Read Sukuma Bible 2015 – Bibilia Ilagano Lya Kale 2015 Matayo 27 Bible Online

Matayo 27 - Sukuma Bible 2015 – Bibilia Ilagano Lya Kale 2015 bible

Matayo 27

¹Hūna lūūlū aho wela ī dilū, pye a bagabīji bataale na a banamhala bigasha, bizunīlīja gīkī ū Yesu abūlagwe.

²Hūna būntunga, būntongeja bantwalile kūlī Pilato, ūyo walī nsugi w'ipandī lyenīlo.

³Ū Yuda, ū nodeejibo ng'wa Yesu, aho wabona gīkī walamulwa, ūgalūcha a maganiko. Ī shilingi ījo makūmi adatū ūjishosha ū kū bagabīji bataale na a banamhala.

⁴Ūūkabawīla gīkī, “Naahūbile ū kūlodeela mininga gatī na shilingo!” Nabo būng'wīla, “Tūlī na mhayo kī hangī a bise? Ūkwīlonja bebe ng'wenekīlī ī yenīyo!”

⁵Ūjiponeja mu hekalu ī hela, ū wei wīnga a henaho ūja ūūkinija!

⁶Alīyo a bagabīji bataale aho bajisola ī hela jenījo būhaya gīkī, “Ītī yawiza ū kūjitūūla ng'wibīkīlo lya manong'ho, nguno ī joi jilī hela ja mininga.”

⁷Lyalīho itongo lya mūmbi, bizunīlīja kūjitūmamīla kūlīgūla, gīkī bayūjīkīla mo bageni.

⁸Ī litongo lyenīlo lyūyitanwa Itongo lya mininga, kūshisha na lelo yene.

⁹Gūbiza gwashikīīla ūyo gūhayiwe na ng'hangi Yelemia; gīkī, “Bakajisola ī shilingi īji makūmi adatū, ījo jilī mpango gokwe ūyo Baisilaeli bakang'wisaabīla,

¹⁰būjigūla itongo lya mūmbi gīt'ūmo Seeba akanilagīīlīla.”

¹¹Na ng'hana ū Yesu wīmīīla ū kū būtongi bo nsugi; ū nsugi ūmūja gīkī, “Ū bebe hū ūlī ntemi o Bayudaya?” ū Yesu ūshosha ūng'wīla, “H'ūmo ūlīhayīla!”

¹²Alīyo aho bandya kūmūūla a bagabīji bataale na a banamhala, atashokije nūūlū mhayo!

¹³Nose ū Pilato ūng'wīla gīkī, “Bebe ūtūyigwaga īyo balīkūbūūla?”

¹⁴Nahene atanshokegije nūūlū mhayo gūmò; ū nsugi ūkumya no!

¹⁵Ū mu shikū ja shigukulu, ū nsugi walī na shīmīle sha kūbataligūlīla a banhū ntungwa ūyo būng'wigongela boi.

¹⁶A makanza genayo walīho ntungwa nkumūku witanagwa Balaba.

¹⁷Hūna lūūlū ū Pilato ūbabūja a banhū abo baalī bibilinga; ūhaya gīkī, “Mutogilwe namutaligūlīle nani? Balaba, nūūlū ū Yesu ūyo akitanagwa Kilisito?”

¹⁸Nguno walī amanile gīkī baalī bantūūla ū Yesu mu makono gakwe kūlwa wilu.

¹⁹Ū Pilato aho ataalī igashije ū ng'wibanza, ū nke okwe ūntūmīla nhūng'wa kūng'wīla gīkī, “Ū munhū ng'wenūyo ntūngīlīja nekage ū bebe. Nguno ū būjikū bo lelo nakoyaga hataale no mu shilooti kūlwakwe.”

²⁰Kwike a bagabīji bataale na a banamhala, baalī babasamīlīja a banhū gīkī banombe abataligūlīle Balaba, ū Yesu ng'wene ache!

²¹Hūna lūūlū ū nsugi ūshokeela hangī kūhaya gīkī, “Ū mu babīlī aba, mutogilwe namutaligūlīle alī?” Nabo būhaya, “Balaba!”

²²Nang'hwe ū Pilato ūbabūja, “Alū ū Yesu ūyo akitanagwa Kilisito, nang'wīte ginehe ū ng'wene?” Pye a bose būhoolanīja kūhaya gīkī, “Nekage akong'we ha nsalaba!”

