Read Sukuma Bible 2015 – Bibilia Ilagano Lya Kale 2015 Matayo 15 Bible Online

Matayo 15 - Sukuma Bible 2015 – Bibilia Ilagano Lya Kale 2015 bible

Matayo 15

¹Hūna Bafalisayo na balangi ba shilagīlo ba kūfuma Yelusalemu, būnsanga ū Yesu kūmūja gīkī,

²“Nibūlī a bahemba bako bakūshikenaagūlaga ī shīmīle īsho twalekelwa na bataale, batūkalabaga tame a makono gabo ūlū bahaya kūlya ī shilīwa?”

³“Nang'hwe ūbashokeja ūhaya gīkī, ‘Hama ī gīsī, nibūlī a bing'we mukashikenaagūlaga ī shilagīlo sha ng'wa Mulungu kūlwa kūdima shīmīle shing'we?’

⁴Īkī ū Mulungu ahayile gīkī, ‘Nkūjage so na noko’; na gīkī, ‘Ūyo ūndūka ise nūūlū nina shing'wigeleelilwe kūbūlagwa!’

⁵Alīyo a bing'we muhayile gīkī, ose ose ūlū ūlinda ūng'wīla ise nūūlū nina gīkī, ‘ī shikolo shane īshi ni shakūgunanha, kwike shafunyiwe kūbiza inong'ho kūlī Mulungu!’

⁶Na ng'hana ū munhū ng'wenūyo atūdūla ū kūnkūja ū ise nūūlū ū nina. Ū mu gīko mukagūkenaagūlaga ū mhayo go ng'wa Mulungu kūlwa nguno ya shīmīle shing'we!

⁷Bing'we bibeeleja, ū Isaya atūngīlīgije ū mu būhangi ūbo abūhayile kūlwa nguno ying'we; ūmo ahayīlile gīkī,

⁸‘A banhū aba banikūgije bo ha nomo dūhū, alīyo ū mu ng'holò balī kūle nū nene.’”

⁹“Bakanilamyaga dalali, alīyo kūnū būlanga malange ga kūlagīlwa na banhū.”

¹⁰Hūna ū Yesu ūlitana ī libita lya banhū būng'wegeela; ūbawīla gīkī, “Bing'we degelekagi ng'witegeleje.

¹¹Gīkī, īsho shikingīlaga mu nomo go ng'wa munhū shitansosohajaga, alīyo īsho shikafumaga mu nomo gokwe h'īsho shikansosohajaga.”[4]

¹²Ha numa ya yenīyo, a bahemba bakwe būng'wegeela būng'wīla, “Ūmanile ī gīkī a Bafalisayo bakolagwa no ū kūgwigwa ū mhayo gwenūyo?”

¹³Nang'hwe ūbashokeja ūhaya, “Būlī shene ī shizwile, īsho shitahambilwe na Baba ūyo alī ng'wigūlū, shikūdubbūlwa.

¹⁴Balekagi; nguno a benabo babboku, na batongeeji ba babboku. Ū mbboku ūlū ūntongeela mbboku ng'wiye, bakūjūgwīla ng'wichongo būbīlī wabo!”

¹⁵A henaho ū Petelo ūng'wīla ū Yesu gīkī, “Tūwīlage a makūlū ga lūsumo lwenūlo.”

¹⁶Nang'hwe ūshosha ūhaya, “Na a bing'we mutaalī ū kwitegeleja?

¹⁷Mutamanile gīkī būlī shene īsho shikingīlaga mu nda kūbītīla mu nomo, ī ng'halīlo yaho īkabizaga kūfuma hanze kwitogolo?

¹⁸Alīyo īsho shikafumaga mu nomo, shikīngaga mu ng'holò. Ī shenīsho h'īsho shikansosohajaga ū munhū!

¹⁹Nguno īsho shikafumaga mu ng'holò, shilī maganiko mabi, būbūlagi, būshihani, būjingi, wibi, būlomolomo na būdalahi.

²⁰Ī yenīyī h'īyo īkansosohajaga ū munhū; lelo ū gwa kūlya na makono gatakalabije, ū gwene gūtī gwa kūnsosohaja munhū na hado yaya.”

