Read Sukuma Bible 2015 – Bibilia Ilagano Lya Kale 2015 Matayo 5 Bible Online

Matayo 5 - Sukuma Bible 2015 – Bibilia Ilagano Lya Kale 2015 bible

Matayo 5

¹Aho wagabona a mabita ga banhū, ūlinha mu lūgūlū ūūkigasha. Bahayūng'wegeela a bahemba bakwe,

²wandya kūbalanga alīhaya gīkī,

³“Balī na lubango a bahabī mu moyo; nguno ū būtemi bo ng'wigūlū būlī wabo.

⁴Balī na lubango abo balī na būpīna; nguno bakūlūngūjiwa.

⁵Balī na lubango a bidohya; nguno bakūbiza bingīji ba sī.

⁶Balī na lubango abo lūtuubo na nota yabo shilī ha kūkooba būtūngīlīja; nguno bakūshikīlīgījiwa ī ng'hūmbū jabo.

⁷Balī na lubango a bachīji ba shigongo; nguno bakūchīlwa shigongo.

⁸Balī na lubango a beela mu moyo; nguno bakūmona ū Mulungu.

⁹Balī na lubango a batūūji ba mhola; nguno bakwitanwa balī baana ba ng'wa Mulungu.

¹⁰Balī na lubango abo bakūluhiagwa kūlwa kwīta yawiza; nguno ū būtemi bo ng'wigūlū būlī wabo.”

¹¹“A bing'we mulī na lubango ūlū bakūmusondagūlaga na kūmuluhya, na kūmulembekeja ya būbi bo būlī mbika kūlwa nguno yane.

¹²Yegagi na kūzalabana, īkī mulī na mheela nhaale ū ng'wigūlū. Nguno h'ūmo babaluhījaga na a bahangi a ba kale, abo baalīho aho bing'we mutaalī kūbiza ho!”

¹³“A bing'we mulī munhu gwa sī, alīyo ū munhu ūlū gūlinda gūsūūka, angū gūdūgije kūsandūchiwa kī hangī? Gūkūbiza u mwanya kū būlī nīmo gose gose, ūlū ītī kūponyiwa hanze dūhū na kūpandagīlwa na banhū!

¹⁴A bing'we mul'isana lya sī, ū nzengo ūlū gūzengelilwe ha ngūlya gūtūdūla kūshīkījiwa.

¹⁵Na hangī a banhū batabachaga tala bīkundīkīja itangwa, alīyo bakīkīndīkaga h'ikīndīkīlo lya tala; ū mu gīko h'īkūbatiimīla pye abo balīmo ū mu numba.

¹⁶H'ūmo īlī nū kū bing'we, shiigelile ī lisana ling'we līyūbatiimīla a banhū, bashibone ī shītīle shing'we ī shawiza, bankūje ū Sīng'we ūyo alī ng'wigūlū.”

¹⁷“Mutiziganika gīkī ū nene nizile kūshīnja ī shilagīlo nūūlū a bahangi. Yaya natizile kwīta gīko, nizile kwīshikīlīja ī yenīyo.

¹⁸Nguno nalīmuwīla mu ng'hana yose gīkī, katīnga ho kadone nūūlū ka nuguta kamò ū mu shilagīlo, kūshisha aho igūlū na sī shikūbīta, na būlī mhayo gūshikīlījiwe.

¹⁹Hūna lūūlū nalīmuwīla gīkī, ose ose ūyo ūkenaagūla shilagīlo shimò shaho, nūūlū shibize shido na ginehe, hama ūbalanga na bangī kwīta gīko, ū munhū ng'wenūyo akūbiza atī na mwanya nūūlū hado ū mu būtemi bo ng'wigūlū. Alīyo ūyo wīta gīt'ūmo īlī, hūna ūbalanga na bangī kwīta chene; ū ng'wenūyo akūbiza ntaale ū mu būtemi bo ng'wigūlū.

²⁰Kūlwa nguno nalīmuwīla gīkī, ū būtūngīlīja wing'we ūlū būtakīlile a ha būtūngīlīja bo balangi ba shilagīlo nū bo Bafalisayo, mutūdūla ū kwingīla ū mu būtemi bo ng'wigūlū.”

²¹“Mukigwaga gūhayiwe ū kū bakūlūgenji gīkī, ‘Yaya ū kūbūlaga; na būlī ng'wene ūyo ūbūlaga wigeleelagwa nsango.’

²²Alīyo ū nene nalīmuwīla gīkī, būlī ng'wene ūyo ampelanīlile ng'wiye wigeleelilwe kūpandīka nsango. Nīyo nūūlū munhū ūng'wīla munhū ūngī mhayo gwa koolecha kūndalaha, ū ng'wenūyo nang'hwe shing'wigeleelilwe kūshishiwa kwibanza. Nūūlū hamo ūng'wīla gīkī, ‘Ū bebe ūlī līkūdūhū.’ Ū ng'hayi ng'wenūyo wigeleelagwa nsango gwa mu nyanza ya moto!

²³Nose lūūlū īkūbeelela ībize gīkī, nūūlū ūlīfunya shakwinha shako ha ng'walīlo, hūna wizūkwa gīkī ūlī na wilemeelwa na ndūgūyo,

²⁴shilekage henaho ha būtongi bo ng'walīlo, ūje tame ūkiyelelwe mbīnyigwa nū ndūgūyo, hūna wize ūshifunye ī shakwinha shako.

