Read Sukuma Bible 2015 – Bibilia Ilagano Lya Kale 2015 Malaki 1 Bible Online

Malaki 1 - Sukuma Bible 2015 – Bibilia Ilagano Lya Kale 2015 bible

Malaki 1

¹Mhayo gwa ng'wa SEEBA kū Baisilaeli mu nzīla ya ng'wa Malaki.

²Ū SEEBA akūhayaga gīkī, “A bing'we namutogilwe. Alīyo a bing'we mukūbūūjaga, Ūtūtogilwe mu kinehe?” Ū Esau walī atī nkūlūye wa ng'wa Yakobo? Alīhaya SEEBA. Alīyo ū Yakobo h'ūyo nantogilwe,

³lelo ū Esau nūnkolwa, nī ngūlū jakwe naajigalūcha jūbiza itogolo dalali, ū wingīji bokwe nūbūlekela manyamhawa ga mu matogolo.

⁴Ū Edomu ng'wene ni ahayage dūhū ī gīkī, “Nūūlū īkī tūkakenangujiwa ī sī yise, alīyo nahene tūkwīzenga hangī dūhū ī misaka.” Kwike ū SEEBA wa Būdūla bose alīhaya gīkī, “Ū kūzenga ni bazengage, alīyo nakūkambagūla. Bakwitanwa Sī Yabūbi, banhū abo balī mu būpelanu bo ng'wa SEEBA pyī ī shikū.”

⁵Ū mhayo gwenūyū mukūgūbona na miso ging'we; mukubyuhaya gīkī, “Ū SEEBA ng'wene ntaale nū kū sī ja hanze ya Isilaeli.”

⁶Ū ng'wana akbizaga ankūgije ū ise, nū ntūmami ūyo wantūūla ha nīmo. Al'ū nene ūlū nalī sīng'we, līlī halī lūūlū ī likūjo īlo līniigeleelilwe? Alahaya SEEBA wa Būdūla bose. A bing'we bagabīji h'abo mukoolekejaga ibengwe ū kū lina lyane. Alīyo mukūbūūjaga, “Toolekije ibengwe mu kinehe ū kū lina lyako?”

⁷Mukūtūūlaga shilīwa shisosohalile a ha ng'walīlo gwane. Alīyo ū kūnū ng'ūbūja, “Tūkūkūsosohajaga mu nzīla kī?” Kūlwa kūhaya gīkī ī meza ya ng'wa SEEBA yene ya kwibengelejiwa.

⁸Ī gīsī ūlū mulenha mitugo jibbokulile gīkī shitambò kūlwa nguno yane, ū gwenūyo gūtī mhayo gwa bubi ū gwenūyo? Ūlū mulīfunya mitugo jilemehalile nūūlū jisaatile gīkī jibize shitambò, gūtī gwa bubi ū gwenūyo? Aligemagi ū kūjifunya kūlwa ntemi wing'we! Akūmuyegela? Akūng'wanukūla dūhū? Alīhaya SEEBA wa Būdūla bose.

⁹Ng'wikūmbīlījagi lūūlū ī haha ū Mulungu atūchīle shigongo. A bing'we muliganika akūng'wanukūla na shakwinha shilī gīko mu nkono ging'we? Alīhaya SEEBA wa Būdūla bose.

¹⁰Hambū hambū ni wigela ūmò wing'we wīlugala ī milyango ya hekalu, mutizikala mukūbachaga myoto ītī na ngofyolo ha ng'walīlo gwane! Mutūniyejaga biya. Alīhaya SEEBA wa Būdūla bose, nīyo natanukūla shakwinha kūfuma mu makono ging'we.

¹¹Kwandīja būfuma līīmi kūshika būgwa līīmi, ī lina lyane līkūjiwe no ū mu mahanaga. Būlī kwene shikūfunyiagwa shakwinha sha ng'waso nsoga na shitambò sheela nguno ya lina lyane, kūlwa ngun ī lina lyane līkūjiwe no ū mu mahanga. Alīhaya SEEBA wa Būdūla bose.

¹²Alīyo a bing'we mukūlīsosohajaga kūlwa kwīhaya ī meza ya ng'wa SEEBA gīkī, “Ī yenīyo nsoso,” nī shilīwa shayo gīkī, “Ī shenīsho sh'ibengwe.”

¹³Ng'wakūyīīta ng'wahaya, “Ī lyenīlo līnigo dūhū nīyo! Hūna ng'wayūshinunhya mu kūshiibengeleja.” Alīhaya SEEBA wa Būdūla bose. Ūlū ng'wanenhela mitugo jilabūkile, nūlū nemehazu, nūūlū jisaatile gīkī mujifunye shitambò, najanukūle dūhū ū mu makono ging'we? Alīhaya SEEBA.

¹⁴Ūyo alī ng'ondi yawiza ng'widaale lyakwe ūlū ūlahīla kwīfunya shitambò kūlī SEEBA, alīyo huna ūfunya shitambò sha ntugo gūlemehalile, ū ng'wenūyo nomolomo hangī azumile. Nguno ū nene nalī ntemi ntaale. Alīhaya SEEBA wa Būdūla bose, nīyo ī lina lyane shiigelile koogohwa ū mu mahanga.