²¹Hūna ū Yesu wīnga a henaho, ūja mhandī ja Tulo na Sidoni.

²²Kwitulwa nkīma ūmò, muna Kanaani wa mhandī ja kwenūko, wiza akūlīlaga alīhaya gīkī, “Nikūlīlagwe Seeba Ng'wana wa ng'wa Daūdi, nalī na nshīke wane akūkoyiagwa isamva!”

²³Alīyo ū Yesu atanshokegije nūūlū hado; a bahemba bakwe būng'wegeela būng'wikūmbīlīja balīhaya, “Nzunīlījage aje, nguno alikala ūtūkūūbīlīja no, kūnū akūlīlaga!”

²⁴Nang'hwe ūbashokeja gīkī, “Ū nene natūmilwe kū ng'holo ja numba ya Isiraeli, ījo jijimīīlile.”

²⁵Ū nkīma ūng'wegeela wiza ūntugīja mazwi, ūng'wikūmbīlīja ūhaya, “Nigunanhage baba!”

²⁶Nang'hwe ū Yesu ūnshokeja alīng'wīla gīkī, “Ītī chiza ū kūsola shilīwa sha baana ūshiponegeja tūwa.”

²⁷Ū nkīma ng'wenūyo ūhaya, “Na ng'hana gūlī chene baba, alīyo nahene nū tūwa nato tūkasolelejaga a malagalīkwa ayo gakalagalaga ūlū balīlya a beneto.”

²⁸A henaho ū Yesu ūng'wīla ū nkīma ng'wenūyo gīkī, “Bebe mayū, ūlī na kūsanya kūtaale. N'ībizage gīt'ūmo ng'hūmbū jako jilī.” Ng'hana ū nshīke wakwe ūpīla ī likanza lyenīlo.

²⁹Wīnga nū kwenūko ū Yesu, ūja akūshimīzaga hihī hihī ya nyanza ya Galilaya. Akīīta ūja ūūkalinha mu lūgūlū, wigasha ng'wenūmo.

³⁰Nū kwene gūnkūūbīja mabita mataale ga banhū, galīng'wenhela pye abo baalī basaatu, babboku, balemehazu, būyaga na bashimuumu. Na bangī bingī dūhū, būyūshika babatūūla kū magūlū gakwe wabapīja.

³¹A mabita ga banhū genayo, gūkumya ū kūbabona a bashimuumu bayūyomba, na a basaatu bayūpīla, na a balemehazu bayūshimīza, na a babboku bayūbona. A banhū benabo būnkumīlīja Mulungu wa Isiraeli.

³²Hūna ū Yesu ūbitana a bahemba bakwe ūbawīla gīkī, “Nalībasaatwa a banhū nguno ī haha jashikaga shikū idatū balī hamò nane, alīyo batī na shilīwa. Natatogilwe ū kūbalaga baje balī nzala, nguno badūgije nūūlū kūgwa wesa mu nzīla.”

³³Nabo a bahemba bakwe būng'wīla gīkī, “Ū mu matogolo ūmu tūkapandīkīle halī shilīwa shingī sha kūbigela a banhū na wingī aba?”

³⁴Nang'hwe ū Yesu ūbabūja, “Mulī na migatī yīnga?” Būhaya, “Mpungatī na tūdīlo tūgehu.”

³⁵Hūna ūlagīla gigashe ha sī a mabita ga banhū.

³⁶Wīsola ī migatī īyo mpungatī nū tūdīlo twenūto; ūlūmba, ūshimeganya. Ūbinha a bahemba bakwe, nabo a bahemba būbagabanhya a banhū.

³⁷Pye būlya bigeja; aho bagasoleela a masaajiwa, bokaja matangwa mpungatī.

³⁸A banhū abo bakalya baalī shihūmbī shine, kūleka kūbisaaba a bakīma na a baana.

³⁹Hūna ūgalaga a mabita ga banhū, ū wei wingīla mu lyato, ūja kū sī ya Magadala.