Read Sukuma Bible 2015 – Bibilia Ilagano Lya Kale 2015 Matayo 6 Bible Online

Matayo 6 - Sukuma Bible 2015 – Bibilia Ilagano Lya Kale 2015 bible

Matayo 6

¹“Nīyo ilang'hanagi nūūlū mukūbeejaga yawiza, yaya ū kwiyoolecha kū banhū; nguno ūlū ng'wīta gīko mutūpandīka mheela yose yose ū kūfuma ū kūlī Sīng'we ūyo alī ng'wigūlū.

²Nose ūlū ūlīfunya shakwinha shako shawiza, yaya ū kwitūlīla lūpūndū bebe ng'wenekīlī, gīt'ūmo bakīītīlaga bibeeleja mu masinagogi na mu mayīla. Nguno a bene batogilwe kūkumīlījiwa na banhū. Na ng'hana nalīmuwīla bakapandīkaga ī mheela jabo.

³Alīyo ū bebe ūlū ūlīfunya shakwinha shako shawiza, nūūlū nkono gwako ū gwa lūmoso gūtizūmana ūmo gūlīītīla ū nkono ū gwa būlyo.

⁴Ū mu kwīta gīko a kafunīje kako kakūbiza ka mu mbisīla, alīyo ū So ūyo akabonaga nūūlū mu mbisīla akūkwinha īyo īkwigeleelilwe.”

⁵“Na hangī nūūlū mukūlombaga mutiziikolanīja na bibeeleja abo batogilwe kūlomba mu masinagogi na mu mapanda gīkī babonwe na banhū; na ng'hana nalīmuwīla bakapandīkaga ī mheela jabo.

⁶Alīyo ū bebe ūlū ūhaya kūlomba, ingīlaga mu numba yako, kū chumba sha mu gatī ūlugale nū mīta gwako, hūna ūnombe ū So mu kwidohya. Nang'hwe ū So ūyo akabonaga nūūlū mu mbisīla akūkūbeegeja īyo īkwigeleelilwe.

⁷Ūlū mulīlomba, yaya ū kūkwīja mihayo gītī banhū abo bataamanile Mulungu; a bene bakiganikaga bakwigwiwa kūlwa kūkwīja mihayo.

⁸Yaya ū kwilenganīja nabo, nguno a bing'we nūūlū aho mutaalī kūlomba, ū Sīng'we ayīmanile īyo yigelile kūmugunanha.

⁹Hūna lūūlū, mulalombage gīkī, ‘Sīswe ūyo ūlī ng'wigūlū, lina lyako lyeela līkūjiwe.

¹⁰Būtemi wako wize, Īyo ūtogilwe īshikīīle nū mu sī, gītī ng'wigūlū.

¹¹Twinhage nī lelo ī shilīwa shise Ī sha būlī lūshikū.

¹²Tūlekejage nū būhūbi wise, gīt'ūmo na a bise tūkabalekejaga abo balī na būgasa kū bise.

¹³Na ūtizūtūtwala mu kūgeng'wa, alīyo tūpījage twīnge ū mulī Wabūbi. Nguno ū būtemi būlī wako, nū būdūla nī nguzu; kūshisha shiku jose, Alichene.’

¹⁴Nguno ūlū ng'ūbalekeja a banhū ū būhūbi wabo, na a bing'we akūmulekeja ū Sīng'we ūyo alī ng'wigūlū.

¹⁵Alīyo ūlū mutūbalekeja a banhū, na a bing'we atūmulekeja ū Sīng'we ū būhūbi wing'we.”

¹⁶“Hangī nūūlū ng'ūfunga, mutizūbiza bonzololoku gīt'ūmo bakīītīlaga bibeeleja. Nguno a bene bakibipya bipyaga ū būshū wabo kūlwa kwiyoolecha kū banhū gīkī balī ng'wikanza lya kūfunga. Na ng'hana nalīmuwīla bakapandīkaga ī mheela jabo.

¹⁷Alīyo ū bebe ūlū ūlī ng'wikanza lya kūfunga, boojage ū būshū wako; nū ntwe gwako ūgūbile maguta.