²⁵Iyangūlage nū ng'wilemeelwa wako, wiyigwe nang'hwe wangū aho mutaalī mu nzīla. Atizūkūshisha kūlī namuji, nang'hwe ū namuji akūtūūle mu makono ga nshilikale ūponyiwe mu jeela.

²⁶Nalīkūwīla gwa ng'hana gīkī, ūtūfuma mo kūshisha ūmale ū kūlīpa pyī ū būgasa wako; kūshisha hela ya kūmalīja!”

²⁷“Mukigwaga gūhayiwe gīkī, ‘Yaya ū kūshihya.’

²⁸Alīyo ū nene nalīmuwīla gīkī, būlī ng'wene ūyo ūnola nkīma mu kūng'wikūmva, wamalaga kūshihya nang'hwe ū mu moyo gokwe.

²⁹Hūna lūūlū, nūūlū liso lyako lya kū būlyo lyūkwipamya līkobolage ūlīponye ūlekane nalyo, nguno īlī hambū hambū lījimīīle ibudīka lya mīlī gwako, kūtinda ī gīkī pyī ū mīlī gūponyiwe mu nsango gwa moto.

³⁰Hama nūūlū nkono gwako gwa būlyo gūkūhūbya, gūbbutage ūgūponye, ūlekane nago; nguno īlī hambū hambū lījimīīle ibudīka lya mīlī gwako dūhū, kūtinda ī gīkī pyī ū mīlī gūponyiwe mu nsango gwa moto!”

³¹“Hangī gūhayiwe gīkī, ‘Ose ose ūyo ūneka nke wakwe shiigelile ang'winhe talaka.’

³²Alīyo ū nene nalīmuwīla gīkī, ūyo ūneka nke wakwe kūlwa nguno yīngī yose yose, ūlū ītī kūlwa nguno ya būshihani, wang'wītaga kūbiza nshihani; hangī nū ngosha ūyo ūntoola nkīma alekilwe, nang'hwe wingīlaga mu būshihani.”

³³“Na hangī mukigwaga gūhayiwe ū kū bakūlūgenji gīkī, ‘Yaya ū kūlahīla nyamaama, alīyo nshikīlīgījage ū Seeba ī shilahīlo shako.’

³⁴Kwike ū nene nalīmuwīla gīkī, yaya gete ū kūlahīla kūnū mukūlīhayaga igūlū, nguno ī lyoi līl'isumbī lya ng'wa Mulungu.

³⁵Yaya nūūlū kwīhaya sī, nguno ī yoi īlī būtūūlo wa mhambala jakwe; pyī nūūlū nzengo gwa Yelusalemu yaya, nguno gūlī nzengo gwa Ntemi ntaale.

³⁶Nīyo nūūlū kūgūhaya ntwe gwako nī chene yaya; nguno ū bebe ūtī na būdūla bo kūbeeja lūywīlī nūūlū lūmò dūhū, lwape nūūlū lwapi!

³⁷Alīyo ū mhayo gwing'we ūlū gūbiza ‘Ehe’ ni ībizage ‘Ehe.’ Ūlū ‘Yaya’ numho ‘Yaya.’ Nguno pyī ī yīngī ī ya kūkīla a ha yenīyī, īkafumaga kūlī ng'wanishi!”

³⁸“Mukigwaga gūhayiwe gīkī, ‘Liso kūlwa liso,’ na gīkī, ‘Lino kūlwa lino!’

³⁹Alīyo ū nene nalīmuwīla yaya ū kwilwisha na munhū ng'hūnga; hūna lūūlū ūlū ose ose ūkūpaala ipī kū lūsaya lo kū būlyo, ngalūkījage nū lwandī ū lūngī!

⁴⁰Nūūlū ūngī ūgaagaana kūkūtwala kwibanza kūlwa kūkooba kūkūtaaja ishadi lyako, nekelage nī ng'hanjo yako.

⁴¹Nūūlū hamo ūngī hangī ūkūhadīkīja kūja nang'hwe lūgendo lwa ka koleho, jaga nang'hwe ng'hangala ibīlī kokelaho.

⁴²Ūyo ūkūlomba shikolo ng'winhage, nīyo ūlū munhū alītogwa kūsola būgasa kūfuma kūlī bebe, yaya ū kūng'wima.”

⁴³“Mukigwaga gūhayiwe gīkī, ‘Ntogagwe nzenganwa ng'wiyo, alīyo ū ng'wanishi wako nkolagwe!’

⁴⁴Kwike ū nene nalīmuwīla batogagwi na a banishi bing'we, hangī ng'ūbalombela abo bakūmuluhyaga.

⁴⁵Ū mu gīko hū mukūbiza baana bakwe ū Sīng'we ūyo alī ng'wigūlū. Nguno ū ng'wene atī na būsolanhya, akabaakījaga ī līīmi lyakwe pye a banhū, a babūbi na a bawiza; nī mbula akabinhaga a batūngīlīja na a batī batūngīlīja.

⁴⁶Ī gīsī mukūpandīka mheela kī ūlū ng'ūgelela kūbatogwa dūhū abo bamutogilwe a bing'we? Dūhaya na a batobisha ba goodi bakīītaga gīko dūhū!

⁴⁷Nūūlū ng'ūgelela kūyūgīsha badūgū bing'we dūhū, mukūbiza mubalebije kī abo bataamanile Mulungu?

⁴⁸Hūna lūūlū, shiigelile mubize bashikanu gīt'ūmo alī ū Sīng'we ūyo alī ng'wigūlū.”