Read Sukuma Bible 2015 – Bibilia Ilagano Lya Kale 2015 Zakalia 9 Bible Online

Zakalia 9 - Sukuma Bible 2015 – Bibilia Ilagano Lya Kale 2015 bible

Zakalia 9

¹Ū mhayo go ng'wa SEEBA gūlī na wilwisha na sī ya Hadilaki, nī Damasiko gūkwīyikalīla, nguno a miso ga banhū ganolile SEEBA, nī ng'anda ja Baisilaeli ī jose;

²nī Hamasi gūkwīyikīīla Īyo ībīmbīkanilwe nayo, pyī nī Tulo nī Sidoni, nūūlū īkī a bikaji baamo bakibonaga balī na masala no.

³Ī Tulo yene yizengela ngītīli ya kūpīlīla; ī hela yajitūlīīla gītī lūbuubu, Ī zahabu najo gītī masalū ga mu mapanda.

⁴Alīyo ū SEEBA akūjīnja ī sabo jaamo nū būdūla wa nzengo gwenūyo ū wa mu nyanza akūbūkenaagūla, nīyo gūkūkenaagūlwa bo moto.

⁵Ī Ashikeloni īkūbona yogohe; Ī Gaza īkūgalagala kūlwa kūsaatwa, nī Ekuloni nayo gīko, nguno ū kwisagīlwa kwayo kūkūchabagīla. Ī Gaza īkūjimīīja ū ntemi wayo, ī Ashikeloni bakwīpeela ībize buyīkī.

⁶Ī Ashidodi īkwikalīlwa mahanga ga wisangīlīje, a Bafilisiti būkūbīnga ū wikumīlīja wabo.

⁷Nakūbīngīja ī notà ya mininga, nī shilīwa īsho shilemejiwe bakooya ū kūshilya. Abo balashiigīīle bakūbiza banhū ba ng'wa Mulungu wise, na bakūbiza na būsugi ū mu Yuda, ī Ekuloni īkūbiza gīt'ūmo balī Bayebusi.

⁸Alīyo ī numba yane nakwīlang'hana Ītizūdumīlwa na mabità ga bibonya. Atilonga hangī ng'wiboneeji wa kūbahehenaja a banhū bane, nguno ī haha nabalang'hanile no.

⁹Bebe Sayuni, yegaga! Ee Yelusalemu, tūlaga mhūndū! Managa gīkī ū Ntemi wako aliza ū kūlī bebe, ntūngīlīja hama alī na būpīji, ū wei mfula na adamhīlile nzobe, alī ha nzobe, ng'wana wa nzobe.

¹⁰A magogoteni ga būlūgū nakūgīnja ī Efulaimu, nī falasa ja būlūgū jikwīnga Ī Yelusalemu, nū būta wa būlūgū būkūbīnzagūlwa. Ū ng'wenūyo akūkumūcha mhola kū mahanga. Ū būsugi bokwe būkūbiza bo kūfuma nyanza īyī kūja kū nyanza yīngī, na kwandīja kū Līmongo[14] kūja kū būkalīkījo bo sī.

¹¹Alīyo ūlū a bing'we, kūlwa nguno ya mininga g'ilagane lyane ū kū bing'we, a banhū bing'we abo balī mu būding'wa nakūbīnja ū ng'wichongo Īlo lītī na minzī.

¹²Bing'we bading'wa abo mulī mu kwisagīlwa, shokagi kū ng'hambī ya būlang'hanwa wing'we; ī lelo nalīmuwīla hape nakūmushokeja Īsho ng'walī nasho na kūtinda ho.

¹³Ī Yuda nakwībanga gītī nalībanga būta bone, hūna ī Efulaimu nītūmamīle gītī masonga. Ū bebe Sayuni nakūbasamīlīja a baana bako bilwishe na baana ba Bayunani, nakūkwīta ūbize gītī līlūshū lya nshilikale.

¹⁴Ū SEEBA akūbilongela a banhū bakwe, ī lisonga lyakwe līkūlabya gītī lūlabi. Ū SEEBA Ntaale akūng'angaaja ipembe lyakwe, akūshimīzīla mu nshūūlūlū gwa dakama.

¹⁵Nīyo ū SEEBA wa Būdūlū bose akūbakīngītīīla; bakūbiza bapyenī na bakūkenaagūla bo kūtūmamīla nhaago na mawe. Bakūng'wa kūshisha bayūgalagala gītī bang'wi ba walwa; bakookala pa gīt'ibbakuli lya kūseeseebelela ha mhembe ja ng'walīlo.

¹⁶Ū SEEBA Mulungu wabo akūbapīja ū mu lūshikū lwenūlo, gītī idaale lya ng'holo ja banhū bakwe. Bakūyūng'weka ū mu sī yakwe gītī būlenji bo mawe ga mpango ayo gakatūūlagwa mu ngikili.

¹⁷Bakūbiza basoga no, hangī bakūbeelela kīngī nasho! Ī shilīwa shikūbasheesha a basūmba ī mibīlī, na a banhya ī divai.