²³Nang'hwe ūhaya, “Nibūlī wītile būbi kī?” A boi bongeja kūhoolanīja n'ilaka lya higūlya balīhaya gīkī, “Ni akomagwe ha nsalaba!”

²⁴Ū Pilato aho wabona gīkī gūtūsobookaga mhayo ntengeke, ūlū ītī kongeja kūkūla nsambo dūhū, ūsola minzī ūkalaba a makono gakwe kū būtongi wabo a banhū; ūhaya gīkī, “Neela ū nene, nīnga ū mu mininga gakwe ū munhū ng'wenūyū, mukwīlonja bing'we benekīlī ī yenīyī!”

²⁵Pye a banhū būnshokeja balīng'wīla gīkī, “A mininga gakwe ni gabizage ha mitwe yise na baana bise!”

²⁶Na ng'hana ūbataligūlīla ū Balaba. Aho wamala kūntūla mbooko ū Yesu, ūntūūla mu makono gabo akakong'we ha nsalaba.

²⁷Hūna a bashilikale ba nsugi būng'wingīja ū Yesu mu numba ya h'ikūlū, būng'wihoolekela ibita igima.

²⁸Būnzuuja ī shizwalo īsho walī azwalile, būnzwalīkīja ng'hanjo ya nzulunge.

²⁹Hama būbeeja na ngikili ya ming'hwa, nayo būnzwalīkīja ū kū ntwe gokwe, būlola būndimya na nang'ha ū mu nkono gokwe ū gwa būlyo; hūna bandya kūyūntugīja mazwi ū kū būtongi bokwe, kūnū balīngīmba nyachilū; būyūhaya gīkī, “Kūlaga ūhangame ntemi o Bayudaya!”

³⁰Būyūnswīla na mate; banoga būgūsola ū nang'ha būyūntūlīla ū kū ntwe gokwe!

³¹Aho bamala ū kūngīmba nyachilū gīko, būnzuuja ī ng'hanjo ya nzulunge, būnzwalīkīja ī shizwalo shakwe. Hūna būntwala kūjūnkoma ha nsalaba!

³²Aho balīja, būmona munhū ūmò muna Kilene, lina lyakwe Simoni. Būng'hadīkīja amūūkīje ū nsalaba gokwe.

³³Hūna būnshisha ū Yesu h'ipandī līkitanagwa Goligota, makūlū gaho ipandī lya lūpanga.

³⁴Būng'winha mvinya īsangije ndūlū gīkī ang'we; alīyo aho wīloja atīng'wile.

³⁵Bahayūmala ū kūnkoma būshigabanha ī shizwalo shakwe bo kūshesela mbale.

³⁶Hūna bigasha henaho kūnang'hana.

³⁷A ha nsalaba a higūlya ya ntwe gokwe, būtūūlwa ho wandīke bo kūbūūlwa kwakwe būhayile gīkī, “ŪYŪ NG'WENE YESU NTEMI O BAYUDAYA”

³⁸Na basambo babīlī bakakong'wa hamò nang'hwe, būlī ng'wene ha nsalaba gokwe, ūmò kū būlyo bokwe, ūngī kū lūmoso.

³⁹Abo babītīlaga haho hihī būyūnsondagūla, kūnū bakūshingishaga mitwe yabo;

⁴⁰balīhaya, “Ni ginehe ng'wing'wana o kūsambagūla hekalu na kūmala kwīzenga mu shikū idatū. Alik'ipījage shi lūūlū ūlū ūlī Ng'wana o ng'wa Mulungu, wike ho a ha nsalaba!”

⁴¹Na a bagabīji bataale bandya kwiyineenelegeja na balangi ba shilagīlo, hamò na banamhala. Būyūhaya gīkī,

⁴²“Walūpījaga bangī dūhū gashi nīyo, ū wei ng'wenekīlī walemeelagwa ū kwipīja. Angū nang'hwe ntemi o Bayudaya ī gīko, ni ikage ho a ha nsalaba ī haha, tūkūnzunya!

⁴³Walihamba hambaga kūnsanya Mulungu, ni ampījage lūūlū ī haha ūlū ng'hana ang'hayile. Īkī walikalaga ūtwilambagūlīla alīhaya gīkī, ‘Nalī Ng'wana o ng'wa Mulungu!’”

⁴⁴Na a basambo, abo baalī bakong'wa hamò nang'hwe, nabo būyūmbyeedeleja!

⁴⁵Ī līīmi aho lyashika ntwe gatī, shūbiza ho giiti; shīkundīkīja pyī ī sī, kūshisha sa kenda.

