Read Sukuma Bible 2015 – Bibilia Ilagano Lya Kale 2015 Matayo 13 Bible Online

Matayo 13 - Sukuma Bible 2015 – Bibilia Ilagano Lya Kale 2015 bible

Matayo 13

¹Ū lūshikū lwenūlo, ū Yesu aho wafuma ū mu kaya akaja ūūkigasha kū ng'walo gwa nyanza.

²Mbūka ntaale ya banhu yong'okaklūla kūshisha nose wingīla mu lyato wigasha, a mabita ga banhū gīmīīla ha ng'walo.

³Wandya kūbalomeela mihayo mingī mu shigemeng'hejo; ūhaya gīkī, “Mībi akafuma, ūja kūbība mbīyū.

⁴Aho alībība, jingī jūgwīla mu nzīla; jiza noni jūjilya.

⁵Jingī jūgwīla mu sī ya mawe mawe, jūgehelwa ī sī ya kūjifukīīla; ahene jikangūha ū kūzwa īkī jalī jitafukīīlilwe chiza.

⁶Alīyo aho lyaseba ī līīmi, lyūjoocha jūjiga, nguno jalī jitī na miji ya kwigela.

⁷Jingī jūgwīla mu ming'hwa, aho jilīkūla na a ming'hwa gūkūlanīja najo, gūjishiteleja.

⁸Alīyo jingī jikagwīla mu sī yawiza jūtwaja matwajo, jimò igana, jingī makūmi atandatū, na jingī makūmi adatū.

⁹Ūyo alī na matū ni igwage.”

¹⁰Hūna a bahemba bakwe biza būmūja gīkī, “Nibūlī ūkūtūmamīlaga shigemeng'hejo dūhū ūlū ūkūbalangaga?”

¹¹Nang'hwe ūbashokeja ūhaya, “A bing'we ng'winhilwe būmani, mujimane ī mbisīla ja būtemi bo ng'wigūlū; alīyo a boi batinhilwe.

¹²Nguno būlī ng'wene ūyo alī na shikolo, akongejiwa na shingī; alīyo ūyo atī na shikolo akataajiwa nī shisho alī nasho.

¹³Nakūtūmamīlaga shigemeng'hejo ūlū nalībalanga, nguno, bakūlolaga, alīyo ū kūbona yaya. Nū kūdegeleka bakūdegelekaga, alīyo ū kwigwa yaya; nūūlū kwitegeleja ndūhū.

¹⁴Na lūūlū ū būhangi bo ng'wa Isaya būkūshikīlījiagwa ū mubo; ūbo būhayile gīkī, ‘Ū kwigwa mukwigwa, alīyo mutitegeleja; nū kūlola mukūlola, alīyo mutūbona.

¹⁵Nguno ī ng'holò ja banhū benaba ngūnu no, na a matū gabo ayo bakūdegelekelaga gachibile; na a miso gabo gabbokulile. Ūlū ītī chene, ni balībona na miso gabo, nū kwigwa ni baliigwa na matū gabo, nū mu ng'holò jabo ni bitegeleja, būgalūka, nūbapīja!’

¹⁶“Alīyo a bing'we mulī na lubango īkī a miso ging'we gakūbonaga, na a matū ging'we gakwigwaga.

¹⁷Nguno nalīmuwīla gwa ng'hana gīkī, bahangi na batūngīlīja bingī baalī batogilwe kwībona īyo mukwībonaga alīyo batībonile; na kwīyigwa īyo mukwīyigwaga alīyo batīyigwile.”

¹⁸“Hūna lūūlū, degelekagi a makūlū ga shigemeng'hejo sha mībi.

¹⁹Būlī munhū ūlū ūgwigwa ū mhayo gwa būtemi bo ng'wa Mulungu alīyo ūleka ū kūgwitegeleja, akizaga ū Mi ogūpula ū mu ng'holò yakwe ūmo gūkahambagwa; ū ng'wenūyo alī gīt'ūmo jilī ī mbīyū ījo jikagwīla mu nzīla.

²⁰Alīyo ī mbīyū ījo jikagwīla mu sī ya masegeng'he, ū ng'wene al'ūyo akagwigwaga ū mhayo wagwanukūla wangū wangū na būyegi.

