Read Sukuma Bible 2015 – Bibilia Ilagano Lya Kale 2015 Zakalia 6 Bible Online

Zakalia 6 - Sukuma Bible 2015 – Bibilia Ilagano Lya Kale 2015 bible

Zakalia 6

¹Kūlola hangī ī gīkī nūbona magogoteni anè galiza kūfuma ha gatī gatī ya ngūlū ibīlī, ngūlū ja būtundo wa shaba!

²Ī ligogoteni lya kwandya lyalī na falasa jaza, ī lya kabīlī jalī japi,

³Ī lya kadatū jape, ī lya kanè jalī ja mabala mabala; pyī ī jose jalī ja nguzu.

⁴Nūmūja ū malaika ūyo wayombaga nū nene, “Ī jenīji najo kī baba?”

⁵Ū malaika ūnishokeja alīhaya, “Ī yenīyī myoyo īnè[10] ya ng'wigūlū, īlīfuma kūlī SEEBA wa sī yose, ūko īkikalaga.

⁶Īlo līlī na falasa japi lījile kū sī ya sukuma, īlo līlī na falasa jape lījile kū sī ya ng'weli; lelo īlo līlī na falasa ja mabala mabala ī lyene lījile dakama.”

⁷Ī falasa jenījo jalī na nguzu no, aho jafuma jūgaagaana gīkī jije pye a hose ū mu sī. Nang'hwe ūjihamīla alīhaya, “Jagi pye hose hose ū mu sī!” Na ng'hana jūja pye hose hose ū mu sī.

⁸Hūna ūnihamukīla alīhaya, “Ūlījibona ījo jatūngīīla kū sī ya sukuma, ī jenījo jilīkagwifuuja ū Moyo gwane ū kū sī ya sukuma.”

⁹Ū mhayo go ng'wa SEEBA gūnizīīla gūlīhaya:

¹⁰“Solaga feza na zahabu kūfuma kū ba Helidai, Tobiya na Yedaya, abo bizile kūfuma kū būsaamiwa mu sī ya Babuloni. Mu lūshikū lwenūlo dūhū, ūje kū ng'wa Yosia ng'witūnja o ng'wa Zefania.

¹¹Ūjisole ī feza nī zahabu, ūkabeeje ngikili ūntūūlīle kū ntwe gwakwe ū Ngabīji Ntaale Yoshwa ng'wana Yehozadaki.

¹²Ūng'wīle gīkī ū SEEBA wa Būdūla bose alīhaya, ‘Ū munhū ūyū hū ng'wene ūyo lina lyakwe alī Itambī, na ng'hana akūsonga gītī itambī a h'ipandī lyakwe, akwīzenga ī hekalu ya ng'wa SEEBA.

¹³Ū ng'wenūyū hū ng'wene ūyo akwīzenga ī hekalu ya ng'wa SEEBA, na akūzwīkwa shizwalo sh'ikūjo lya nyatemi, igashe h'isumbī lyakwe lya būtemi asuge. Na hangī a h'isumbī lyakwe ī lya būtemi akūbiza na nīmo gwa būgabīji. Būkūbiza ho widomanīja a ha gatī ya būtūmami būbīlī wenūbū.’

¹⁴Ba Helidai, Tobiya na Heni[11] ng'wa Zefania, bakwinhwa ngikili mu hekalu ya ng'wa SEEBA kūlwa kūbizūkwa.

¹⁵Abo balī kūle bakwiza bagunaane ū nīmo gwa kūzenga ī hekalu ya ng'wa SEEBA, hūna mukūdeeba gīkī ū SEEBA wa Būdūla bose hū ng'wene wanitūmile ū kū bing'we. Ū gwenūyū gūkūshikīīla, ūlū ng'ūng'wigwa mu ng'hana ū SEEBA Mulungu wing'we.”