Read Sukuma Bible 2015 – Bibilia Ilagano Lya Kale 2015 Matayo 2 Bible Online

Matayo 2 - Sukuma Bible 2015 – Bibilia Ilagano Lya Kale 2015 bible

Matayo 2

¹Ū Yesu akabyalīlwa mu nzengo gwa Betelehemu ya Būyudaya, mu shikū ja ntemi Helode. Kūhayimanīla biza ū mu Yelusalemu bamani ba mihayo ya sonda, bafumile mhandī ja kīya.

²Aho bashika būbūja gīkī, “Alī halī ū Ntemi wa Bayudaya ūyo wabyalilwe? Nguno a bise ī kīya twabonile sonda yakwe, na lūūlū twizaga kūnamya.”

³Ū ntemi Helode aho wigwa ī mihayo yenīyo akazwangana no, pye na a bangī abo baalī hamò nang'hwe ī Yelusalemu.

⁴Ūbakuminga pye a bagabīji bataale na a balangi ba banhū, wandya kūbabūgīlīja ī lipandī lya kūbyalīlwa ū Kilisito.

⁵Nabo būng'wīla, “Betelehemu ya Būyudaya, nguno ū mulī ng'hangi handīkilwe gīkī,

⁶‘Bebe Betelehemu mu sī ya Būyudaya, ūtī ndo na hado yaya ū mu basugi ba Būyudaya, nguno ū kūfuma mulī bebe akwilonga Nsugi, ūyo akūbadīīma banhū bane, a Baisilaeli.’”

⁷Hūna ū Helode ūkalalwa kūmana kūfuma ū kū bamani ba mihayo ya sonda benabo. Ūbapūnja ha mhūjo kūbagīsīlīja chiza ī likanza lya kilongele ka sonda yenīyo.

⁸Ha numa ya henaho ūbatūma baje ī Betelehemu; ūbawīla, “Jagi mukīgīsīlīje mu welwa ng'holò ī mihayo ya ng'wana. Ūlū mulamone ng'wize muniwīle, nguno nane natogilwe kūjūnamya!”

⁹Aho bamala kūndegeleka ū ntemi, būbūūka bajile. Bībona hangī ī sonda ībatongeelile, gīt'ūmo yalī yabatongeelela ū kūfuma ī kīya. Yahayūshika a h'ipandī īlo walī ū Ng'wana, yoya ū kūselema.

¹⁰Aho bībona ī sonda bakayega na kayegele kataale no!

¹¹Bahayingīla ū mu numba, būmona ū Ng'wana nū nina ū Malia, būtuja mazwi būnamya. Baalī na manong'ho gabo, būgataligūla būng'winha shakwinha, zahabu, būbbani, na ngazu.

¹²Aho bahaya kūja kaya, ū Mulungu ūbahūgūla mu shilooti gīkī batizūbīta ū kūlī Helode. Na ng'hana būbītīla nzīla yīngī būja kū sī yabo.

¹³Aho bīnga, malaika wa ng'wa Seeba ūng'wilongela ū Yosefu mu shilooti; ūng'wīla gīkī, “Būūkaga ūnsole ū Ng'wana nū nina, ūpeelele Misili, ūkikale kwenūko kūshisha nakūwīle. Nguno ū Helode alī hihī kwandya kūnkooba ū Ng'wana amūlage.”

¹⁴Na ng'hana ūmisha, ūnsola ū Ng'wana hamò nū nina, būbūūka kūja Misili ī būjikū yenīyo.

¹⁵Akikala kwenūko kūshisha ūcha ū ntemi Helode. Ī mihayo īkaja gīko kūlwa kūshikīlījiwa kwa būhangi bo ng'wa Seeba; ūmo ng'hangi wakwe ahayīlile gīkī, “Nakang'witana ū Ng'wana wane kūfuma Misili.”

¹⁶Ū Helode akabona gīkī wagīmva nyachilū na a bamani ba mihayo ya sonda, na lūūlū ūpelana no. Ūlagīla babūlagwe a banīgīnī a bagosha, a ba mu Betelehemu, nī chalo īsho shibīmbīkanilwe nayo; pye a b'ilika lya kwandīja myaka ībīlī na kwika ha sīlīlī ya henaho, kūlenganīla nī likanza īlo bakang'wīla a bamani ba mihayo ya sonda, aho wabagīsīlīja.

¹⁷Ū mu kwīta gīko gūbiza gwashikīīla ū mhayo ūyo gūhayiwe na ng'hangi Yelemia; gīkī,

¹⁸“Ilaka līkigwiwa mu Lama, ng'hūngū na kūgang'hīla kūtaale; Laheli alīlīlīīla baana bakwe, nū kūhuumūjiwa alemile nguno batīho!”

¹⁹Aho waacha ū Helode, malaika wa ng'wa Seeba ūng'wilongela hangī ū Yosefu mu shilooti aho alī Misili. Ūng'wīla gīkī,

²⁰“Būūkaga ūnsole ū Ng'wana nū nina ūshoke kū sī ya Isiraeli; nguno baachile abo balūbūkoobaga ū būpanga bo Ng'wana.”

²¹Ng'hana aho wamisha ūnsola ū Ng'wana nū nina, būbūūka bajile; būshika ū mu sī ya Isiraeli.

²²Alīyo aho wigwa gīkī Akelao watemile ū mu sī ya Būyudaya a ha ng'wanya go ng'wa ise ū Helode, akogoha ū kūshikīīla. Ūhūgūlwa mu shilooti, ūja mhandī ja Galilaya,

²³ūūkazenga Nazaleti. Gūbiza gwashikīīla ūyo gūhayiwe na bahangi gīkī, “Alitanwa muna Nazaleti.”