Read Sukuma Bible 2015 – Bibilia Ilagano Lya Kale 2015 Matayo 12 Bible Online

Matayo 12 - Sukuma Bible 2015 – Bibilia Ilagano Lya Kale 2015 bible

Matayo 12

¹Ī likanza lyenīlo ū Yesu ūbūūka ajile, ūbītīla mu migūnda ya būsīga, nīyo yalī sabato. A bahemba bakwe baalī batuuba, na lūūlū būyūbīnza mangala bagayūgūla, balya ī mbeke.

²A Bafalisayo aho bababona balīīta gīko, būng'wīla ū Yesu gīkī, “Alibalolage a bahemba bako; balīīta mhayo ūyo gūlī ngilo kwītwa ha sabato!”

³Nang'hwe ūshosha alībawīla gīkī, “A bing'we mutaalī ū kūsoma ūmo akīītīla ū Daūdi na a babo walī nabo aho baalī batuuba?

⁴Ī gīkī akingīla mu numba ya ng'wa Seeba, ūkalya migatī ya kūtūūlwa kū būtongi bo ng'wa Seeba, īyo yalī ngilo ū kwīlya ū wei na a biye, ūlū ītī bagabīji dūhū?

⁵Nūūlū hangī mutaalī ū kūsoma ūmo shihayīlile ī shilagīlo, ī gīkī ū mu lūshikū lo sabato a bagabīji bakīkenaagūlaga ī sabato ū mu hekalu, alīyo a boi bikala batī na shisembo?

⁶Alīyo nalīmuwīla ī haha alīho a henaha ntaale kūtinda hekalu.

⁷Ūlū ni mumanile a makūlū ga mhayo ūyū, gīkī, ‘ī shigongo shiniyegije kūtinda shitambo;’ ni mutabasolile būbi abo batī na būbi.

⁸Nguno ū Ng'wana wa Munhū hū Seeba wayo nī sabato.”

⁹Aho wīnga ū kwenūko, ūūkingīla ng'wisinagogi lyabo.

¹⁰Walīmo na munhū wa nkono gūlemahalile. Hūna lūūlū īkī baalī batogilwe kūnsola būbi ū Seeba, būmūja gīkī, “Īdūlīkanile ū kūpīja a ha sabato?”

¹¹Nang'hwe ūbashokeja ūhaya, “Ū mu bing'we, alīho nani ūyo alī na ng'holo īmò, hūna yūgwīla ng'wichongo ha sabato ūyo atībūūcha kwīfunya mo?

¹²Al'ū munhū atīkīlile kūle ī ng'holo? Hū kūhaya īdūlīkanile gete ū kūbeeja yawiza a ha sabato!”

¹³Hūna ūng'wīla ū munhū ng'wenūyo gīkī, “Gūgoloolage ū nkono gwako.” Ng'hana ūgūgoloola gūpīla, gūlenganīla nū ng'wichago.

¹⁴Būfuma hanze a Bafalisayo, būūkandya kūbeeja long'we ya kūnyagaja!

¹⁵Ū Yesu aho wagūdeeba ū gwenūyo wīnga ho a henaho, na banhū bingī būnondeela. Ūūkabapīja pye abo baalī basaatile.

¹⁶Kwike wabalemejaga batizūja kūnkumūcha.

¹⁷Gūbiza gwashikīīla ūyo gūhayiwe na ng'hangi Isaya gīkī,

¹⁸“Nolagi ū Ntūmami wane ū Nsolwa, hū ng'wene ū Ntogwa wane, ūyo ng'holò yane yīnyegelile; Nakūntūūlīla Moyo wane, nang'hwe akūlomeela būtūngīlīja kū mahanga.

¹⁹Atalagaagaana nūūlū atalayoganya; munhū ataliigwa ilaka lyakwe mu mapanda.

