Read Sukuma Bible 2015 – Bibilia Ilagano Lya Kale 2015 Zakalia 2 Bible Online

Zakalia 2 - Sukuma Bible 2015 – Bibilia Ilagano Lya Kale 2015 bible

Zakalia 2

¹Kūlola hangī ī gīkī, nūbona munhū ū kū būtongi bone; ū mu nkono gwakwe walī adimīīlile lūgoye lwa kūpimīla!

²Nūmūja, “Ūlīja halī?” Ūnishokeja, “Nalīja kūgūpima ū nzengo gwa Yelusalemu, nagūbone ūmo gūlī ū būgalī galī nū būlīhu waago.”

³Ū malaika ūyo waniwīlaga mihayo wīnga; ūnileka, kwimanīla wiza malaika ūngī alīmanhya nang'hwe.

⁴Ūshika ūng'wīla, “Peelaga ūkang'wīle ū nsūmba ng'wenūyo gīkī, ‘Ū nzengo gwa Yelusalemu gūtūbiza na ndugu hangī, kūlwa nguno ya wingī wa banhū, nī mitugo ījo jikūbiza moi.

⁵Nene ng'wenekīlī nakūbiza ndugu ya moto ya kūgūpīndya,’ alīhaya SEEBA, ‘hama nakūbiza ikūjo lyaago.’

⁶“Bing'we! Bing'we! Peelagi ng'wīnge ū kū sī ya sukuma.” Alīhaya SEEBA, “Nguno ū nene hū namusalang'hanya hose pye ū mu masī ayo galī ha sīlīlī y'igūlū,” alīhaya SEEBA.

⁷“Bebe Sayuni, Peelaga! Bebe ūyo ūkwikalaga Babuloni, ipījage!”

⁸Nguno ū SEEBA wa Būdūla bose ūyo waninhile ikūjo ūnitūma kūja kū mahanga ayo gaalī gaamutaaja sabo jing'we, alīhaya gīkī, “Ūyo ūmukuumya a bing'we wakuumyaga mboni ya liso lyane.[1]

⁹Ū nene nakūbanungīja nkono, a basese babo kūbataaja ī sabo jabo. A henaho hū mukūdeeba gīkī ū SEEBA wa Būdūla bose hū ng'wene wanitūmile.

¹⁰“Bebe Sayuni, tūlaga lūpūndū ūyege. Nguno nakwiza, nize nikale hamò ning'we.” Alīhaya SEEBA.

¹¹“Banhū ba mahanga mingī bakwisangīja kūlī SEEBA ū mu lūshikū lwenūlo, nabo bakūbiza banhū bane. Nakwikala hamò ning'we, hūna mukūdeeba gīkī ū SEEBA wa Būdūla bose wanitūmile ū kū bing'we.

¹²Ī Yuda, īyo īlī ngabo gwakwe ū mu sī neela, īkūbiza wingīji bo ng'wa SEEBA, hūna akwīsola hangī ī Yelusalemu.

¹³Bing'we banhū bose lembeelagi ū kū būtongi bo ng'wa SEEBA, nguno izile kūfuma ū kū wikalo bokwe wela.”