²¹Kwike gwikala gūtī na miji ū mulī we. Gūkangunanhaga ikanza iguhī dūhū, alīyo ūlū gilonga makoye nūūlū būluhi kūlwa nguno yago ū mhayo, haho na haho akagwaga.

²²Hama ī mbīyū ījo jikagwīla mu ming'hwa, ū ng'wene alī ūyo akagwigwaga ū mhayo, kwike gwashitelejiwa na myatīla ya būlī lūshikū, na būlemba lembi bo sabo; gwagaiwa a matwajo!

²³Alīyo ī mbīyū ījo jikagwīla mu sī yawiza, ū ng'wene h'ūyo akagwigwaga ū mhayo wagwitegeleja, watwaja matwajo, hamo igana, ūngī makūmi atandatū, ūngī makūmi adatū.”

²⁴Ūbawīla shigemeng'hejo hangī alīhaya gīkī, “Ū būtemi bo ng'wigūlū būshikile kwikolanījiwa na munhū ūyo akabība mbīyū jawiza mu ngūnda gokwe.

²⁵Alīyo aho balaalile a banhū, wiza ng'wanishi wakwe ūtūlagūlīla mo mbīyū ja pūngū, hūna wīnga!

²⁶Jahayūzwa na kwandya kūtwaja, jūbonekana mo na pūngū.

²⁷Biza a batūmami bakwe būng'wīla gīkī, ‘Baba ūtabībile mbīyū jawiza ū mu ngūnda gwako? Hama jafumaga halī hangī ī pūngū?’

²⁸Nang'hwe ūshosha alībawīla gīkī, ‘Ng'wanishi wagūbeegije ū gwenūyo.’ A batūmami būmūja, ‘Hamo ūlītogwa tūkajidubbagūle ī pūngū?’

²⁹Ūbashokeja alīhaya, ‘Yaya mutizūbūhūbīla nū būsīga bone. Nguno ū ng'wikanza lya kūjidubbūla ī pūngū, mudūgije kūhūbīla ng'ūbūdubbūla nabo.

³⁰Jilekagi jikūlanīje dūhū, līkūshika ī likanza lya kūgesa; ū ng'wikanza lyenīlo hū nakūbawīla a bagesi gīkī, Jikumingagi tame ī pūngū mujitunge maganda maganda mujipembe mu moto. Ū būsīga būgolanyagi chiza mubūtūūle ng'wiluuli lyane.’”

³¹Hangī ūbinha shigemeng'hejo shingī alīhaya gīkī, “Ū būtemi bo ng'wigūlū būbange gītī kabīyū ka haladali, ako munhū akakasola ūūkakahamba ng'wilaale lyakwe.

³²A koyi kalī kado ka bado ū mu mbīyū pyī ī jose, alīyo ūlū kūūzwa na kūkūla, līkabizaga Isaka itaale kūtinda pye ī mitī ya masaka. Gūkabizaga ntī ntaale no, na noni ja kūlala jikapandīkaga wikalo ū mu matambī galyo.”

³³Hangī ūbawīla shigemeng'hejo shingī alīhaya gīkī, “Ū būtemi bo ng'wigūlū wikolile na shibimbya, īsho nkīma akasola ūgūlanya mu ngele idatū ja būsu, shūbūdudumya pyī ū bose.”

³⁴Ī yose yenīyī ū Yesu wabasomboolelaga a banhū mu shigemeng'hejo; atabasomboolelile mhayo nūūlū gūmò, ūlū ītī mu nzīla ya shigemeng'hejo.

³⁵Ū mu gīko gūshikīlījiwa ūyo gūhayiwe kūbītīla mulī ng'hangi gīkī, “Nakūlūngalūnga sumo na nomo gwane, nakūfubola mbisīla ja kūfuma kū shikū ja wandījo.”

³⁶Hūna ū Yesu ūbalaga a banhū, ū wei ūshoka kaya, wiza wingīla mu numba. A bahemba bakwe būnsanga mo; būng'wīla, “Tūwīlage a makūlū ga shigemeng'hejo sha pūngū mu ngūnda.”

³⁷Nang'hwe ūshosha alīhaya gīkī, “Ū mībi wa mbīyū jawiza alī Ng'wana wa Munhū.

