Read Sukuma Bible 2015 – Bibilia Ilagano Lya Kale 2015 Matayo 19 Bible Online

Matayo 19 - Sukuma Bible 2015 – Bibilia Ilagano Lya Kale 2015 bible

Matayo 19

¹Hūna ū Yesu aho wakalīcha ū kūlanga ī mihayo yenīyo, wīnga ī Galilaya, ūja mu sī ya Būyudaya, kū nkīlo gwa Yolodani.

²Na mabita mataale ga banhū gūnondeela koi, nang'hwe ūyūbapīja.

³Bafalisayo balebe būng'wegeela kūngema, būmūja gīkī, “Angū īlīho nguno yose yose īyo īdūgije kūng'wenheleja ngosha kūmpeeja nke wakwe?”

⁴Nang'hwe ūbashokeja ūhaya, “Mutaalī ū kūsoma ī gīkī ūyo akaseema a ha wandījo akabaseema ngosha na nkīma?”

⁵Ongeja kūhaya gīkī, “Na lūūlū ū ngosha akūneka ise na nina adimane na nke wakwe. Ū mu būbīlī wabo bakūbiza mīlī gūmò.

⁶Batī babīlī hangī, balī mīlī gūmò. Kūlwa nguno yenīyo, abo badimanyiwe na Mulungu atizigela munhū wa kūbalekanya.”

⁷Būmūja hangī gīkī, “Nibūlī lūūlū ū Musa alagīlile bayinhwa talaka balekwa?”

⁸Ūbashokeja ūbawīla; “Ū Musa akamuzunīlīja ū kūbaleka a bake bing'we kūlwa nguno ya būgang'hanazu wa ng'holò jing'we, kwike gwalī gūtahelilwe gīko kūfuma a ha wandījo.

⁹Alīyo ū nene nalīmuwīla gīkī, būlī ng'wene ūyo ūneka nke wakwe ūlū ītī kūlwa būshihani, hūna ūtoola ūngī, ū ng'wenūyo wabizaga nshihani.”

¹⁰A bahemba bakwe būng'wīla gīkī, “Angū gashi ī mihayo ya ng'wa munhū na nke ūlū īlī chene, hambū hambū kūleka dūhū ū kūtoola!”

¹¹Nang'hwe ūbawīla; “Ū gwenūyo batūdūla kūgūzunya pye a banhū; na ng'hana balīho abo bagūdūgije, nguno binhwa ū būdūla wenūbo.

¹²Balīho abo batadūgije ū kūtoola nguno babyalilwe gīko, bangī kūlwa kwenhelejiwa na banhū, alīyo bangī kūlwa kwiyīngīja boi benekīlī ū būdūla bo kūtoola, nguno ya būtemi bo ng'wigūlū. Ūyo adūgije ū kūgwīta ni agwītage.”

¹³Hūna wenhelwa baana gīkī abatūūlīle makono na kūbalombela, alīyo a bahemba bakwe būbahama.

¹⁴Nang'hwe ū Yesu ūhaya; “Bazunīlījagi a baana bize a halī nene. Mutabahangījage, nguno ū būtemi bo ng'wigūlū būlī wabo, a ba mbika yenīyī.”

¹⁵Ūbatūūlīla makono, hūna wīnga ho a henaho.

¹⁶Kūhayimanīla, munhū ūmò wang'wegeela, ūmūja gīkī, “Nangi nīīte mhayo kī ū gwawiza nane nabūpandīke ū būpanga butashilaga?”

¹⁷Nang'hwe ūng'wīla; “Nibūlī ūlīnibūja ng'hūlū ja mihayo yawiza? Ū wawiza alīho ūmò dūhū! Alīyo ūlū ūtogilwe kwingīla mu būpanga shidimage ī shilagīlo.”

¹⁸Ū munhū ng'wenūyo ūmūja, “Shilagīlo kī?” Nang'hwe ū Yesu ūng'wīla, “Yaya ū kūbūlaga, Yaya ū kūshihya, Yaya ū kwiba, Yaya ū kūkaanīla būlomolomo.

¹⁹Nkūjage so na noko, na Ntogagwe nzenganwa ng'wiyo, gīt'ūmo witogelilwe bebe ng'wenekīlī.”

²⁰Nang'hwe ū sūmba ūng'wīla, “Ī yenīyo pyī nīdimile, numho nalīleba ho mhayo kī gūngī?”

²¹Ū Yesu ūnshokeja ūng'wīla gīkī, “Ūlū ūtogilwe kūbiza nshikanu, jaga ūkashijinje ī shikolo shako ūbinhe bahabī. Ū wibīkīja wako wa sabo būkūbiza ng'wigūlū, hūna wize ūnilondeele.”

²²Alīyo ū sūmba ng'wenūyo aho wagwigwa ū mhayo gwenūyo wīnga ho onzololokaga, nguno walī na sabo ningī.

²³Hūna ū Yesu ūbawīla a bahemba bakwe alīhaya; “Nalīmuwīla gwa ng'hana gīkī, īlī shilambu no ū nsabi ū kwingīla ū mu būtemi bo ng'wigūlū.

²⁴Hangī nīyo zunyagi gete gīkī, īlī shinogu ī ngamīla ū kūbīta ū mu kapūndū ka lūshinge, kūtinda ū nsabi kwingīla mu būtemi bo ng'wa Mulungu.”

²⁵A bahemba bakwe aho bigwa gīko bakakumya no, bandya kwiwīla boi benekīlī gīkī, “Yee! Alīyo lūūlū, nani ūyo adūgije ū kūpīla?”

²⁶Ū Yesu ūbakalalīla, hūna ūbawīla gīkī, “Ū gwenūyū gūtadūlīkanile ū kū banhū. Alīyo ū kūlī Mulungu pyī ī yose īdūlīkanile.”

²⁷Hūna ū Petelo ūshosha ūng'wīla; “Ī gīsī, angū ūlībona gīkī a bise twaleka pyī ī shose kūlwa kūkūlondeela bebe, gūlīho mhayo kī lūūlū ū gwise?”

²⁸Nang'hwe ū Yesu ūbawīla; “Zunyagi nalīmuwīla gwa ng'hana gīkī, ūlū lyūshika ī likanza lya Ng'wana wa Munhū kwigasha h'isumbī lyakwe ly'ikūjo ū mu būtemi bokwe, na a bing'we abo mulī balondeeji bane mukwigasha ha masumbī ikūmi na abīlī ga būtemi, mubize balamuji ba ng'anda ikūmi n'ibīlī ja Baisilaeli.

²⁹Nīyo būlī ng'wene ūyo waleka numba, nūūlū baana ba ng'wawe bagosha na bakīma, nūūlū ise, nūūlū nina, nūūlū baana bakwe, nūūlū malaale kūlwa nguno ya lina lyane, akwanukūla ng'hangala igana. Hama akūbiza ng'wingīji ū mu būpanga butashilaga.

³⁰Alīyo balīho bingī abo balī kū būtongi, bakūbiza kū numa; hama abo balī kū numa bakūbiza kū būtongi.”