Read Sukuma Bible 2015 – Bibilia Ilagano Lya Kale 2015 Malaki 3 Bible Online

Malaki 3 - Sukuma Bible 2015 – Bibilia Ilagano Lya Kale 2015 bible

Malaki 3

¹“Managi gīkī, nakwitūma inhungwa yane, ūyo akūbeeja beeja nzīla kū būtongi bone. Hūna ū SEEBA ūyo mukūnkoobaga akwiza ū mu hekalu yakwe ng'wiyībile; ū ntūmījiwa w'ilagane ūyo mulī na nghūmbū nanhwe akwiza.” Alīhaya SEEBA wa Būdūla bose.

²Alīyo nani akūdūla kwiyūmīlīja ū mu lūshikū lwa kwiza kwakwe? Nani akūgima kubi ho ūlū wilonga? Nguno ū wei abange ngwene moto gwa ng'wabya wa chūūma, nūūlū gītī sabuni ya mfuji wa shizwalo.

³Akwigasha gītī munhū akwabyaga feza na kūjeeja; a Balawī akūbeeja, beele gītī zahabu na feza. Hanuma ya henaho ū SEEBA akūpandīka banhū ba kwenha shakwinha mu būtūngīlīja,

⁴hūna ū SEEBA akwanukūla shakwinha kūfuma kū banhū ba Yuda na Yelusalemu, gīt'ūmo yalī mu shikū ja kale, gītī mu myaka ya kū numa.

⁵“Hūna nakūng'wegeela kwiza kūmulamula; a balogi nakūbakaanīla wangū no, na a bashihani, na a balembekeja, na a banyeecha ba mheela batūmami babo, a biboneeji ba bachīlwa na bapīna, abo bakabīngījaga bageni shikolo shabo, ndūhū nūūlū kūnoogoha ū nene.” Alīhaya SEEBA wa Būdūla bose.

⁶“Ū nene SEEBA natagalūka; h'ī chene u bing'we būbyīle bo ng'wa Yakobo butaalī kūshila pye a bose.

⁷Kūfuma shikū ja basīng'we mushilekile ī shilagīlo shane, mulemile ū kūshidiima. Alilūūlū, nishokelagi, nū nene nakūmushokela u bing'we.” Alīhaya Seeba wa Būdūla bose. “Alīyo mukūbūūjaga, ‘Tūkūshokele mu kinehe?’

⁸“Ū munhū ang'wibīle Mulungu? Lelo a bing'we mukūniibīlaga. “Alīyo mukūbūūjaga, ‘Tūkūkwibaga kinehe?’ “Mu zaka na manong'ho.

⁹Ī haha muzumilwe a bing'we, pye a bose ihanga igima, nguno mukūniibīlaga.”

¹⁰Ū SEEBA wa Būdūla bose alīhaya gīkī, “Ng'ūnha ī zaka jishikaanile ng'wajitūūla ū mu numba ya kūbīkīla, shilonge shilīwa ū mu numba yane. Nigemagi ū mu mhayo gwenūyū, mubone ūlū natūmulugūlīla a ng'wanya gwa ng'wigūlū namusukīīle ningī, kūshika mugayiwe nū ng'wanya gwa kūshitūūla īsho mulapandīke.

¹¹Nakūshilemeja pyī ī shiliili īsho shikakenaangūlaga shilīwa mu migūnda shitizūmukenaagūja, nī mizabibu ying'we ū mu migūnda ītūholoosha a matwajo gayo.” Alīhaya SEEBA wa Būdūla bose.

¹²“Hūna lūūlū pye a mahanga gakūmuhaya gīkī mulī na lubango, nguno ī sī ying'we īkūbiza ya kūyeja no.” Alīhaya SEEBA wa Būdūla bose.

¹³“Mukūhayaga mihayo y'ibengwe no.” Alīhaya SEEBA. “Alīyo mukūbūūjaga, ‘Tūkūhayaga mihayo kī ī y'ibeng'we?’

¹⁴“Mulīyūhaya gīkī, ‘Ndūhū ī solobo ū mu kūntūmamīla Mulungu. Ī gīsī twapandīkile kī īkī tūkwīshikīlījaga ī yakwe, na tūkwikalaga tonzololokaga ū mu miso ga ng'wa SEEBA wa Būdūla bose gītī tūlī ng'wikanza lya masūūku?

¹⁵Ī haha a abihayi h'abo tūkūbabonaga gīkī balī na mbango. Na ng'hana h'ūmo īlī, a babūbi h'abo bakwītaga ī mibonwa banhū; nguno na a babo bakangemaga ū Mulungu balī mhola dūhū.’”

¹⁶Hūna abo balī na loogohano kūlī Seeba būyūhooya bakwisomboolelaga boi kū boi, kūnū ū Seeba akūdegelekaga aligwa. Shitabo sha kwizūkīja shandīkwa ū Seeba alīlola, kūlwa banhū abo bang'ogohile we na kūlīkūja lina lyakwe.

¹⁷Ū Seeba wa Būdūla bose alīhya gīkī, “A benabo bakūbiza bane, ū mu lūshikū lwene nalīgolanya bakūbiza sabo yane gete ya wikomangīle. Nakūbachīla shigongo gīt'ūmo munhū akanchīlaga shigongo ng'wana wakwe ūyo akantūmamīlaga.

¹⁸Hūna lūūlū a henaho mukūbona hangī ūmo bikīlīlile a batūngīlīja na a babūbi, abo bakantūmamīlaga Mulungu na a babo batantūmamīlaga.