Read Sukuma Bible 2015 – Bibilia Ilagano Lya Kale 2015 Zakalia 8 Bible Online

Zakalia 8 - Sukuma Bible 2015 – Bibilia Ilagano Lya Kale 2015 bible

Zakalia 8

¹Ū mhayo go ng'wa Seeba wa Būdūla bose gūnizīīla hangī

²Ū Seeba wa Būdūla bose alīhaya gīkī, “Nalī na wilu būtaale no kūlwa nguno ya Sayuni; būlīniminya ū wilu kūlwa nguno ya nzengo gwenūyo.”

³Ū Seeba alīhaya gīkī, “Nakūshoka ī Sayuni, nikale ū mu Yelusalemu. Hūna ī Yelusalemu īkwitanwa Nzengo ūyo gūlī na Ng'hana mo, nū lūgūlū lwa ng'wa SEEBA wa Būdūla bose, lūkwitanwa Lūgūlū Lwela.”

⁴Ū SEEBA wa Būdūla bose alīhaya gīkī, “Līkūshika hangī ī likanza lya banamhala na a bagikūlū kūyikala balīho myaka mingī, bakūyeela yeelaga ū mu nzengo gwa Yelusalemu, būlī ng'wene na nkīndo gwakwe akwikīndīkījaga kūlwa būlamu bo shikū ningī.

⁵A mayīla ga mu mizengo gakūyikala gookalaga bayanda na banikī bakwigusha ng'wenūmo.”

⁶Ū SEEBA wa Būdūla bose alīhaya gīkī, “Ū mhayo gwenūyū ū ng'wikanza lyenīlo gūkūbonekana gīkī gūlī gwa kūkumya ū kū banhū abo basaagīīla benaba, ī gīsī muliganika gīkī nū kūlī nene gūkūbiza gwa kūkumya?” Alīhaya SEEBA wa Būdūla bose.

⁷Ū SEEBA wa Būdūla bose alīhaya gīkī, “A banhū bane nakūbīnja ū kū sī ja kīya na ng'weli, bapīle.

⁸Nakūbenha bize bikale mu Yelusalemu hangī; bakūbiza banhū bane, ū nene nakūbiza Mulungu wabo, hangī nsanyiwa na ntūngīlīja ū kūbo.”

⁹Ū SEEBA wa Būdūla bose alīhaya gīkī, “Bing'we abo mukwīyigwaga ī haha ī mihayo yīnīyī, īyo bīhaya na a bahangī abo baalīho aho gwatūūlagwa ū nsingi gwa numba ya ng'wa SEEBA wa Būdūla bose, gaguzuhyagi lūūlū a makono ging'we, ī hekalu īzengwe.

¹⁰Aho lītaalī ū kūshika ī likanza lyenīlo, yalī ītīho mheela kūlwa ng'wa munhū nūūlū kū ntugo gose gose. Walī atīho wa kwīta nīmo gwakwe mu būlembeezu, baalīho banishi bingī no, nguno būlī munhū naalī nang'wīta kūbiza ng'wanishi kūlī nzenganwa ng'wiye.

¹¹Alīyo ī haha ū būshiigo wa banhū aba natūbīītīla gīt'ūmo nīītīlaga ī kale.” Alīhaya SEEBA wa Būdūla bose.

¹²“Ī mbīyū jikūzwa chiza, nū nzabibu gūkūtwaja a matwajo gago, ī sī nayo īkūzwisha īsho shikalīmagwa, nī ligūlū līkūyūgwisha ū lūme. Ī shose shenīshi nakūshifunya shibize wingīji ū kū būshiigo wa banhū aba.

¹³Bing'we Yuda na Isilaeli, a mahanga gamubonaga gīkī mulī shikolo shizumile, alīyo ī haha nakūmupīja mubize banhū ba mbango. Lekagi ū kogoha, gaguzuhyagi dūhū a makono ging'we.”

¹⁴Ū SEEBA wa Būdūla bose alīhaya gīkī, “Ūmo naalī nizunīlīgīja kūng'wenhela mayanga, na kūleka kūmuchīla shigongo kūlwa basīng'we abo baalī banisaayīcha.” Alīhaya SEEBA wa Būdūla bose,

¹⁵“Ī haha lekagi ū kogoha, nguno nizunīlīgije kūgwītīla yawiza hangī ū nzengo gwa Yelusalemu nī Yuda.

¹⁶Kwike shing'wigeleelilwe ng'wīte yīīyī: Iwīlagi ya ng'hana būlī munhū na ng'wiye, ū mu mabanza ging'we muyūfunya būlamuji bo ng'hana na būdeekanu.

¹⁷Yaya kūnīīla gwīnda yabūbi nzenganwa ng'wiyo, hangī nū go kwilahīla nyamaama yaya ū kūgūyegela. Ū nene nīkolilwe pyī ī yenīyī.” Alīhaya SEEBA.

¹⁸Ū mhayo go ng'wa SEEBA wa Būdūla bose gūnizīīla hangī.

¹⁹Ū SEEBA wa Būdūla bose alīhaya gīkī, “Ī likanza lya kūfunga mu ng'weji gwa kanè, nū gwa katanò, nū gwa mpungatī, nū gwikūmi līkūbiza lya shigukulu sha būyegi na kūzalabana ū kū numba ya Yuda. Alilūūlū, a bing'we ītogagwi ī ng'hana nī mhola.”

²⁰Gūūyū mhayo alīgūhaya ū SEEBA wa Būdūla bose: Banhū bingī na bikaji ba kū mizengo mitaale bakwiza,

²¹na bikaji ba mu nzengo nebe bakūja kū nzengo gūngī bakabakomige koi balīhaya, “Tūjagi wangū tūkang'wikūmbīlīje ū Seeba, tūkankoobe ū SEEBA wa Būdūla bose. Ū nene ng'wenekīlī najile koi.”

²²Na ng'hana banhū bingī na mahanga ga būdūla būtaale gakwiza Yelusalemu kūnkooba ū SEEBA wa Būdūla bose na kūnomba jakwe.

²³Ū SEEBA wa Būdūla bose alīhaya gīkī, “Ū mu shikū jenījo banhū ikūmi ba ndīmi jiikīla kīlile, na mahanga ga būlī mbika bakūng'ūmīīla Nyudaya ūmò ha lūpembe lwa shizwalo shakwe kūnū balīng'wīla gīkī, ‘A bise tūlīja nang'ho, nguno twigwile gīkī ū Mulungu alī hamò ning'we.’”