Read Sukuma Bible 2015 – Bibilia Ilagano Lya Kale 2015 Zakalia 4 Bible Online

Zakalia 4 - Sukuma Bible 2015 – Bibilia Ilagano Lya Kale 2015 bible

Zakalia 4

¹Hūna ū malaika ūyo wayombaga nū nene ūshoka, ūshika ūnimisha gītī munhū kūmishiwa kūfuma mu tūlo.

²Ūnibūūja alīhaya, “Ūlībona kī?” Nūnshokeja, “Nalībona ikīndīkīlo lya tala lya zahabu yike; a higūlya līlīho ibbakuli na talà jalyo mpungatī; na nzūyū mpungatī ja kwingīla ū mu talà.

³Īlīho na mitī ībīlī ya mizeituni; gūmò kū lwande lwa būlyo w'ibbakuli, nū gūngī ū kū lwande lwa lūmoso.”

⁴Ū malaika ūyo wayombaga nū nene nūmūja, “Baba al'īshi shene kī?”

⁵Ūnishokeja, “Ūtūshimanaga ī shenīshi ni shikolo kī?” Nūnshokeja, “Natūshimanaga baba.”

⁶Hūna ūniwīla, “Gūūyū mhayo go ng'wa SEEBA kūlwa ng'wa Zelubabeli, ‘Ītī bo nguzu, nūūlū mu būdūla, alīyo mu nzīla ya ng'wa Moyo wane,’ alīhaya SEEBA wa būdūla bose.

⁷“Bebe lūgūlū lūtaale, nang'ho ūlī kī? Ū kū būtongi bo ng'wa Zelubabeli ūkūbiza sī nenganīzu. Hanuma akūlyenha ī liwe lya kūgoloolela numba, banhū bakūtūlaga mhūndū na kūhaya, ‘Mulungu linhage mbango! Mulungu linhage mbango!’”

⁸Ū mhayo go ng'wa SEEBA gūnizīīla gūlīhaya:

⁹“Ū Zelubabeli wagūtūūlile ū nsingi gwa hekalu yenīyī; nū kūgūmala akūgūmala na makono gakwe. Hūna lūūlū mukūmana gīkī ū SEEBA wa Būdūla bose wanitūmile ū kū bing'we.

¹⁰“Nani ūyo adalahile lūshikū lwa mihayo mido mido? A banhū bakūyega no ū kwībona ī kabiilū īlī mu nkono go ng'wa Zelubabeli. “(Īji mpungatī[5] jenīji galī miso ga ng'wa SEEBA, ayo gakīyeleelaga pyī ī sī.)”

¹¹Ū malaika nūmūja hangī, “Ī mitī ya mizeituni īyī ībīlī īyo ītangatile ikīndīkīlo lya talà, gūmò kū lwande lwa būlyo, gūngī ū kū lwande lwa lūmoso; īlī na makūlū kī?”

¹²Nongeja kūmūja na, “Al'a matambī ga mizeituni ay'abīlī ayo galī haho na nzūyū ja zahabu, ījo jikasūlūlūchaga maguta ga zahabu, najo jilī na makūlū kī?”

¹³Ūnishokeja alīhaya, “Ūtūshideebaga ī shenīshi ni shikolo kī?” Nūnshokeja, “Ndūhū gete baba.”

¹⁴A henaho ūnishokeja alīhaya, “A benaba balī a banhū babīlī abo babililwe maguta[6] kūlwa kūntūmamīla SEEBA wa sī yose.”