²⁰Nūūlū kadete kalabūkile atīko kūkamalīja. Hangī nūūlū kalūtambī kakūzukīīlaga lyochi atīko kūkajimya, kūshisha ū būtūngīlīja abūtūūle mu būpyeni.

²¹Hama ū kwisagīlwa kwa mahanga gose kūkūbiza mu lina lyakwe.”

²²Walīho munhū w'isamva, hangī walī mboku na shimuumu, akenhwa ū kūlī Yesu ūpījiwa; ūdūla ū kūyomba nū kūbona.

²³Pye a banhū būkumya no, būyiwīla gīkī, “Ū ng'wenūyū akūduuma kūbiza Ng'wana wa ng'wa Daūdi?”

²⁴Alīyo a Bafalisayo aho bigwa, a bene būyūhaya gīkī, “Ū ng'wenūyū atūdūla ū kūgapeeja a masamva ūlū ītī mu būdūla w'itaale lya masamva ī Lībelizebuli!”

²⁵Nang'hwe ū Yesu ūgamana a maganiko gabo, ūbawīla gīkī, “Būlī būtemi ūlū būgabanīka hūna wandya kwilwisha boi wenekīlī na wenekīlī, būtūlama. Nūūlū nzengo, nūūlu kaya ūlū yandya kwiyūbūkīla yoyi yonekele, igūkūgwa; pyī nūūlū kaya ītūlama!

²⁶Ī gīsī lūūlū, ū Shetani ūlū wandya kūmpeeja Shetani, angū numho ogabanīkile. Hama a henaho būkwīmīīla ginehe lūūlū ū būtemi bokwe?

²⁷Nīyo hangī, ū nene ūlū nakūgapeejaga a masamva mu būdūla bo ng'wa Belizebuli, al'a baana bing'we a bene bakagapeejaga mu būdūla kī? Hūna lūūlū managi gīkī, a benabo hū bakūbiza balamuji bing'we!

²⁸Alīyo ūlū nakūgapeejaga a masamva mu nguzu ja ng'wa Moyo wa ng'wa Seeba, numho hū kūhaya ū būtemi bo ng'wa Seeba bong'wizīīlile!

²⁹“Nūūlū adūgije ginehe munhū ose ose kwingīla mu numba ya ngosha o nguzu, wandya kwīnja shikolo shakwe bo makaala? Dūhaya akwandya antunge tame ū ng'wenekīlī kaya, h'adūle ū kwīyiboneela ī kaya yenīyo?

³⁰Ūyo atī hamò na nene, alī ng'wilwisha wane; nū yūyo atūkumingaga hamò na nene, akūbbalasanyaga!

³¹Na lūūlū nalīmuwīla gīkī, a banhū badūgije kūlekejiwa pyī ī shibi, nūūlū būsondagūji. Alīyo ū mhayo gwa kūnsondagūla Moyo Ng'wela, ū gwene gūtī gwa kūlekejiwa na hado yaya!

³²Hangī nūūlū munhū ūng'haya kībi ū Ng'wana wa Munhū, adūgije ū kūlekejiwa. Alīyo ūyo ūng'haya kībi Moyo Ng'wela, atīko kūlekejiwa na hado yaya; ībize ng'wikanza īlī, nūūlū īlo līliza!”

³³“Ū ntī ūlū ng'ūgūgoyela gūbeela, na a matwajo gakūbiza gawiza. Ūlū gūlekanījiwa gūbipa, na a matwajo gakūbiza ga gabubi, nguno ū ntī gūkamanīlagwa kū matwajo gago.

³⁴Bing'we būbyīle wa nzoka, mudūgije ginehe ū kūhaya mihayo mitengeke alīyo a bing'we benekīlī mulī babūbi? Nguno ū nomo gūkayombaga īyo yokalile mu moyo!

³⁵Ū munhū wawiza akafunyaga shawiza ū kwīnga ū mu shawiza īsho; nū wa malofu nang'hwe akafunyaga sha malofu ū kwīnga ū mu sha malofu īsho ibīkīgije.

