Read Sukuma Bible 2015 – Bibilia Ilagano Lya Kale 2015 Matayo 11 Bible Online

Matayo 11 - Sukuma Bible 2015 – Bibilia Ilagano Lya Kale 2015 bible

Matayo 11

¹Hūna lūūlū ū Yesu aho wamala kūbalagīla a bahemba bakwe abo ikūmi na babīlī, akīnga a henaho ūja akūlangaga na kūlomeela mu mizengo yabo.

²Ū Yohana aho alī mu jeela akigwa ī shītīle sha ng'wa Kilisito; hūna ūtūma babīlī ba bahemba bakwe baje ū kūlī Yesu bakamūje gīkī,

³“Ū bebe hū ūlī ng'wene ūyo izile, nūūlū tūnindīīle ūngī?”

⁴Nang'hwe ū Yesu ūbashokeja ūhaya gīkī, “Jagi mukang'wīle ū Yohana īyo mulīyigwa na kwībona.

⁵A babboku balībona, na a balema balīshimīza, a ba mbiji bakwelaga, a bagulu nabo bakwigwaga; pye na a bafu balijūūka, na a bahabī balīlomeelwa Ng'hūlū Jawiza.

⁶Nīyo alī na lubango būlī ng'wene ūyo atī na kwipama kūlwa nguno yane.”

⁷Aho bīnga a benabo, ū Yesu wandya kūbawīla a banhū mihayo ya ng'wa Yohana. Ūhaya gīkī, “Aho ng'wajaga kū matogolo, ng'wajaga kūlola kī? Kadete kakūyengejiagwa nyaga?

⁸Ng'walī mutogilwe kūbona kī? Hamo munhū nkondooku azwalīlile myenda ya nyasabi? Managi gīkī abo bakazwalaga myenda ya nyasabi bakikalaga mu kaya ja nyatemi.

⁹Na lūūlū, ī gete ng'wajaga kūlola kī? Hamo kūlola ng'hangi? Alichene, nīyo nalīmuwīla alī ntaale kūtinda ng'hangi!

¹⁰Ū wei hū ng'wene ūyo gwandīkilwe kūlwakwe gīkī, ‘Managa gīkī, nalīntūma ntūmījiwa wane kū būtongi wako, akūtonga kūkūbeeja beegeja nzīla.’

¹¹Nalīmuwīla gwa ng'hana gīkī, ū mu bose abo babyalilwe na bakīma, atīho nūūlū ūmò ūyo alī ntaale kūntinda Yohana Matīīja. Alīyo ūyo alī ndo wa bado ū mu būtemi bo ng'wigūlū ankīlile ū wei.

¹²Nīyo kwīngīīla mu shikū ja ng'wa Yohana kūshisha lelo īyī, ū būtemi bo ng'wigūlū būkūluhiagwa hataale, kwike a bigaganīja bakūbūpandīkaga.

¹³Nguno pye a bahangi nī shilagīlo bakahanga kwiza kūkaja halī Yohana.

¹⁴Na lūūlū ūlū mutogilwe kūzunya zunyagi, nguno ū ng'wenūyū hūna ng'wene ū Eliya ūyo shiigelile ize.

¹⁵Ūyo alī na matū ni igwage.

¹⁶“Alīyo hīmba nashiikolanīje na kī ī shibyalīlwe shenīshi? Shitikīlile na baana bigashaga ng'wigūlilū bakwihamukīlaga na bichabo;

¹⁷bakūhayaga gīkī, ‘A bing'we, ni ginehe twalūmufuulīlaga mbiilūlū alīyo ning'we ū kūbina yaya; hama hangī aho twandya kūlīla ng'hūngū nahene mutapīnīhalile!’

¹⁸Nguno ū Yohana akiza atūlyaga nūūlū kūng'wa yaya; būyūhaya, ‘Alī n'shibu.’

¹⁹Hama ū Ng'wana wa Munhū aho wiza akūlyaga na kūng'wa, hangī nahene bandya kūhaya gīkī, ‘Nolagi ū munhū ūyū; naku na neevi, nīyo anwanile na batobisha ba goodi, būyaga na banhū ba shibi!’ Kwike a bana bago a masala gakiyoolechaga mu katūmamīle kakwe.”

²⁰Hūna wandya kwīyoolomya ī mizengo īyo yalī yalema kūgalūka, nūūlū īkī mihayo mingī ya koolecha būdūla bokwe yalī yabeejiwa mwenomo.

²¹Ūyīwīla alīhaya gīkī, “Ū lī ni'zuumo be Kolasini bebe Betisaida ūlī ūli n'izumo. Nguno ī shītwa sha koolecha būdūla būtaale īsho shabeejiwe mu bing'we ūlū ni shabeejiwa mu Tulo na Sidoni, a bazengi baamo ni bagalūka kale, mu kūzwala magūnīla na kwifudīka mu mabu.

²²Alīyo ī haha nalīmuwīla gīkī, ū mu lūshikū lo kūlamulwa, īkūbiza hambū hambū ū kū bana Tulo na a bana Sidoni, kūtinda ū kū bing'we!

²³Ū bebe nang'ho Kapelanaumu, ūliganika gīkī ūkūgūngūhiwa kūshisha ng'wigūlū? Ūkwichiwa kūshisha kūlimu! Nguno ī milīmo ya koolecha būdūla būtaale īyo yabeejiwe mulī bebe ūlū ni yabeejiwa mu Sodoma, ī sī yenīyo ni ītaalī īlīho nī lelo īyī!

²⁴Hūna lūūlū nalīkūwīla gīkī, ū mu lūshikū lo kūlamulwa, īkūbiza hambū hambū ū kū bana Sodoma kūtinda ū kūlī bebe.”

²⁵Ī likanza lyenīlo ū Yesu ūhaya gīkī, “Nalīkūkumīlīja Baba, bebe ūyo ūlī Seeba w'igūlū na sī; nguno pyī ī mihayo yenīyī wībisile ū kū ba masala na a bitegeleja, wīyoolecha ū kū baana.

²⁶Alichene Baba, nguno h'ūmo ībeelelile ū kūlī bebe.

²⁷Ū Baba ashitūūlile pyī ī shose mu nkono gwane; na atīho nūūlū ūmò ūyo aamanile ū Ng'wana ūlū atī Baba iyene. Hangī atīho nū yūyo aamanile ū Baba, ūlū atī Ng'wana iyene, na būlī ng'wene ūyo Ng'wana alatogwe kūmfubolela.

²⁸Nzūgi kūlī nene pye abo mulī na makoye, na mubunilwe miligo midito; ū nene nakūng'wifuuja.

²⁹Solagi ijoki, ng'wilange kūfuma kūlī nene, nguno ū nene nalī mfula na nalī ng'widohya ū mu ng'holò; ū mu gīko hū būkwifuula ū būpanga wing'we.

³⁰Nguno īlī shinogu ū kūlītūmamīla ī lijoki lyane; hama nū nigo gwane gūlī mbūpu.”