SEEBA gūkūbiza gwandīkilwe a ha ng'hīnda ja falasa, nī nungū ja kūzugīla ī ja mu numba ya ng'wa SEEBA jikūbiza gītī mabakuli meela ayo gakatūūlagwa kū būtongi bo ng'walīlo.

²¹Būlī nungū ū mu Yelusalemu nū mu Yuda īkūbiza neela kūlwa ng'wa SEEBA wa Badūla bose, hama būlī bene abo bakwiza kūfunya shitambò bakūsola nungū jimò na jimò bazugīle mo. Nīyo ū mu lūshikū lwenūlo atilonga nsūlūja[18] ū mu numba ya ng'wa SEEBA wa Būdūla bose.