³⁶Alīyo nalīmuwīla gīkī, ū mu lūshikū lo kūlamulwa, a banhū bakūfunya būsombooji kūlwa būlī mhayo gwa bubi ūyo bakūgūyombaga.

³⁷Nguno ūkūbalīlwa būtūngīlīja kūlenganīla nī mihayo īyo ūkwīyombaga, nūūlū ūkūbalīlwa nsango kūlenganīla nī mihayo īyo ūkwīyombaga!”

³⁸Hūna balangi balebe ba shilagīlo hamò na Bafalisayo, būnshokeja būng'wīla gīkī, “Nangi tūtogilwe ūtoolekeje shimanīkījo.”

³⁹Nang'hwe ūbashokeja ūhaya, “Shibyalīlwe shabūbi na shabashihani shitankūgije Seeba, shikūkoobaga shimanīkījo. Alīyo shitinhwa shimanīkījo, ūlū ītī sha ng'wa Yona dūhū!

⁴⁰Nguno gīt'ūmo Yona akadīla mu nda ya ndīlo nhaale shikū idatū līīmi na būjikū, nū Ng'wana wa Munhū shing'wigeleelilwe kūdīla mu gatī ya sī shikū idatū, līīmi na būjikū!

⁴¹Nīyo ū mu lūshikū lo kūlamulwa, a banhū ba Ninawi bakwīmīīla nasho ī shibyalīlwe īshi bashenheleje kwinhwa nsango; nguno a bene aho bawigwa ū būlomeeji bo ng'wa Yona bakagalūka. Alīyo ī haha ūyo alīho aha ng'wene ntaale kūtinda Yona.

⁴²Ū mu lūshikū lwenūlo nū ntemi nkīma wa sī ya dakama akwīmīīla nasho ī shibyalīlwe īshi ashenheleje kwinhwa nsango; nguno ū ng'wene akafuma kū sī ya kūle, wiza kūlī Solomoni kūdegeleka mihayo yakwe ya masala, alīyo ī haha ūyo alīho aha ng'wene ntaale kūtinda Solomoni.”

⁴³“Huna lūūlū, ū moyo nsoso ūlū kumfuma munhū, gūkajaga guliyesa ūko na ūko gūlihūnja mu matogolo aga gatī na minzī, gakokoobaga na kuifuulila. Alīyo kūgayiwa,

⁴⁴gūkahayaga gīkī, ‘ī gete nashoke ū kū numba yane ūmo naafumile!’ Gwakūhayiza, gwīsanga īlī buyīkī niyoinyagulilwe na i lngije chiza.

⁴⁵Hūna gūja kūsoleleja myoyo yīngī mpungatī, misoso kūgūheeba ū goyi, gwiza nayo; pyī yingīla yikala mo. Ī ng'halīlo ya ng'wa munhū ng'wenūyo īkabizaga yabūbi no, kūtinda ūmo walī ī kwandya. H'ūmo īlī nū kū shibyalīlwe ī shabūbi īshi!”

⁴⁶Aho ataalī ūbasomboolela a banhū, kūhayimanīla ū nina wīmīīla hanze, hamò na a baana ba ng'wawe ū Yesu; baalī batogilwe kūlūngalūnga nang'hwe.

⁴⁷Munhū ūmo ūng'wila giki, “Ū noko alīhanze wīmūlaga na baznayo; patoglwe kūlūngalūnga nang'ho.”

⁴⁸Nang'hwe ūnshokeja ūhaya, “Nani ū mayū ū nene? Na a bazuna bane banani?”

⁴⁹Hūna ūgoloola nkono alīboolecha a bahemba bakwe, kūnū alīhaya gīkī, “Baaba mulībabona aha a bamayū na a bazuna bane.

⁵⁰Nguno būlī ng'wene ūyo akwītaga īyo Baba wa ng'wigūlū atogilwe, ū ng'wenūyo hū nzuna wane, n'ilūmbū lyane, na mayū.”