Read Sukuma Bible 2015 – Bibilia Ilagano Lya Kale 2015 Matayo 4 Bible Online

Matayo 4 - Sukuma Bible 2015 – Bibilia Ilagano Lya Kale 2015 bible

Matayo 4

¹Ha numa ya yenīyo, ū Yesu ūtongeelwa na Moyo kūja kū mabala, kūjūgeng'wa na Shetani.

²Ūkikala kwenūko shikū makūmi ane, akūdīlaga nzala līīmi na būjikū; nose ūtuuba!

³Ū ngemi ūng'wizīīla ūng'wīla gīkī, “Ūlū ūlī Ng'wana wa ng'wa Mulungu, gawīlage a mawe genaya gabize shilīwa.”

⁴Nang'hwe ūshosha ūhaya, “Yandīkilwe gīkī, ‘Ū munhū atūdūla kūbiza mpanga kūlwa shilīwa kwike, alīyo kūlwa būlī mhayo ūyo gūfumile mu nomo go ng'wa Mulungu.’”

⁵Hūna ū Shetani ūntwala kū nzengo ng'wela, aho wanshisha koi ūntūūla higūlya ya hekalu.

⁶Ūng'wīla gīkī, “Ūlū ūlī Ng'wana wa ng'wa Mulungu al'iponejage ha sī shi; nguno gwandīkilwe gīkī, ‘Akūlagīla bamalaika bakwe kūlwako, nabo bakūkūbūūcha mu makono gabo, ūtizipama lūpambala lwako h'iwe!’”

⁷Nang'hwe ū Yesu ūnshokeja ūng'wīla, “Yandīkilwe hangī gīkī, ‘Yaya ū kūngema ū Seeba Mulungu wako.’”

⁸Ha numa hangī ū Shetani ūntwala kū lūgūlū lūlīhu; ūūkandya kūng'oolekeja pye a mabūsugi ga mu sī, hamò nī likūjo lyago.

⁹Hūna ūng'wīla gīkī, “Nakūkwinha bebe pye a genaya, ūlū ūgwa ha sī kūnilamya.”

¹⁰A henaho ū Yesu ūng'wīla, “Īngaga a henaha Shetani, nguno gwandīkilwe gīkī, ‘Namyage Seeba Mulungu wako, na ūntūmamīle wei dūhū!’”

¹¹Hūna ū Shetani ūng'wīngīla, bamalaika biza kūntūmamīla.

¹²Ū Yesu aho wigwa gīkī ū Yohana waponyiwe mu jeela, akaja Galilaya.

¹³Kwike atalendile ī Nazaleti, wīnga koi ūja ūūkikala Kapelanaumu, mhandī ja Zabuloni na Nafutali; hihī na nyanza.

¹⁴Ū mhayo gwenūyū gūbiza gwashikīlīja īyo īhayiwe na ng'hangi Isaya; gīkī,

¹⁵“Sī ya Zabuloni na sī ya Nafutali, nzīla ya kū nyanza, kū nkīlo gwa Yolodani; Galilaya ya banhū ba mahanga.

¹⁶A banhū ba mu giiti baabonile isana itaale, alichene, isana lyabaakīlile abo wikalo wabo būlī mu nengeeji gwa lūfu!”

¹⁷Kūfuma ikanza lyenīlo, ū Yesu wandya kūlomeela alīhaya gīkī, “Galūkagi nguno ū būtemi bo ng'wigūlū wegeelaga!”

¹⁸Lūshikū lūmò aho alīshimīza kū mbalama ya nyanza ya Galilaya, akababona banhū babīlī ba shikūlū na shizuna, Simoni ūyo witanagwa Petelo, na Andulea ng'wanong'wawe; baategaga ntego mu nyanza, nguno baalī bategi ba ndīlo.

¹⁹Ūbawīla gīkī, “Nilondeelagi nakūng'wīta mubize bazubi ba banhū.”

²⁰Ng'hana haho na haho bīleka ī mitego yabo būnondeela.

²¹Aho waja ha būtongi hado, ūbabona bangī babīlī ba shikūlū na shizuna, Yakobo ng'wana Zebedayo, na Yohana ng'wanong'wawe. Nabo baalī mu lyato hamò na saabo Zebedayo, bakūbeeja beejaga mitego yabo, na a bene ūbitana.

²²Nabo haho na haho būnondeela, būneka ū saabo nī lyato lyabo.

²³Hūna wandya kūja hose hose ū mu Galilaya akūlangaga mu masinagogi gabo, na kūlomeela Ng'hūlū Jawiza ja būtemi, hamò na kūpīja būsaatu bo banhū, na būlemehazu bo būlī mbika.

²⁴Ū lūkumo lokwe lūsambaala hose pye, kūshisha lūshika mu sī ya Sulia. Būyūng'wenhela pye abo baalī basaatu, na a babo baalī na būlemehazu būngī na būngī bo mīlī. Pye wabapījaga, na a babo baluhiagwa masamva, na a ba lūsalo lwa kūgwa, na a ba būsaatu bo kūpola mīlī.

²⁵Mabita mataale kūfuma ū mu Galilaya ng'wenūmo gūyūnondeela; na bangī bafumaga Dekapoli, bangī Yelusalemu, nī Būyudaya ī yose. Bamò bafumaga kū nkīlo gwa mongo gwa Yolodani.