Read Sukuma Bible 2015 – Bibilia Ilagano Lya Kale 2015 Matayo 18 Bible Online

Matayo 18 - Sukuma Bible 2015 – Bibilia Ilagano Lya Kale 2015 bible

Matayo 18

¹Ū ng'wikanza lyenīlo a bahemba būng'wegeela ū Yesu; būmūja gīkī, “Ī gīsī ng'hana ū ntaale ū mu būtemi bo ng'wigūlū ni munhū kī?”

²Nang'hwe witana kanīgīnī, kiza kīmīīla hamò nabo.

³Hūna ūhaya, “Nalīmuwīla gwa ng'hana gīkī, ūlū mutagalūkile na kūbiza gītī banīgīnī, mutūdūla gete ū kwingīla ū mu būtemi bo ng'wigūlū.

⁴Na lūūlū būlī ng'wene ūyo widohya gītī nīgīnī ng'wenūyū, ū ng'wenūyo hū ntaale ū mu būtemi bo ng'wigūlū.

⁵Hangī ūyo ūng'wanukūla nīgīnī gīt'ūyū mu lina lyane, wananukūlaga nene.”

⁶“Hama ūlū munhū ūng'wenheleja kwipama nūūlū ūmò wa bado bado abo banisanije nene benaba, ībeelelile atungīlījiwe ū mu nhingo yakwe iwe lya kūshela, akaponejiwe mu nyanza shimu, achīle ng'wenūmo.

⁷Ī sī īlī mu kwihīga kūlwa mihayo ya kwipamya, nguno ī yene ng'hana īlīho; alīyo ū munhū ūyo wenheleja mhayo gwa kwipamya, alī mu kwihīga kūtaale no.

⁸Hū kūhaya nūūlū nkono gwako ūlū gūkwipamya, gūbbutage ūgūponye kūle, ūlekane nago; pye nūūlū ni lūpambala lwako. Ībeelelile wingīle ū mu būpanga ūlī nemehazu, nūūlū ūlī gigī; kūtinda kūbiza na makono abīlī, nūūlū mhambala ibīlī, alīyo ūponyiwa mu moto gwa būja na būja.

⁹Nūūlū lyūkwipamya liso lyako, līkobolage ūlīponye kūle, ūlekane nalyo. Ībeelelile wingīle ū mu būpanga nūūlū ūlī na songo, kūtinda kūbiza na miso abīlī, alīyo ūponyiwa mu nyanza ya moto.”

¹⁰“Ilang'hanagi mutizūndalaha nūūlū ūmò wabo a bado bado benaba. Nguno nalīmuwīla gīkī, a bamalaika babo bakīmīīlaga būlī lūshikū kū būtongi bo ng'wa Baba ūyo alī ng'wigūlū, kūlwa nguno yabo. [

¹¹Nguno ū Ng'wana wa Munhū, wizile kūkooba na kūpīja īsho shijimīīlile.]

¹²Ī gīsī mulībona ginehe, ūlū munhū alī na ng'holo igana, hūna yūjimīīla īmò yajo, atīko kūjileka ījo makūmi kenda na kenda kū matūmbī, ūja akwīkoobaga īyo yatagalījaga?

¹³Nalīmuwīla gwa ng'hana gīkī, ūlū wīpandīka akwīyegela no, kūtinda ījo makūmi kenda na kenda, ījo jalī jitajimīīlile.

¹⁴H'ūmo īlī nū kūlī Sīng'we ūyo alī ng'wigūlū, atatogilwe ajimīīle nūūlū ūmò wabo a bado bado benaba.”

¹⁵“Ali lūūlū, ūlū ndūgūyo ūhūba, jaga iyene ūkang'hūgūle mulī babīlī gīko dūhū; ūlū ūkwigwa, ūkūbiza wangunanha ū ndūgūyo.

¹⁶Alīyo ūlū ūlema ū kūkwigwa, solaga hangī ūmò nūūlū babīlī ūje nabo; nguno būlī mhayo shiigelile gūkaanīlwe na banhū babīlī nūūlū badatū.

¹⁷Ūlū ūbalemeela na a benabo, īwīlagi ī kanisa; ūlū ūlinda wīlemeela na kanisa, ng'wisaabagi gīkī ataamanile Mulungu, nūūlū gītī ntobisha wa goodi.

