Read Sukuma Bible 2015 – Bibilia Ilagano Lya Kale 2015 Zakalia 5 Bible Online

Zakalia 5 - Sukuma Bible 2015 – Bibilia Ilagano Lya Kale 2015 bible

Zakalia 5

¹Kūbūūcha hangī a miso gane ī gīkī nūbona shitabo shikūbbepeelaga ng'wigūlya!

²Ūnibūūja, “Ūlībona kī?” Nūnshokeja, “Nalībona shitabo shitaale shilībbepeela ng'wigūlya, ū būlīhu washo miita kenda, ū būgalī galī miita inè na nusu.”

³Ūniwīla, “Ī lyenīlī izumo, īlo līlīja hose hose ū mu masī; nguno shilī na mapande abīlī gandīkile, ī lipandī ī līmò shihayīlile gīkī būlī ng'wibi akūpeejiwa, ī lingī shūhaya būlī ng'wene ūyo wilahīla nyamaama akūpeejiwa.

⁴Ū SEEBA wa Būdūla bose alīhaya gīkī, ‘Nakūlītūma ī lizumo hose hose, līkingīle mu numba ya ng'wibi nū mu numba yakwe ūyo akilahīlaga nyamaama mu lina lyane. Līkwikala ū mu numba yakwe lyīkenaagūle ī mitī īyo īzengelilwe na a mawe gayo.’”

⁵Ū malaika ūyo waniyombyaga ūnegeela ūniwīla, “Alilangamaga ūshilole shisho shikolo shiligengeleka!”

⁶Nūmūja, “Shikolo kī ī shenīsho?” Ūniwīla, “Shigabbu sha kūgelekela.”[7] Ongeja kūhaya, “Ū wenūbū h'ū būbi wa banhū bose ba mu sī.”

⁷Ī likundīkījo lya shigabbu lyalī lya chūma sha masaasī; aho lyakundūlwa nūbona nkīma igashije moi!

⁸Ūniwīla,[8] “Būbi ū wenūbū,” hūna ūnkandīkīja hangī ū nīkīma ng'wenūyo mumo shigabbu, nī likundīkījo ūlīshosha hangī a ha nomo gwa shigabbu.

⁹Aho nabūūcha a miso nūbona ū kū būtongi bone bakīma babīlī, būlī ng'wene walī na manana, na nyaga ū mu manana gakwe! A manana gabo gaalī gītī ga gala; būshibūūcha ī shigabbu, būshenenhya higūlya ya sī.

¹⁰Ū malaika ūyo waniyombyaga nūmūja, “Balīshitwala halī ī shigabbu?”

¹¹Ūnishokeja, “Kū sī ya Babuloni[9] kūjūshizengela numba. Ūlū yūshila, ī shigabbu shikūtūūlwa kwenūko ng'wipande lyasho.”