³⁸Ū ngūnda gwene sī, ī mbīyū ī jawiza bene baana ba mu būtemi, ī pūngū jene baana ba Ng'wanishi.

³⁹Ū ng'wanishi, ū ng'hambi wa pūngū ng'wene Shetani. A magesa būlī būkalīkījo w'ikanza, a bagesi bamalaika.

⁴⁰Ali lūūlū, ūmo pūngū jikakumingīlagwa japemva mu moto, h'ūmo īkūbizīla nū kū būkalīkījo w'ikanza.

⁴¹Ū Ng'wana wa Munhū, akūbatūma a bamalaika bakwe hose hose ū mu būtemi bokwe, baje balīkuminga būlī shikolo īsho shikenhelejaga kwipama; pye na a bagomi a bose.

⁴²Hūna bakūbaponya ng'wichongo lya moto, ūmo kūkūbiza kūlīla na kūshelanya mino.

⁴³Alīyo a batūngīlīja, bakūbiza ba kūng'weka ng'weka gītī līīmi ū mu būtemi bo ng'wa Saabo. Ūyo alī na matū ni igwage.”

⁴⁴“Ū būtemi bo ng'wigūlū būbizile gītī sabo, īyo yalī yifumbīkile ng'wilaale līmò, wahayībona munhū nebe ongeja ū kwībisa. Hūna kūlwa būyegi bokwe, ūja ūūkajinja pyī ī shikolo īsho walī nasho, ūūkalīgūla ī lilaale lyenīlo.

⁴⁵Na hangī ū būtemi bo ng'wigūlū būbizile gītī nsūlūja, nchooji wa mawe ga mpango.

⁴⁶Aho wabona iwe lya mpango ntaale, ūja ūūkajinja pyī īsho walī nasho, ūlīgūla ī liwe lyenīlo.”

⁴⁷Ūhaya na gīkī, “Ū būtemi bo ng'wigūlū būbange gītī igokoolo, īlo līkaponejiagwa mu nyanza lyagobanīja shikolo sha būlī mbika.

⁴⁸Lyakūhayūdutwa, ūlū lyashishiwa a ha ng'walo, bakigashaga kūsolanhya. Ī shawiza batūūla mu shiseme, lelo a ga būbi bagaponanja!

⁴⁹H'ūmo īkūbizīla nū kū būkalīkījo w'ikanza; a bamalaika bakūja balībasolanhya a babūbi kūbīnja ū mu batūngīlīja.

⁵⁰Bakūbaponya ng'wichongo lya moto, ūmo kūkūbiza kūlīla na kūshelanya mino!”

⁵¹Hanuma ū Yesu ūbabūja, “Ahene mulīyitegeleja pyī ī yenīyī?” Nabo būshosha, “Alichene.”

⁵²Ūbawīla hangī gīkī, “Hūna lūūlū, būlī ng'wene ūyo alangilwe mihayo ya būtemi bo ng'wigūlū, abizile gītī namugī ha ng'wakwe, ūyo akafunyaga shikolo shipya na shikūlūkūlū, kwīngīīla mu wibīkīja bokwe.”

⁵³Ū Yesu aho washikalīcha ī shigemeng'hejo shenīsho, wīnga a henaho.

⁵⁴Wahayūshika ū mu nzengo go ng'wawe wingīla ng'wisinagogi lyabo, wandya kūbalanga. Būyūkumya baliwīla gīkī, “Bing'we ū ng'wenūyū wafunije halī pye a masala genaya, nū būdūla wenūbū?

⁵⁵Tūhaya hū ng'wene ū ng'witūnja wa ng'wa selemala, nīyo nū nina akitanagwa Malia? Angū na a bazunaye ba Yakobo na Yosefu na Simoni na Yuda!

⁵⁶Atī hū ng'wene ūyo na balūmbūye tūkwikalaga nabo ng'wenūmu ūmu? Hama ū wei wīfunije halī pyī ī yenīyī?”

⁵⁷Yūbatabanya ī mihayo yakwe, bipama! Nang'hwe ū Yesu ūbawīla gīkī, “Ū ng'hangi atadalahagwa hose hose, ūlū ītī mu nzengo go ng'wawe na mu kaya ya ng'wawe.”

⁵⁸Na lūūlū atabeegije mingī ī ya koolecha būdūla, kūlwa nguno ya būtūzunya wabo.