¹⁸Ūtiziyoolecha kū banhū gīkī ūfungile, ūlū ītī kūlī So dūhū ūyo atabonekanaga. Ū mu kwīta gīko ū So ūyo akabonaga nūūlū mu mbisīla, akūkūbeegeja īyo īkwigeleelilwe.”

¹⁹“Yaya ū kwibīkīja mu sī ī sabo jing'we, nguno jidūgije kūkenaagūlwa fufuuji nūūlū būbozu; nūūlū basambo badūgije kūkambūla būjiiba.

²⁰Alīyo jibīkagi ng'wigūlū, ūko jitūdūla kūkenaagūlwa fufuuji nūūlū būbozu; hama nūūlū basambo batadūgije kūkambūla na kwiba.

²¹Nguno aho ūbisīlile sabo yako, h'aho īlolelile nī ng'holò yako.”

²²“Ī tala ya mīlī līlī liso, na lūūlū ī liso lyako ūlū līlī mhola, numho ū mīlī gwako gūlī n'isana pyī ū gose.

²³Alīyo ī liso lyako ūlū lyūpandīka kaagede, pyī ū mīlī gwako gūkūbiza mu giiti. Nose hū kūhaya ī lisana lyako ūlū lyūgalūka kūbiza giiti, ī giiti yene shikubūza nhaale no!”

²⁴“Atīho ūyo adūgije kūbatūmamīla bataale babīlī; nguno akunkolwa ūmo wabo, ūntogwa ū ūngī; nūūlū adūgije kung'wīgwa ūmò, alīyo ū ūngī ūndalaha. Nose hū kūhaya mutūdūla kūntūmamila welelo hamò na sabo!”

²⁵“Hūna lūūlū, nalīmuwīla ubing'we yaya ū kwikala mukūkoya koyelaga būpanga wing'we, gīkī mukūlya kī, nūūlū mukūng'wa kī; nūūlū mibili ying'we, gīkī mukūzwala kī nguno ū bupanga būli na būtaale kūtinda shilīwa, nū mīlī gūtashiheebile ī shizwalo?

²⁶Alijilolagi ī noni ja kūlala ījo jitabībaga nūūlū jitahelebaga na hangi jiti na numba ya kūbīkīla shiliwa ma maluuli; aliyo Seeba ūyo ali ng'wishilu akajilishaga. A bing'we mwikilile kūle ī noni?

²⁷Ī gīsī alīho nani nūūlū ūmò wing'we ūyo adūgije kwiyongeleleja ī likanza lya būlamu bokwe kūlwa kwiyanga yangīla wei ng'wenekīlī?

²⁸Na hangī nibūlī mukūzwanganaga kūlwa nguno ya shizwalo? Aligiganikīlagi a mabonji ga mu matogolo ūmo gakakūlīlaga, a goyi gatatūmamaga, nūūlū shizwalo gatabeejaga.

²⁹Alīyo nalīmuwīla gīkī nūūlū ū Solomoni hamò n'ikūjo lyakwe pyī ī lyose ūmo lyalī, walī atadūgije kūzwalīla chiza kūshisha ūlenganīla nūūlū na līmò lyago.

³⁰Bing'we baswanya, ū Mulungu ūyo akazwalīkaga maswa ga mu matogolo chiza gīko, ayo galīho ī lelo, alīyo a ha ntondo gaponyiwa mu moto; angū, a bing'we atūdūla kūng'wītīla mitaale kūtinda?

³¹“Hūna lūūlū, oyagi gete ū kwikala mukūkoya koyaga mulīhaya gīkī, ‘Tūkūlya kī’; nūūlū, ‘Tūkūng'wa kī;’ nūūlū, ‘Tūkūzwala kī!’

³²Nguno abo bataamanile Mulungu hū bene abo bakakoyaga kūshikooba ī shose; alīyo a bing'we, ū Sīng'we ūyo alī ng'wigūlū amanile gīkī shing'wigeleelilwe mubize nasho ī shose.

³³A bing'we bene būkoobagi tame ū būtemi bokwe nū būtūngīlīja bokwe, ishingi i shene mukongejiwa.

³⁴Lekagi ū kwikala ng'ūkoya koyela ya ha ntondo, nguno ī ya ntondo nayo īkūlonjiwa ng'wikanza lyayo; būlī lūshikū lūlī na makoye ga kūlwigela.”