¹⁸Zunyagi nalīmuwīla gwa ng'hana gīkī, yose yose īyo mukwītunga mu sī, īkūbiza yatungagwa ng'wigūlū; nī yīyo mukwīzunīlīja mu sī, īkūbiza yazunīlījiagwa ng'wigūlū.

¹⁹Na hangī nalīmuwīla gīkī, nūūlū babīlī bing'we bizunīlīja kūlwa mhayo gose gose mu sī, shose shose īsho bakūlomba bakwītīlwa nū Baba ūyo alī ng'wigūlū.

²⁰Īkī aho balī babīlī nūūlū badatū bibilingaga mu lina lyane, a henaho nū nene nalīho hamò nabo.”

²¹Kwimanīla ū Petelo wang'wegeela; ūmūja gīkī, “Seeba ū ndūgū wane ūlū kūshisha ng'hangala jinga akūnihūbaga, nane nakūmanaga nūnekeja dūhū? Angū mmho ūlū kūshisha ng'hangala mpungatī!”

²²Nang'hwe ū Yesu ūng'wīla gīkī, “Natūkūwīlaga kūshisha ng'hangala mpungatī, alīyo makūmi mpungatī ng'hangala mpungatī.

²³Hūna lūūlū, ū būtemi bo ng'wigūlū būkwikolanījiwa na ntemi nebe, ūyo akabona ībeelelile kūloja basese bakwe kalang'hanīle ka sabo jakwe.

²⁴Wahayandya ū kūbaloja, wenhwa ūmò walī na būgasa bo talanta shihūmbī ikūmi 10,000.[6]

²⁵Aho wagayiwa ī sha kūfunya, ū ntemi ūlagīla gīkī ajinjiwe ū wei ng'wenekīlī, nū nke na a baana bakwe; nī shikolo shakwe pyī ī shose, būlīpwe ū būgasa!

²⁶Ū nsese ng'wenūyo ūgwa kū magūlū ga ntemi ūndayīīla alīhaya; ‘Iyūmīlījage baba ntemi ūnilinde ho hado niyanga yangīle, nakūkūlīpa dūhū ū būgasa pyī ū bose!’

²⁷Ū ntemi ūnchīla shigongo ū nsese ng'wenūyo; ūntungūla, nū būgasa ūnekeja.

²⁸“Alīyo ū nsese ng'wenūyo aho wīnga dūhū a henaho, ūmona ūmò wa basese biye, walī na būgasa kūlī we bo denali igana līmò.[7] Ūng'haja mu nhingo kūnū alīng'wīla, ‘Līpaga ū būgasa wako!’

²⁹Nang'hwe ū nsese ng'wiye ūntugīja mazwi ūndayīīla alīhaya, ‘Iyūmīlījage ūnilinde ho hado nakūkūlīpa dūhū!’

³⁰Alīyo atankūlīlilwe, ūnsola ūūkansoosela mu jeela kūshisha aho alamalīlaga kūbūlīpa ū būgasa bokwe.

³¹A basese biye aho babona yaja gīko būpīnīhala no, būūkang'wīla ū saabo būgonzo pyī ī yose ūmo īkajīla.

³²Hūna ū ise būgonzo ūng'witana; ūng'wīla gīkī, ‘Gashi ū bebe ūlī nsese wabūbi gīkī. Ū nene namala kūkūlekeja pyī ū būgasa haha yenīyī dūhū, nguno walī wanikūmbīlīja!

³³Yalī ītakwigeleelilwe nū bebe ū kūnkūlīlwa ū ng'wiyo gīt'ūmo naalī nakūkūlīlwa ū bebe?’

³⁴Ū ise būgonzo ūsaaya no, ūntūūla mu makono ga baluhya, aluhe kūshisha aho alamalīlaga kūbūlīpa pyī ū būgasa.

³⁵Hūna lūūlū, na a bing'we ūlū mutūdūla kwilekeja kūfuma mu gatī ya ng'holò būlī munhū na ndūgūye, h'ūmo akūng'wītīla ū Baba ūyo alī ng'wigūlū.”