⁴⁶Mu sa gītī kenda gīko, ū Yesu ūlīla n'ilaka itaale alīhaya, “Eli Eli, lema sabaktani?” Hū kūhaya, “Mulungu wane, Mulungu wane, nibūlī wanilekaga?”

⁴⁷Bamò babo abo baalī bīmīīla henaho aho bigwa būhaya gīkī, “Ū munhū ūyū ong'witana Eliya!”

⁴⁸Hūna ūmò ūpeela haho na haho kūjūsola ibbūpyo, ūlīlobya mu siki ūlītunga kwidete, wiza ūng'winha ang'we.

⁴⁹Alīyo a bangī būhaya, “Lekaga tūlole, ūlū akwiza ū Eliya ampīje!”

⁵⁰Hūna ūlīla hangī ū Yesu n'ilaka itaale; ūgūfunya ū moyo gokwe!

⁵¹Kūhayimanīla ī lisenge lya mu hekalu lyatandūka kūfuma kwigūlya kūshisha ha sī, lyūlekana habīlī; nguno īkading'hima nyahīnga nhaale kūshisha na mawe gūpaanagūka.

⁵²Na shigila shūkundūka, mibīlī ya beela bingī abo baalī balaalile yūjūūka.

⁵³Būfuma ū mu shigila, aho wajūūka kūfuma mu bafu ū Yesu, bingīla ū mu nzengo ng'wela biyoolecha kū banhū bingī.

⁵⁴Ū ntaale o bashilikale igana ūyo onang'hanaga ū Yesu, hamò na a babo baalī bīmīīla nang'hwe bakogoha no aho bībona ī nyahīnga pyī nī yīngī īyo īkilonga. Biwīla gīkī, “Bing'we ū munhū ng'wenūyū walī Ng'wana o ng'wa Mulungu ng'hana!”

⁵⁵Ibita lya bakīma bingī baalī banondeela ū Yesu kūfuma Galilaya, kūlwa kūmanūngunanha; nabo baalīho biloleelaga balī ka kūle.

⁵⁶Ū mu benabo baalīmo ba Malia Magadalena, nū Malia ū nina o ba Yakobo na Yosefu; hamò na nina o ba ng'wana Zebedayo.

⁵⁷Aho yabiza mhīndī, wiza munhū nebe nsabi, muna Alimataya, lina lyakwe Yosefu; nang'hwe walī ng'hemba o ng'wa Yesu.

⁵⁸Ū munhū ng'wenūyo ūja ū kūlī Pilato ūūkagūlomba ū mīlī go ng'wa Yesu; ū Pilato ūlagīja winhwa.

⁵⁹Hūna lūūlū ū Yosefu ūgūsola ū mīlī, ūgūlingīīla ng'wenda gwawiza gwa kitaani.

⁶⁰Hanuma ūūkagūlaaja mu shigila shakwe shipya, walī wasīmba ng'wiwe gīt'ihalo; a ha mīta ūpilingītīja ho iwe itaale lyūchiba; hūna wīnga ho.

⁶¹Ū Malia Magadalena nū Malia ū ūngī, baalī bigasha balolelile ū kū shigila.

⁶²Aho lwabīta ū lūshikū lwenūlo, ūlo lwalī lwa kūlonja lonja, ū kū ntondo yaho a bagabīji bataale na a Bafalisayo bikobya būja ū kūlī Pilato.

⁶³Būūkang'wīla gīkī, “Baba twizūkwa ūmo walikalaga ūhayīla ū ng'wing'wana ū nomolomo ūyo, aho walī ataalī mpanga, angū gīkī, ‘Ha numa ya shikū idatū nakuhimbuka!’

⁶⁴Hambū hambū ni walagīja shilugalwe chiza ī shigila shidaame, kūshisha jishike ī shikū ījo idatū. Batiziza a bahemba bakwe bang'wibe, hūna bandye kūbawīla a banhū gīkī, wajūūkile kūfuma mu bafu. Ūlū yūja gīko ū būlomolomo wene būkūbiza būtaale no, kūtinda ū bo kwandya!”

⁶⁵Nang'hwe ū Pilato ūbawīla, “A balang'hani a bene mulī nabo, bing'we jagi mukalugale ho mudaamye gīt'ūmo mumanīlile.”

⁶⁶Būja būūkalīzengeela ī liwe, īlo lyalī līchibīgije a ha mīta gwa shigila, lyūdaama. Būlītūūlīla na lūmeng'ho, būleka ho na balang'hani.